☆☆☆
Ang Katahom ni Susana Nagbihag sang Duha ka mga Hukom
1 Didto sa Babilonia, may isa ka tawo nga ginahingalanan kay Joaquim2 nga nakapangasawa kay Susana nga anak ni Hilcias. Matahom ini si Susana kag matinuohon sa Dios.
3 Ang iya mga ginikanan mga Judio nga diosnon, kag ila gin-atipan ang ila anak kag ginpadaku sa pagpangabuhi suno sa Kasugoan ni Moises.
4 Manggaranon si Joaquim. May malapad kag matahom nga hardin sa palibot sang iya balay, kag sing masunson, ang iban nga mga Judio nagatalabuay didto sa ila pagsinapol tungod kay daku gid ang ila pagtahod kay Joaquim.
5-6 Ang tanan nga may mga panumbongon nagakadto man sa balay ni Joaquim sa diin ang duha ka hukom nagabista sining mga panumbongon. Ining duha ka mga hukom bag-o pa lamang sa ila palangakuan. Tuhoy sa ila nga duha, ang Ginoo nagsiling, “May kalautan sa Babilonia; ang mga hukom nakulangan sa ila paghatag sing pagtuytoy sa mga tawo.”
7 Kinabatasan ni Susana ang paglakatlakat sa hardin sa tagsa ka ugtong adlaw sa tapos makapauli ang tanan agod magpaniaga.
8 Ang duha ka hukom nabihag sang katahom ni Susana kag gani nagpaulihi sila sa pagpauli agod ila makita si Susana.
9 Daku gid ang kaluyag nila kay Susana nga sang ulihi nadulaan sila sing gana sa pagpangadi kag sa ila mga tulomanon subong mga hukom.
10 Ang tagsa sa ila naghandom kay Susana, pero wala nila ginpabutyag ang ila balatyagon sa isa kag isa
11 kay nahuya sila sa pagbaton nga mga maulagon sila.
12 Gani sa tagsa ka adlaw nagbantay sila sing mabinalak-on agod makita nila si Susana.
13 Sang isa ka adlaw, nagsilingay sila, “Tion na ini sa pagpaniaga; dali mapauli kita.”
14 Gani nagbulagay sila sa pagpauli, pero sa wala pa lamang madugay nagbalik sila agod magtan-aw kay Susana, kag sa dili hungod nagsugataay sila. Sa una nga kahigayunan nagsaysay sila kon ngaa didto pa sila, pero sang ulihi nagtuad ang isa kag isa sa ila natungod sa ila malaut nga handom kay Susana. Nagpamat-od sila sa paghulat sang tion nga makita nila sia nga nagaisahanon.
 |
| Nagbalik sila agod magtan-aw kay Susana. (1:14) |
Ang mga Hukom Nagganyat kay Susana
Sang isa ka adlaw, si Susana nga naupdan sang duha niya ka suloguon, nagkadto sa hardin suno sa iya kinabatasan. Wala na didto sing tawo luwas lamang sa duha ka mga hukom nga nagpanago sa pagbantay sa iya. Magin-ot yadto nga adlaw kag gani ginpakamaayo ni Susana ang pagpaligo. Iya ginsilingan ang iya mga suloguon, “Dalhi ninyo ako diri sang lana kag agwa para sa akon pagpaligo, kag siraduhi ninyo ang mga ganhaan agod nga indi ako matublag diri.”18 Dayon ginsirahan sang mga suloguon ang mayor nga mga ganhaan kag nag-agi sila sa isa ka diutay nga ganhaan sa pagkuha sang mga butang nga ginsugo sa ila ni Susana. Wala nila mamutiki ang duha ka lalaki.
19 Sang makahalin ang mga suloguon, ang duha ka mga hukom naggwa sa ila ginpanaguan kag nagdalagan padulong kay Susana
20 kag nagsiling sila, “Sirado ang mga ganhaan kag wala sing may makakita sa aton. Nagabalingaso kami sa pagpakighilawas sa imo, gani ihatag sa amon ang amon ginahandom.
21 Kon indi ka magpasugot, magakadto kami sa korte kag magasumpa nga nakita ka namon nga ginpapauli mo ang imo mga suloguon agod nga mag-isahanon ka upod sa isa ka pamatan-on.”
