"Ang Nagakaon sini nga Tinapay Magakabuhi sing Dayon"

Liturhiya sang Pulong

(Domingo, Agosto 19, 2018)

1. Ang Pagbasa gikan sa Libro sang mga:

Hulobaton 9:1-6

Ang kaalam nagpatindog sang iya balay, kag ginbutangan niya ini sing pito ka haligi. Nag-ihaw sia sing isa ka sapat para sa punsyon, ginsimbugan niya ang bino sang pahamot, kag ginhanda ang lamisa. Ginsugo niya ang iya mga suloguon nga babayi sa pagkadto sa labing mataas nga duog sang banwa sa pagpanawag: "Kari kamo nga mga wala sing tinun-an!" Kag sa mga buangboang nagasiling sia, "Kari kamo sa pagkaon sang akon pagkaon kag sa pag-inom sang bino nga akon ginsimbog. Indi kamo mag-upod sa wala sing tinun-an agod magkabuhi kamo. Sunda ang dalanon sang kaalam.”

Salmo sa Pagsabat:

Mga Salmo 34:2-3, 10-11, 12-13, 14-15

Dayawon ko sia tungod sang iya mga binuhatan; kabay nga ang mga ginapigos magpamati kag magkalipay! Ibantala ta ang pagkadaku sang GINOO; dayawon ta sing tingob ang iya ngalan! Bisan pa ang mga leon ginakulangan sing pagkaon kag ginagutman, pero ang nagatuman sa GINOO indi gid makulangan sang maayo nga mga butang. Kari, mga abyan ko nga pamatan-on, pamatii ninyo ako, kag tudloan ko kamo sa pagtahod sa GINOO. Luyag bala kamo magkasadya sa kabuhi? Luyag bala kamo magkabuhi sing malawig kag magmalipayon? Gani likawi ninyo ang paghambal sing malaut, kag ang mga pagbinutig. Talikdi ang malaut kag himoa ang maayo; pangitaa ang paghidait kag tinguhaa ang pag-angkon sini. Ang GINOO nagabantay sa mga matarong, kag nagapamati sa ila mga pagpanawag;

2. Ang Pagbasa gikan sa Sulat ni San Pablo nga Apostol, sa mga:

Taga-Efeso 5:15-20

Gani magkabuhi kamo sing mainandamon. Indi kamo magkabuhi subong mga buangboang, kundi magkabuhi kamo subong mga maalam. Himusli ninyo ang tanan nga kahigayunan, kay malaut ini nga mga inadlaw. Gani indi kamo magpakabuang, kundi tinguhai ninyo ang paghibalo kon ano ang kabubot-on sang Ginoo. Indi kamo magpahuboghubog sa bino nga magalaglag lamang sa inyo. Sa baylo, pun-a ninyo ang inyo kaugalingon sang Espiritu. Sa inyo paghambalanay gamita ninyo ang mga pulong sang mga salmo, mga ambahanon, kag balaan nga mga kalantahon. Mag-amba kamo sang mga kalantahon kag mga salmo sa Ginoo nga may pagdayaw sa inyo mga tagipusoon. Sa tanan nga butang magpasalamat gid kamo sa Dios nga Amay, sa ngalan sang aton Ginoong Jesu-Cristo. 

Aleluya:

Juan 6:56

Ang bisan sin-o nga magkaon sang akon unod kag mag-inom sang akon dugo nagakabuhi sa akon kag ako sa iya, siling sang Ginoo.

Ang Pagbasa sang Santos nga Ebanghelyo suno kay:

San Juan 6:51-58

Ako amo ang buhi nga tinapay nga naghalin sa langit. Ang bisan sin-o nga magkaon sini nga tinapay magakabuhi sing dayon; kag ang tinapay nga akon ihatag amo ang akon unod, nga akon ginahatag para sa kabuhi sang kalibutan.” Amo ini ang ginsugoran sang mainit nga pagbinaisay sang mga Judio. Nagsiling sila, “Paano bala ang paghatag sini nga tawo sa aton sang iya unod agod aton kaunon?” Si Jesus nagsiling sa ila, “Nagasiling ako sa inyo sang matuod: kon indi kamo magkaon sang unod sang Anak sang Tawo kag mag-inom sang iya dugo wala kamo sing kabuhi sa inyo kaugalingon. Ang bisan sin-o nga nagakaon sang akon unod kag nagainom sang akon dugo may kabuhi nga wala sing katapusan kag banhawon ko sia sa katapusan nga adlaw. Kay ang akon unod amo ang matuod nga kalan-on, kag ang akon dugo amo ang matuod nga ilimnon. Ang bisan sin-o nga magkaon sang akon unod kag mag-inom sang akon dugo nagakabuhi sa akon kag ako sa iya. Ako ginpadala sang buhi nga Amay, kag tungod sa iya nagakabuhi man ako. Sa amo man nga bagay, ang bisan sin-o nga nagakaon sa akon magakabuhi tungod sa akon. Gani amo ini ang tinapay nga naghalin sa langit. Indi ini kasubong sang tinapay nga ginkaon sang inyo mga katigulangan, kag wala sapayan nagkalamatay sila. Ang nagakaon sini nga tinapay magakabuhi sing dayon.”

Agosto 18 | Agosto 20