☆☆☆
Si Alejandro nga Bantog
1 Si Alejandro nga taga-Macedonia, nga anak ni Felipe, nag-abot halin sa duta sang Kittim, kag ginlutos niya si Dario, ang hari sang mga taga-Persia kag taga-Media, nga iya ginbuslan sa pagkahari. Sa wala pa sini, hari na sia sang Grecia.2 Sa madamo niya nga mga pagpangubat, naagaw niya ang mga banwa nga napamakuran sing mga pader, napamatay niya ang mga hari.
3 Naglambot sia sa malayo nga mga kadutaan, kag ginsalakay ang madamo nga mga pungsod. Ang bug-os nga duta naghipos sa atubangan niya kag nagpabugal sia sing tama gid.
4 Nagtipon sia sing tama kabakod nga mga hangaway kag nagpangdaog sia sing mga kadutaan, mga kapungsoran, kag mga ginharian, kag ini sila nagbayad sing buhis sa iya.
5 Pero nag-abot ang tion nga si Alejandro nagmasakit, kag nahibal-an niya nga mapatay sia.
6 Ginpatawag niya ang iya mataas nga mga opisyal nga mga katubotubo niya, kag ginpartida niya sa ila ang iya ginharian samtang buhi pa sia.
7 Sa tapos sang dose ka tuig nga paghari ni Alejandro, napatay sia.
8 Dayon ang tagsatagsa sang iya mga opisyales naggahom sa iya kaugalingon nga duog nga ginparti sa iya.
9 Tanan sila nanginhari sang mapatay sia, kag ang ila mga kaliwat nagbulos sa ila sa sulod sang madamo nga mga tinuig nga nagdala sang mga kalautan sa kalibutan.
Si Antioco Epifanes kag ang mga Judio nga Nagalapas sang Kasugoan
(2 Mac. 4:7:17)
10 Halin sa sini naggwa ang malaut nga kaliwat, si Antioco Epifanes nga anak ni Haring Antioco. Sang una isa sia ka bihag sa Roma. Nanginhari sia sang ika-137 ka tuig sa ginharian sang mga Griego.11 Sadto nga panahon may mga tawo sa Israel nga nagalapas sang kasugoan, kag ila ginpatalang ang madamo nga mga tawo. Nagsiling sila, “Dali kamo, mahimo kita sing kasugtanan sa mga Gentil sa palibot naton, kay halin sang aton pagbulag sa ila, madamo nga mga kalautan ang nag-abot sa aton.”
12 Nalipay sila sini nga plano,
13 kag ang iban nga mga tawo may kakunyag nga nagkadto sa hari. Gintugotan niya sila sa pagsunod sang mga ginahimo sang mga Gentil.
14 Gani nagpatindog sila sing estadyom sa Jerusalem pareho sang iya sang mga Gentil.
15 Ginkuha nila ang mga tanda sang pagkatinuli kag ginsikway nila ang balaan nga kasugtanan. Nagpaidalom sila sa paggahom sang mga Gentil, kag nagapasugot sila nga mangin-ulipon sang mga di-diosnon.
Gingubat ni Antioco ang Egipto
16 Sang pagkahibalo ni Antioco nga ang iya ginharian malig-on na, nagpamat-od sia nga manginhari sang Egipto, kag maggahom sa duha ka ginharian.17 Gingubat niya ang Egipto nga may dala nga mabakod nga mga hangaway, nga may mga karuwahi, kag mga elepante, kag madamo nga mga sakayan.
18 Nagpakig-away sia batok kay Tolemeo nga hari sang Egipto, kag nagpalagyo si Tolemeo sang nagaabanse sia, kag madamo ang nagkalamatay sa mga tinawo ni Tolemeo.