22 Naghibubon-ot si Susana kag nagsiling, “Wala ako sing pasingadtuan. Kon magpasugot ako sa inyo sarang ako mapapatay tungod sa sala nga adulteryo. Kon indi ako magpasugot, inyo ako gihapon maangkon.
23 Pero mas maayo nga indi ako magpasugot maskin maangkon ninyo ako sang sa magpakasala ako batok sa Ginoo.”
24 Dayon nagsinggit sia sa mabaskog nga tingog kag ang duha ka mga hukom nagsinggit man sang mga panumbongon batok sa iya
25 samtang ang isa sa ila nagdalagan sa pagbukas sang mga ganhaan.
26 Sang pagkabati sang mga suloguon sa balay sang singgit, gilayon nga nagdalagan sila sa hardin paagi sa likod nayon nga ganhaan agod ila masayasat kon ano ang natabo kay Susana.
27 Ang mga hukom nagsaysay sang ila istorya kag ang mga suloguon nakibot kag nagbatyag sing kahuya. Ina nga mga butang wala gid natabo batok kay Susana.
Ang mga Hukom Nagpanaksi Batok kay Susana
28 Sang madason nga adlaw sa tapos nga makatipon ang mga tawo sa balay ni Joaquim, nag-abot ang duha ka mga hukom nga nagpamat-od sing lubos sa pagdangat sang ila malaut nga tinutuyo sa pagpapatay kay Susana.29 Sa atubangan sang tanan, nagsiling sila, “Pakadtoa diri si Susana nga anak ni Hilcias kag asawa ni Joaquim.”
30 Sang mag-abot si Susana, kaupod niya ang iya mga ginikanan, kabataan kag ang tanan niya nga mga kaparyentihan.
31 Matahom kag makailila gid kaayo si Susana
32 sa bagay nga ang duha ka malaut nga mga hukom nagmando nga kuhaon ang tabon sang iya guya agod nga magkalipay sila sa pagtan-aw sa iya.
33 Naghibi ang mga ginikanan ni Susana kag ang tanan nga yadto didto.
34 Dayon nagtindog ang duha ka hukom sa atubangan sang mga tawo, gintungtong nila ang ila mga kamut sa ulo ni Susana kag nagpamuno sa ila mga manumbongon batok sa iya.
35 Naghibi si Susana pero nagtangla sia sa langit tungod kay nagsalig sia sa Ginoo.
36 Ang duha ka mga hukom naghatag sining panaksihon: “Nagalakat kami sa hardin sang magsulod ini nga babayi kaupod ang duha niya ka mga suloguon. Ginsiraduhan niya ang mayor nga ganhaan kag iya ginmandoan ang iya mga suloguon sa pagpauli.
37 Dayon ang pamatan-on nga nagapanago sa hardin nagkadto sa iya kag naghulid sila nga duha.
38 Sa pamusod kami sang hardin, kag sang makita namon ang nagakatabo, nagdalagan kami padulong sa ila
39 kag nadakpan gid namon sa ila. Gindakop namon ang pamatan-on, pero makusog sia sang sa amon. Nagdalagan sia kag gin-abrihan ang ganhaan kag nagpalagyo,
40 pero amon ginhawiran ini nga babayi. Ginpamangkot namon sia kon sin-o yadtong lalaki pero indi sia manugid. Nagasumpa kami nga matuod ang amon panaksihon.”
41 Tungod kay ang duha dili lamang mga lider sang komunidad kundi subong man mga hukom, ang mga tawo nagpati sa ila istorya kag ginpamatbatan nila nga patyon si Susana.
Si Daniel Nagluwas kay Susana
42 Dayon si Susana nagsinggit sa mabaskog nga tingog, “O walay katapusan nga Dios, wala sing sarang matago sa imo; imo nahibaluan ang tanan sa wala pa ini matabo.43 Yari ako nga palatyon, pero ikaw nakahibalo nga wala ako sing sala, nga ining mga tawo nagabinutig. Ngaa bala nga kinahanglan patyon ako?”
