☆☆☆
Ang Pangamuyo ni Asarias
1 Ang tatlo ka mga pamatan-on nga sanday Hananias, Misael kag Asarias nagpamuno sa paglakat palibot sa mga dabdab samtang nagaamba sila sang pagdayaw sa Ginoong Dios.
2 Nagpundo si Asarias kag sa mabaskog nga tingog nagpangamuyo sia sa tunga sang kalayo:
3 “O Ginoo nga Dios sang amon mga katigulangan, nagadayaw kag nagahimaya kami sa imo; kabay nga tahuron ang imo ngalan sa walay katapusan.
4 Gintratar mo kami suno sa nagakabagay sa amon. Matarong ikaw sa tanan nga imo ginbuhat sa amon, kag sa imo paghukom wala ikaw sing pinilian.
5 Nagakabagay ang imo ginbuhat sang ginlaglag mo ang Jerusalem, ang balaan nga siyudad sang amon mga katigulangan. Angay sa amon yadto nga paghukom tungod sang amon mga sala.
6 Nagmalalison kami batok sa imo; nagtalikod kami sa imo kag salabton namon ang tagsa ka sala.
7 Wala namon gintuman ang mga butang nga imo ginsugo sa amon. Kon gintuman namon ang imo mga kasugoan, kuntani nagmainuswagon kami,
8 pero karon angay sa amon ang imo paghukom kag silot nga ginpadala sa amon.
9 Ginpabayaan mo kami sa kamot sang amon mabinatuon, maakigon kag malalison nga mga kaaway—sa pinakalaut nga hari sa kalibutan.
10 Kag karon, nahuy-an kami tanan nga nagasimba sa imo kag nahuya gani kami sa paghambal.
11 “Pero tungod na lamang sang imo kadungganan, indi pagsikwaya ang imo saad sa amon kag indi kami pagpabayai sing dayon.
12 Ihulog sa amon ang imo kaluoy. Dumdoma ang imo saad kay Abraham nga imo pinalangga, kay Isaac nga imo alagad, kag kay Jacob nga amay sang imo balaan nga mga tawo nga Israel.
13 Ginsaad mo sa ila nga hatagan mo sila sing kaliwatan nga madamo kasubong sang mga bituon sa kalangitan ukon kasubong sang mga balas sa higad sang baybayon.
14 Pero sa karon, Ginoo, kami ang pinakadiutay nga pungsod; bisan sa diin kami, nagakabuhi kami sa kahuloy-an tungod sang amon mga sala.
15 Yari kami nga wala sing hari, wala sing mga manalagna, ukon mga pangulo. Wala na sing Templo sa diin sarang kami makahalad sang sinunog nga mga dulot, mga halad, mga dulot kag insyenso. Wala na sing lugar sa diin sarang kami makadulot sa imo kag makakita sang imo kaluoy.
16 Pero sa tagipusoon nga mahinulsolon kag sa mapainuboson nga balatyagon nagapalapit kami sa imo sa pagpakiluoy nga imo kami batunon kasubong sang daw nagadulot sa imo sang mga halad nga sinunog nga mga karnero, baka nga mga toro kag linibo nga matambok nga mga karnero.
17 Batona ang amon paghinulsol subong tanda sang amon karon mga halad agod nga amon ikaw matuman sa bug-os namon nga tagipusoon. Ang mga nagasalig sa imo indi nga mas-a mapaslawan.
18-19 Sa karon, sa bug-os namon nga tagipusoon, nagasaad kami sa pagtuman sa imo, sa pagsimba kag sa pagpangamuyo sa imo. Kaluoyi kami kag indi na kami pagpakahuy-i.
20 O Ginoo, luwasa kami paagi sa bisan isa sang imo milagro; padunggi ang imo ngalan.
21 “Pakahuy-i ang tanan nga nagahalit sa amon. Kuhaa ang ila daku nga gahom kag lutosa ang ila kabakod.
