Manugwali 1

1  2  3  4  5  6  7  8  9  10  11  12

☆☆☆

Ang Kabuhi Wala sing Kapuslanan

1 Amo ini ang ginsiling sang Manugwali, ang hari sa Jerusalem nga anak ni David.
2 Ang Kabuhi wala sing kapuslanan, wala sing kapuslanan, ang siling sang Manugwali. Wala sing kapuslanan, ang tanan wala sing kapuslanan.
3 Ginagamit mo ang imo kabuhi sa pagpangabudlay, sa paghimakas, kag ano bala ang makuha mo sini?
4 Ang mga kaliwatan nagaabot kag nagataliwan, pero ang kalibutan amo man gihapon.
5 Ang adlaw nagabutlak kag nagatunod sa gihapon, kag nagabalik sa duog diin magasugod sia liwat.
6 Ang hangin nagahuyop sa bagatnan, nagahuyop sa aminhan, nagabuyong-buyong ini kag nagabalik liwat.
7 Ang tanan nga suba nagailig sa dagat, pero ang dagat wala nagakapuno. Ang tubig nagabalik sa iya ginhalinan, kag nagailig ini liwat.
8 Ang tanan nga butang nagapalapyo sa tawo—ang pagkapalapyo nga indi masaysay. Ang aton mga mata indi mabusog sang ila ginatan-aw, kag ang aton mga dulonggan indi maayawan sang ila ginapamatian.
9 Ang natabo sang una matabo man liwat. Ang nahimo sang una pagahimuon liwat. Wala sing bag-o nga butang sa bug-os nga kalibutan.
10 Nagasiling sila, “Tan-awa, yari ang bag-o nga butang!” Indi ina matuod! Yara na ina sang una, sang wala pa kita matawo.
11 Wala sing may nagadumdom sang natabo sang nagliligad, kag sa mga adlaw nga palaabuton wala sing may magadumdom sang matabo sumogod karon kag sa sadto nga tion.

Ang Inagihan sang Manugwali

12 Ako, ang Manugwali, naghari sa bug-os nga Israel didto sa Jerusalem.
13 Nagpamat-od ako sa pag-usisa kag sa pagtuon sang tanan nga mga butang nga nagakatabo sa sining kalibutan. Ang Dios naghatag sa aton sing mapait nga kapalaran.
14 Nakita ko ang tanan nga ginahimo sa sini nga kalibutan, kag ginasilingan ko ikaw, nga ang tanan wala sing kapuslanan. Daw pareho lang nga nagalagas ikaw sang hangin.

Ginasilingan ko ikaw, nga ang tanan wala sing kapuslanan. (1:14)

15 Ang tiko indi mo mapatadlong kag indi mo maisip ang wala dira.
16 Nagsiling ako sa akon kaugalingon, “Nangindaku ako nga tawo kag labi pa kaalam sa bisan kay sin-o nga naggahom una sa akon sa Jerusalem. Nahibaluan ko kon ano gid ang kaalam kag ihibalo.”
17 Nagpamat-od ako sa paghibalo sang kinatuhay sang ihibalo kag kabuangan, kaalam kag pagkabuangboang. Pero akon natalupangdan nga daw pareho lang ini nga nagalagas ako sang hangin.
18 Kon nagadugang ang imo kaalam, nagadugang man ang imo palaligban. Kon nagadugang ang imo nahibaluan, nagadugang man ang imo kasakit.

Hulobaton 31 | Manugwali 2