44 Nabatian sang Ginoo ang pangamuyo ni Susana
45 kag ginpadala niya ang pamatan-on nga si Daniel sa paghambal samtang nga ginadala si Susana agod patyon.
46 Nagsinggit si Daniel, “Wala ako sing labot sa kamatayon sina nga babayi.”
47 Nagbalikid ang tanan sa pagtulok sa iya kag nagpamangkot sila, “Ano ang buot mo silingon?”
48 Nagtindog si Daniel sa atubangan nila kag nagsiling, “Mga tawo sang Israel, ano mga buang kamo? Ginpanginmalaut ninyo ining Israelinhon nga babayi tungod lamang sa panaksihon nga subong sina? Wala gani ninyo gintinguhai ang pagtukib sang kamatuoran.
49 Bistahon liwat ini nga kaso. Ining mga tawo naghatag sang bulig nga panaksihon.”
50 Gani ang tanan nga mga tawo nagbalik sa duog sa diin ginhiwat ang pagbista kag ang mga opisyal nagsiling kay Daniel, “Ang Dios naghatag sa imo sang kaalam nga labaw sa masarangan sang imo edad, gani kari ka sa pag-upod sa amon kag isaysay sa amon ang luyag mo isiling.”
51 Si Daniel nagsiling sa ila, “Separaha ninyo ang duha ka mga hukom kay usisaon ko sila sing tag-isaisa.”
52 Dayon si Daniel nagtawag sang nahauna nga hukom kag nagsiling, “Ikaw malaut nga tigulang, karon pagasabton mo ang tanan nga mga sala nga imo nabuhat.
53 Nagpamatbat ka sang wala nagakaigo nga mga paghukom. Imo ginsilutan ang mga wala sing sala kag ginhilway mo ang mga may sala walay sapayan nga ang Ginoo nagsiling, ‘Indi pag-ipapatay ang mga inosente.’
54 Karon kon imo nakita sing matuod ang paghulid sang duha, isugid sa akon kon sa idalom sang ano nga kahoy sila nagbuhat sini?” Ang hukom nagsabat, “Sa idalom sang kahoy nga ang duga ginabuhat nga goma.”
55 Si Daniel nagsiling, “Maayo! Ina nga pagbinutig pagabayaran sang imo kabuhi. Ang anghel sang Ginoo namanduan na sa pagpihak sa imo.”
56 Dayon ginpalayo ang nahauna nga hukom kag gindala ang ikaduha sa atubangan ni Daniel. Si Daniel naghambal sa hukom, “Ikaw daw taga-Canaan ka kag indi taga-Judea. Ang katahom sining babayi nagpadulom sang imo paghukom, kag ang kaibog nga lawasnon nagpagarok sang imo panghunahona.
57 Natuman mo ang imo mga handom sa mga babayi sang Israel tungod kay nahadlok sila sa imo, pero yari karon ang babayi sang Juda nga wala nagpasugot sa imo.
58 Karon, isugid sa akon kon sa idalom sang ano nga kahoy sila naghulid.” Nagsabat sia, “Sa idalom sang isa ka daku nga akasya.”
59 Si Daniel nagsiling, “Maayo! Ang imo pagbinutig pagabayaran sang imo kabuhi. Ang anghel sang Ginoo nagahulat nga nagauyat sang espada sa pagpihak sa imo. Dayon madula kamo nga duha.”
60 Dayon ang tanan nagsinggit kag nagdayaw sa Dios nga nagluwas sa yadtong nagasalig sa iya.
61 Naakig sila batok sa duha ka mga hukom kay ginpamatud-an ni Daniel nga nagbutig sila sa idalom sang pagsumpa.
62 Ang Kasugoan ni Moises nagasiling nga ang tawo nga nagahatag sang binutig nga panaksihon magabaton sang silot nga ginpamatbat sa tawo nga ginsumbong. Gani ang duha ka hukom ginpapatay kag naluwas ang kabuhi sang babayi nga wala sing sala.
63 Ang mga ginikanan, bana kag tanan nga kaparyentihan ni Susana nagdayaw sa Dios tungod kay napamatud-an nga binutig ang mga sumbong batok sa iya.
64 Kutob sadto nga adlaw, si Daniel ginhangad sang mga tawo sing labi.
No comments:
Post a Comment