22 Ipakilala sa ila nga ikaw lamang ang Ginoo kag Dios nga nagagahom nga may awtoridad sa bug-os nga kalibutan.”
23 Ang mga suloguon sang hari nga nagsulod sang tatlo ka pamatan-on sa hornohan nagpadayon sa pagpainit pa gid sang hornohan paagi sa pagbutang sang lana, alkitran, madali makudtan nga mga kahoy kag mga kagingking.
24 Ang dabdab nag-ibwal sa kataason nga 75 ka tapak
25 tubtob nga naglapta ini sa palibot kag nagsunog sa mga taga-Babilonia nga nagatindog malapit sa hornohan.
26 Pero ang anghel sang Ginoo nagpanaog sa kalayo sa diin nahamtang ang mga pamatan-on. Iya ginwahig ang mga dabdab
27 agod nga magluntad ang kabugnaw nga daw ang malamig nga dupoydupoy naghuyop, kag ang kalayo wala makatandog sa paghalit sa tatlo ka mga pamatan-on.
Ang Ambahanon sang Tatlo ka mga Pamatan-on
28 Didto sa sulod sang hornohan, ang tatlo ka mga pamatan-on dulongan nga nag-amba liwat sang pagdayaw sa Dios sining masunod:
29 “Ginadayaw namon ikaw, O Ginoo, ang Dios sang amon mga katigulangan.
30 Kabay unta nga ang imo mahimayaon kag balaan nga ngalan tahuron kag pakamahalon sa walay katubtoban.
31 Kabay unta nga ang mga ambahonon pagaambahon sa imo himaya sa walay katapusan, kag ang imo balaan nga presensya pagahimayaon sa templo,
32 sa diin nagalingkod ikaw sa langitnon nimo nga trono sa ibabaw sang mga anghel kag nagatulok ikaw sa kalibutan sang mga patay. Kabay unta nga pagahimayaon ikaw kag pagatahuron sa gihapon.
33 Kabay unta nga pagahimayaon ikaw samtang nagalingkod ikaw sa imo harianon nga trono. Kabay unta nga ang mga ambahonon pagaambahon sa imo himaya sa walay katapusan.
34 Kabay unta nga himayaon ikaw sa arko sang mga langit. Kabay unta nga ang mga ambahonon pagaambahon sa imo himaya sa walay katapusan.
35 “Tanan nga mga tinuga, himayaa ang Ginoo, ambaha ang iya pagdayaw kag tahura sia sa walay katapusan.
36 Mga kalangitan, himayaa ang Ginoo, ambaha ang iya pagdayaw kag tahura sia sa walay katapusan.
37 Tanan nga mga anghel sang Ginoo, himayaa ang Ginoo, ambaha ang iya pagdayaw kag tahura sia sa walay katapusan.
38 Mga tubig sa ibabaw sang kalangitan, himayaa ang Ginoo, ambaha ang iya pagdayaw kag tahura sia sa walay katapusan.
39 Tanan nga mga langitnon nga gahom, himayaa ang Ginoo, ambaha ang iya pagdayaw kag tahura sia sa walay katapusan.
40 Adlaw kag bitoon, himayaa ang Ginoo, ambaha ang iya pagdayaw kag tahura sia sa walay katapusan.
41 Mga kabitoonan sa langit, himayaa ang Ginoo, ambaha ang iya pagdayaw kag tahura sia sa walay katapusan.
42 Ulan kag tun-og, himayaa ang Ginoo, ambaha ang iya pagdayaw kag tahura sia sa walay katapusan.
43 Mga hangin, himayaa ang Ginoo, ambaha ang iya pagdayaw kag tahura sia sa walay katapusan.
44 Kalayo kag kainit, himayaa ang Ginoo, ambaha ang iya pagdayaw kag tahura sia sa walay katapusan.
45 Makangingilo nga lamig kag makapalaso nga init, himayaa ang Ginoo, ambaha ang iya pagdayaw kag tahura sia sa walay katapusan.