19 Naagaw ang mga siyudad nga napamakuran sa duta sang Egipto, kag gin-ati ni Antioco ang amo nga pungsod.
Ginhingabot ni Antioco ang mga Judio
20 Sa tapos niya maagaw ang Egipto sang tuig 143, nagbalik si Antioco kag gingubat niya ang Israel kag ang Jerusalem nga may dala nga mabakod nga mga hangaway.21 Sa daku nga bugal nagsulod sia sa Templo kag ginkuha niya ang altar nga bulawan, ang kandelirohan lakip ang tanan niya nga mga gamit.
22 Ginkuha man niya ang lamisa para sa tinapay nga nahalad, ang mga kupa para sa mga halad nga ilimnon, ang mga yahong, ang mga insensaryo mga bulawan, ang kurtina, ang mga korona, kag ang mga puni nga bulawan sa atubangan sang Templo. Ini tanan ginpanguha niya.
23 Ginpanguha niya ang mga pilak kag bulawan, ang malahalon nga mga gamit. Ginkuha man niya ang tinago nga mga manggad nga iya nakita.
24 Sa tapos niya makuha ini tanan nagpauli sia sa iya kaugalingon nga duta nga ginbayaan ang duog nga daw inukay kag nagpabugal sing tama gid.
25 Tungod sini may daku nga paglalaw para sa Israel sa bug-os nga pungsod:
26 Ang mga pangulo kag mga katigulangan nagaugayong; ang mga dalaga kag mga soltero nagapangalisod; ang katahom sang mga babayi nadula;
27 ang mga nobyo nagpanalabiton, ang mga nobya naglalaw sa ila katre.
28 Ang duta nagkurog tungod sang iya mga pumoluyo. Kag ang bug-os nga panimalay ni Jacob naputos sing kahuya.
29 Naglakat ang mga inadlaw, kag sang makaligad ang duha ka tuig, ang hari nagpadala sa mga siyudad sang Juda sang isa ka pangulo nga manugsukot sing buhis. Nag-abot sia sa Jerusalem nga may dala nga madamo nga mga hangaway.
30 Naghambal sia sa ila sang daw mainabyanon nga mga pulong, kag nagsalig sila sa iya. Pero sa hinali lang ginsalakay niya ang siyudad. Ginhalitan niya sing di-hamak ang siyudad kag ginpamatay ang madamo nga mga Israelinhon.
31 Gin-ati niya ang siyudad kag ginsunog ini, ginpangguba niya ang mga balay kag ang mga pader sa palibot sini.
32 Ginbihag niya ang mga kababayin-an kag mga kabataan, kag ginpanguha niya ang mga kahayupan.
33 Dayon ginpamakuran nila ang siyudad ni David paagi sa pagpatindog sing mabakod nga pader kag mga tore kag ginhimo nila ini nga palalipdan.
34 Didto nagbutang sila sing mga hangaway nga mga makasasala, mga maluib nga nagpamutang sing mga pamakod agod indi sila maano sa sulod sini.
35 Nagtipon sila sing mga armas kag kalan-on, kag didto nila gintago ang mga naagaw nila sa Jerusalem, kag nanginmakatalagam sila.
36 Nanginkatalagman sila para sa Templo, isa ka malaut nga kaaway sang Israel sa tanan nga tion.
37 Nagapamatay sila sang mga wala sing sala sa bug-os nga palibot sang Templo kag gindagtaan ang Templo mismo.
38 Ang mga pumoluyo sang Jerusalem nagpalagyo tungod sa ila; nanginpuloy-an sia sang mga dumoluong; nangindumoluong sia sa iya mga kaliwat, kag ang iya mga kabataan nagsikway sa iya.
39 Ang iya Templo nanginmamingaw subong sang isa ka desierto, ang iya mga piesta ginbayluhan sing paglalaw, ang iya mga Inugpahuway nangintalamayon, ang iya kadungganan nanginkahuloy-an.
