Sirac 1

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51

☆☆☆

Ang Panguna nga mga Pulong

Madamo nga makatilingala nga mga bugay ang ginhatag paagi sa Kasugoan kag sa mga Propeta, kag sa iban nga nagsunod sa ila, isa ka pagtudlo sa kaalam, nga tungod sini kinahanglan dayawon gid ang Israel. Pero indi lamang tuman nga ang nagabasa sang mga kasulatan makahangop sini; kinahanglan ang mga nakatuon sini makabulig man sa iban nga mga tawo paagi sa ila ginahambal ukon ginasulat. Gani, tungod sini ang akon lolo nga si Jesus, sa tapos sia makahinguyang sing malawig nga pagtuon sang Kasugoan kag sang mga Propeta kag sang iban nga mga libro sang aton mga katigulangan kag sa tapos sia makahibalo sini nga mga butang, indi sia makapugong sang iya kaugalingon kundi nagsulat sang mga butang nga makahatag sing pagtulon-an kag kaalam, agod nga ang mga maluyagon sa pagtuon kag ang may katungdanan sa pagsunod gid sini nga mga butang magauswag sa ila pagkabuhi suno sa kasugoan.
Gani ginapangabay kamo sa pagbasa sini nga libro nga may maayo nga kabubot-on kag pagtalupangod kag sa pagpakita sang inyo pagkamahinangpanon sa mga bahin sa diin sa tapos namon mahimo ang amon masarangan sa pagbadbad, wala pa namon mahatag ang husto nga kahulogan sang amo nga mga dinalan; ang matuod nga indi ka gid makahatag sang amo gid nga kahulogan sang nasulat sa Hebreo kon ibadbad mo ini sa iban nga linggwahe, indi lamang amo ini, kon usisaon mo sing maayo, masapwan mo nga ang Kasugoan, ang mga Propeta kag ang iban nga mga libro may kinatuhay na sa pagbadbad, sang sa buot silingon sa nahauna nga pagsulat.
Sang pag-abot ko sa Egipto sa ika-38 ka tuig sang paggahom ni Haring Eurgetes kag makatener didto, nakakita ako sing tumalagsahon nga kahigayunan sa pagtuon. Naghunahona ako nga kinahanglan gid ang paghinguyang sing kusog kag kabudlay sa pagbadbad sini nga libro. Sugod sadto naghinguyang ako sang madamo nga panahon sa pagtuon sini, sa pagtapos sang amo nga obra agod ini mabasa para sa kaayohan labi na gid sang mga nagapuyo sa iban nga mga pungsod, nga luyag mag-angkon sing kaalam paagi sa pagkabuhi suno sa kasugoan.

Sa Pagdayaw sang Kaalam

1 Ang tanan nga kaalam nagagikan sa Ginoo, kag iya ini sa walay katapusan.
2 Sin-o bala ang makaisip sang balas sa baybay, sang mga tinulo sang ulan, kag sang mga inadlaw sang walay katapusan nga panahon?
3 Sin-o bala ang makatakos sang kataason sang langit, sang kasangkaron sang kalibutan, kag sang kadalumon sang kadadalman?
4 Ang kaalam una sa tanan nga tinuga nga mga butang; ang maalam nga paghangop yara na halin sa ginsugoran.
6 Sa kay sin-o bala ginpahayag ang gamot sang Kaalam? Sin-o bala ang makahibalo sang iya panghunahona kag pagahimuon?
8 lsa lamang ang maalam, ang Ginoo, kag makakulogmat sia nga nagalingkod sa iya trono.
9 Sia amo ang nagtuga sang Kaalam, nag-usisa kag nagtakos sini kag nag-ula sini sa tanan niya nga mga binuhatan.
10 Sa tanan nga mga katawuhan naghatag sia sing kinaalam bilang regalo. Kag sa mga nagahigugma sa iya naghatag sia sini sing bugana.
11 Ang pagtahod sa Ginoo nagadala sing kadungganan kag bugal, kag pagkamasinadyahon kag korona sang pagkamalipayon.
12 Ang pagtahod sa Ginoo nagapasadya sang tagipusoon; nagadala ini sing kasadya; kalipay, kag malawig nga kabuhi.
13 Ang nagatahod sa Ginoo magauswag sa ulihi; pagabendisyunan sia sa adlaw sang iya kamatayon.
14 Ang sadsaran sang Kaalam amo ang pagtahod sa Ginoo; gintuga ini upod sa mga masaligan sa tiyan sang ila iloy;
15 naghimo sia sing puloy-an sa tunga sang mga tawo, isa ka sadsaran halin sang una, kag manginmatutom sa ila mga kaliwat.
16 Ang pagtahod sa Ginoo amo ang kahimpitan sang Kaalam; ginapagustohan niya sila sang iya bugana nga mga bunga.
17 Ginapuno niya ang ila puloy-an sang tanan nga ginahandom sang ila tagipusoon, kag ang ila mga talaguan sang iya patubas.
18 Ang pagtahod sa Ginoo amo ang korona sang Kaalam, nga nagapauswag sang paghidait kag sang maayong lawas.
19 Ang Ginoo nagapadungog kag nagapakamahal sa iya, ginhatag sa iya sing bugana ang kaalam kag paghangop kag nagapadungog sing labi sa mga nagaangkon sa iya.
20 Ang pagtahod sa Ginoo amo ang gamot sang Kaalam, kag ang iya mga sanga amo ang malawig nga kabuhi.

Ang Pagpugong sang Kaugalingon

22 Ang kaakig sang malauton nga tawo indi makapakamatarong sa iya, kay ang kabug-at sang iya kaakig amo ang iya pagkapukan.
23 Ang mapailubon nga tawo nagapugong sang iya kaugalingon, tubtob mag-abot ang nagakaigo nga tion, kag sa ulihi magaabot naman ang iya kalipay;
24 ginapunggan niya ang iya mga pulong tubtob mag-abot ang nagakaigo nga tion, kag ang kaalam sang iya nagakaigo nga pagsugid pagahambalan sang tanan.

Ang Kaalam kag ang Pagtahod sa Dios

25 Sa talaguan sang Kaalam may maayo nga hulobaton pero ang pagtahod sa Dios ginakangil-aran sang makasasala.
26 Kon nagahandom ka sang Kaalam, tumana ang mga sugo, kag ang Ginoo magahatag sini sa imo sing bugana.
27 Kag ang Kaalam kag ang pagtudlo nagakahulogan sang pagtahod sa Ginoo ang pagkatutom kag ang kalulo amo ang iya naluyagan.
28 Indi pagkalimti ang pagtahod sa Ginoo. Magpalapit sa iya mga may pagkasinsero.
29 Indi ka magsalimpapaw sa atubang sang mga tawo; andami ang imo ginahambal.
30 Indi ka magpabugal, basi ikaw mapukan, kag mahuy-an ang imo kaugalingon, kay ang Ginoo magabuyagyag sang imo mga tinago, kag pakahuy-an niya ikaw sa atubangan sang bug-os nga katilingban, ini tungod kay wala ikaw magtahod sa Ginoo; kay ang imo tagipusoon puno sang paglimbong.

Kaalam ni Salomon 19 | Sirac 2