46 Mga tun-og kag yelo, himayaa ang Ginoo, ambaha ang iya pagdayaw kag tahura sia sa walay katapusan.
47 Mga adlaw kag kagab-ihon, himayaa ang Ginoo, ambaha ang iya pagdayaw kag tahura sia sa walay katapusan.
48 Mga kapawa kag kadulom, himayaa ang Ginoo, ambaha ang iya pagdayaw kag tahura sia sa walay katapusan.
49 Yelo kag katugnaw, himayaa ang Ginoo, ambaha ang iya pagdayaw kag tahura sia sa walay katapusan.
50 Nagtilig-a nga mga tun-og kag mga yelo, himayaa ang Ginoo, ambaha ang iya pagdayaw kag tahura sia sa walay katapusan.
51 Mga kilat kag mga gal-om, himayaa ang Ginoo, ambaha ang iya pagdayaw kag tahura sia sa walay katapusan.
52 “Ang duta magdayaw sa Ginoo, ambaha ang iya pagdayaw kag tahura sia sa walay katapusan.
53 Mga bukid kag mga bakolod, himayaa ang Ginoo, ambaha ang iya pagdayaw kag tahura sia sa walay katapusan.
54 Tanan nga mga nagatubo, himayaa ang Ginoo, ambaha ang iya pagdayaw kag tahura sia sa walay katapusan.
55 Mga linaw kag mga suba, himayaa ang Ginoo, ambaha ang iya pagdayaw kag tahura sia sa walay katapusan.
56 Mga tuboran, himayaa ang Ginoo, ambaha ang iya pagdayaw kag tahura sia sa walay katapusan.
57 Mga balyena kag tanan nga nagakabuhi sa dagat, himayaa ang Ginoo, ambaha ang iya pagdayaw kag tahura sia sa walay katapusan.
58 Tanan nga mga kapispisan, himayaa ang Ginoo, ambaha ang iya pagdayaw kag tahura sia sa walay katapusan.
59 Tanan nga kahayopan kag layaw nga mga kasapatan, himayaa ang Ginoo, ambaha ang iya pagdayaw kag tahura sia sa walay katapusan.
60 “Mga katawohan sa duta, himayaa ang Ginoo, ambaha ang iya pagdayaw kag tahura sia sa walay katapusan.
61 Mga taga-Israel, himayaa ang Ginoo, ambaha ang iya pagdayaw kag tahura sia sa walay katapusan.
62 Mga pari sang Ginoo, himayaa ang Ginoo, ambaha ang iya pagdayaw kag tahura sia sa walay katapusan.
63 Mga alagad sang Ginoo, himayaa ang Ginoo, ambaha ang iya pagdayaw kag tahura sia sa walay katapusan.
64 Tanan nga mga matinuohon, himayaa ang Ginoo, ambaha ang iya pagdayaw kag tahura sia sa walay katapusan.
65 Mga balaan kag mapainuboson, himayaa ang Ginoo, ambaha ang iya pagdayaw kag tahura sia sa walay katapusan.
66 Hananias, Asarias kag Misael, himayaa ang Ginoo, ambaha ang iya pagdayaw kag tahura sia sa walay katapusan. Ginluwas niya kami sa kalibutan sang mga patay kag ginluwas niya kami sa gahom sang kamatayon. Ginpagwa niya kami gikan sa nagadabadaba nga hornohan kag ginluwas niya kami sa kalayo.
67 Magpasalamat sa Ginoo kay maayo sia kag ang iya kalooy nagapadayon sa walay katapusan.
68 Tanan nga nagsimba sa Ginoo, himayaa ninyo sia; amba sing pagdayaw sa Dios sang mga dios kag magpasalamat sa iya kay ang iya kalooy nagapadayon sa walay katapusan.
No comments:
Post a Comment