40 Ang iya kahuloy-an karon, nanginkaangay sang iya himaya anay, ang iya pagkagamhanan ginbayluhan sing kasubo.
41-43 Dayon ang hari naghimo sang isa ka kasugoan sa bug-os niya nga ginharian nga ang tanan nga mga sakop niya maghiliugyon, kag ang tagsatagsa magsikway sang iya kaugalingon nga pagginawi. Ang tanan nga mga pagano nagtuman sang mando sang hari. Madamo sang mga Israelinhon ang nagbaton sang iya pagtuloohan. Nagdulot sila sing mga halad sa mga diosdios kag wala ginapakabalaan ang mga Inugpahuway.
44 Ang hari nagpadala sing sulat paagi sa mga mensahero pakadto sa Jerusalem kag sa mga banwa sang Juda. Ginmanduan niya sila sa pagsunod sang mga pagginawi nga indi suno sa pagginawi sang pungsod.
45 Gindumilian niya sila sa pagdulot sang mga halad nga sinunog, sang mga halad, kag mga halad nga ilimnon sa Templo, kag wala ginapakabalaan ang mga Inugpahuway kag mga piesta.
46 Nagadagta sang Templo kag sang mga pari,
47 ang pagpatindog sing mga altar kag balaan nga mga duog para sa mga diosdios magahalad sang baboy kag mahigko nga mga sapat,
48 kag wala nila ginapatuli ang ila mga anak nga lalaki kag ginadagtaan nila ang ila kaugalingon sang tanan nga sahi sang kahigkoan kag kangil-aran,
49 agod malipatan nila ang Kasugoan kag indi pagpadayunon ang pagtuman sini.
50 Ang bisan sin-o nga indi magtuman sang kasugoan sang hari pagapatyon.
51 Nagsulat ang hari kaangay sini sa iya bug-os nga ginharian, kag nagpili sia sing mga salaligan para sa tanan nga mga tawo kag nagsugo sa tanan nga mga banwa sang Juda sa pagdulot sing mga halad sa tagsa ka banwa.
52 Madamo sang mga tawo nga nagsikway sang kasugoan ang nagbuylog sa ila kag naghimo sing mga kalautan sa bug-os nga duta,
53 nga nagtulod sa Israel sa pagpanago sa bisan diin nga duog nga ila sarang mapanaguan.
54 Sa ika-15 nga adlaw sang bulan sang Kisleb sang tuig-145, ang hari nagpatindog sing Makakulogmat nga Kangil-aran sa ibabaw sang altar, kag sa palibot nga mga banwa sang Juda nagpatindog sila sing mga altar.
55 Kag nagsunog man sila sing insyenso sa mga puwertahan sang mga kabalayan kag sa mga kalsada.
56 Ang bisan ano nga libro sang kasugoan nga ila makita, ginagisi nila kag ginasunog.
57 Ang bisan sin-o nga madakpan nga may libro sang kasugtanan kag nagatuman sang kasugoan, ginsilotan sang kamatayon sa mando sang hari.
58 Gani gingamit nila ang ila gahom batok sa Israel, batok sa mga nadakpan kada bulan sa mga banwa.
59 Sa ika-25 nga adlaw sang bulan naghalad sila sa altar nga ginpatindog sa ibabaw sang altar nga ginasunogan.
60 Ang mga iloy nga nagpatuli sang ila mga anak ginpamatay sa pagtuman sang sugo sang hari,
61 lakip ang mga lapsag nga ila ginakugos, ang ila man mga panimalay, kag ang mga nagtuli sa ila ginpamatay.
62 Pero madamo sa Israel ang nagtapat kag nagpamat-od sa ila tagipusoon nga indi magkaon sang bisan ano nga butang nga mahigko.
63 Ginpili nila nga mapatay sang sa madagtaan sang mahigko nga kalan-on ukon ang pagdagta sang balaan nga kasugtanan, kag ginpamatay sila.
64 Isa ka daku nga pagsilot ang nag-abot sa Israel.
No comments:
Post a Comment