"Pabay-i lang Ninyo ang Magamay nga mga Kabataan sa Pagkari sa Akon"

Liturhiya sang Pulong

(Sabado, Agosto 18, 2018)

Ang Pagbasa gikan sa Libro ni:

Propeta Ezequiel 18:1-10, 13, 30-32

Ang GINOO naghambal sa akon, “Ano bala ang buot silingon sining hulobaton nga ginasulitsolit sang mga tawo sa duta sang Israel? ‘Ang mga ginikanan nagkaon sang maaslom nga mga ubas, kag nagngilo ang mga ngipon sang mga kabataan.’" Ang GINOO nagasiling, “Subong nga ako ang DIOS nga buhi, indi na ninyo pagsuliton ini nga hulobaton sa Israel. Ang kabuhi sang tagsa ka tawo akon, ginikanan ukon bata. Ang tawo nga nagapakasala mapatay. "Abi, kon may isa ka tawo nga maayo gid, matarong kag maminatud-on. Wala sia nagasimba sa mga diosdios sang mga Israelinhon ukon nagakaon sang mga halad nga gindulot sa mga altar nga ginadilian. Wala sia nagadagta sang asawa sang iban nga tawo ukon nagahiusa sa isa ka babayi nga yara ang iya pamulanon. Wala sia nagadaya ukon nagapangawat sa iban. Ginauli niya ang bisan ano nga ginaprenda sa iya, ginapakaon niya ang ginagutom kag ginahatagan niya sing bayu ang wala sing bayu. Wala sia nagapahulam sing pasakaan. Wala sia nagahimo sing malain kag nagahukom sia nga wala sing pinilian sa bisan kay sin-o nga nagainaway. Ginatuman niya sing maayo ang akon mga sugo kag mga kasugoan. Matarong sia kag magakabuhi," siling sang Ginoo nga Gamhanan. "Abi, kon may anak sia nga lalaki nga nagapangawat kag nagapamatay, kag nagahimo sang mga butang kag nagapahulam sia sing kuwarta nga pasakaan. Magakabuhi bala sia? Indi! Ginhimo niya ini tanan nga makahuloya nga mga butang kag tungod sini mapatay sia. Sia ang may salabton sang iya kamatayon. “Gani, ako ang GINOO nga Gamhanan nagasiling sa inyo nga mga Israelinhon nga hukman ko kamo suno sa inyo ginhimo. Untati ninyo ang tanan nga kalautan nga inyo ginahimo, kag indi pagtugoti nga malaglag kamo tungod sang inyo sala. Untati ang tanan nga kalautan nga inyo ginahimo kag bag-uha ang inyo mga hunahona kag ang inyo mga tagipusoon. Mga Israelinhon, ngaa bala luyag kamo magkalamatay? Wala ako sing Iuyag nga may isa nga mapatay. Mag-untat kamo sa pagpakasala kag magkabuhi," siling sang Ginoo nga Gamhanan.

Salmo sa Pagsabat:

Mga Salmo 51:12-13, 14-15, 18-19

Iuli sa akon ang kalipay sang imo kaluwasan, kag himoa ang akon espiritu nga magmatinumanon. Dayon tudluan ko ang mga makasasala sang imo mga sugo, kag magabalik sila sa imo. Luwasa ang akon kabuhi, O Dios nga akon manlulowas, kag ibantala ko sing malipayon ang imo pagkamatarong. O Ginoo, buligi ako sa paghambal, kag akon ikaw dayawon. O Dios, kaluoyi ang Sion kag buligi sia; patinduga liwat ang mga pader sang Jerusalem. Dayon magakalipay ikaw sa nagakaigo nga mga halad, kag sa tanan nga mga halad nga sinunog; kag ang mga baka nga toro pagaihalad sa imo altar.

Aleluya:

Mateo 11:25

O Amay, Ginoo sang langit kag duta! Nagapasalamat ako sa imo tungod kay ginpahayag mo sa mga di-maalam, ang ginlipdan mo sa mga maalam kag may mataas nga tinun-an.

Ang Pagbasa sang Santos nga Ebanghelyo suno kay:

San Mateo 19:13-15

May mga tawo nga nagdala kay Jesus sang magamay nga mga kabataan agod tungtongan niya sila sang iya kamot kag pangamuyoan, pero ginsabdong sila sang mga gintuton-an. Si Jesus nagsiling, “Pabay-i lang ninyo ang magamay nga mga kabataan sa pagkari sa akon, kag indi ninyo sila pagpunggi, kay ang Ginharian sang langit ila sang mga kasubong nila.” Gintungtong ni Jesus ang iya kamot sa ila kag sa tapos sini naglakat sia. 

Agosto 17 | Agosto 19