Baruc 1

1  2  3  4  5

☆☆☆

1 Ini nga libro ginsulat ni Baruc nga anak ni Nerias, apo ni Maseya kag gikan sa kabikahan ni Sedequias, Hasadias kag Hilcias. Ginsulat ini didto sa Babilonia,
2 sa ikapito nga adlaw sang bulan sa ikalima nga tuig sa tapos nga ang Jerusalem nakuha kag ginsunog sang mga taga-Babilonia.
3-4 Ginbasa sing matunog ni Baruc ini nga libro sa kay Joaquin nga anak ni Joaquim nga hari sang Juda, kag subong man sa tanan nga mga nagapuyo sa Babilonia sa ubay sang Suba sang Sud. Ang tanan nga sari sang tawo sa bisan ano ang kahimtangan sa pangabuhi, mga dungganon, mga kabataan sang mga harianon nga panimalay, kag mga katigulangan nagpamati samtang ginabasa ini nga libro.

Ginbasa sing matunog ni Baruc ini nga libro. (1:3)

5 Sang mabasa ang libro, ang tanan naghibi, nagpuasa kag nagpangamuyo sa Ginoo.
6 Dayon ang tagsatagsa naglimos sa ila masarangan
7 kag ang kuwarta ginpadala sa Jerusalem kag ginhatag kay Joaquim, ang Pinakamataas nga Pari, anak ni Hilcias kag apo ni Salum. Ang iban nga kuwarta ginhatag sa mga tawo nga upod ni Joaquim sa Jerusalem.
8 Sa ikapito nga adlaw sang bulan sang Sivan ginpadala ni Baruc ang balaan nga mga galamiton nga ginkuha gikan sa Templo kag ginbalik niya ini sa Juda. Ini nga mga galamiton nahuman sa plata nga ginbuhat ni Sedequias nga anak ni Haring Josias
9 sa tapos nga ginpalayas ni Hari Nabucodonosor si Joaquim nga pangulo, mga panday, mga dungganon, kag mga timawa nga iya gindala sa Babilonia gikan sa Jerusalem.

Ang Sulat Pakadto sa Jerusalem

10 Ang mga tawo nagsulat: Palihog gamita ang kuwarta nga amon ginapadala sa imo sa pagbakal sang mga kasapatan nga para sa halad nga sinunog kag sa halad para sa mga sala; ibakal man ini sang insyenso kag sang mga halad nga kalan-on. Ihalad ini sa altar sang Ginoo nga amon Dios,
11 kag ipangamuyo nga maglawig ang kabuhi ni Haring Nabucodonosor sang Babilonia kag sang iya anak nga si Belsasar.
12 Sa sini ang Ginoo mapalig-on kag magatuytoy sa amon. Si Nabucodonosor kag ang iya anak nga si Belsasar magaapin sa amon kag magaunong kami sa ila tubtob kami buhi; dayon ila kami mahamut-an.
13 Nagapangabay man kami nga imo kami ipangamuyo sa Ginoong Dios tungod kay nakasala kami batok sa iya, kag sa subong nagakaakig pa sia gihapon sa amon.
14 Palihog basaha ining libro nga amon ginapadala sa imo kag maghimo ka sang imo pagkilala sang imo kaugalingon nga sala sa Templo sa nahauna nga adlaw sang Piesta sang mga Tolda kag sa iban nga balaan nga mga adlaw sang pagtilipon.

Ang Pagkilala sa Sala

15 Amo ini ang pagkilala nga inyo pagabuhaton: “Ang Ginoo nga amon Dios matarong, pero nalikupan, pa kami gihapon sang huya. Kami tanan nga mga taga-Juda, mga taga-Jerusalem,
16 ang amon mga hari, mga pangulo, mga pari, mga propeta kag ang amon mga katigulangan ginpakahuy-an
17 tungod kay nakasala kami batok sa Ginoo nga amon Dios,
18 kag naglalis sa iya. Wala kami nagpamati sa iya kag nagpangabuhi suno sa iya mga sugo.
19 Halin sadtong pagpaggwa sang Ginoo sang amon mga katigulangan gikan sa Egipto tubtob karon, padayon ang amon paglalis sa iya kag wala gid kami nagpangduhaduha sa pagpakasala batok sa iya.
20 Sadto pa nga daan, sang pagpaggwa sang Ginoo sang amon katigulangan gikan sa Egipto, agod ihatag sa amon ang maayo kag mapatubason nga duta, iya karon nga ginpanghimalaut kami paagi sa iya alagad nga si Moises. Kag karon nagaantos kami tungod sadto nga mga panghimalaut.
21 Wala namon gintuman ang mga ginhambal sang Ginoo nga amon Dios nga iya ginpahayag paagi sa mga propeta. Sa baylo amon gintuman ang amon naluyagan kag nagpadayon sa amon malain nga mga buhat. Nagpakibulig kami sa amon mga diosdios kag nagbuhat sang mga ginkangil-aran sang Ginoo.

Sirac 51| Baruc 2