Ang Palaanggiran nahanungod sa mga Bugang

Liturhiya sang Pulong

(Sabado, Hulyo 28, 2018)

Ang Pagbasa gikan sa Libro ni:

Propeta Jeremias 7:1-11

Ginpadala ako sang GINOO sa puwerta sang Templo, sa diin ang mga tawo sang Juda nagsulod sa pagsimba. Ang GINOO nagsiling sa akon sa pagtindog didto kag sa pagbantala sang inugsiling sang GINOO nga Makagagahom, ang Dios sang Israel, “Bayluhi ang inyo pagginawi kag ang mga butang nga inyo ginahimo, pamatasan, agod padayunon ko kamo sa pagkabuhi diri. Untati ninyo ang pagpati sa butig nga mga pulong, ‘Indi kami maano! Amo ini ang Templo sang GINOO, ang Templo sang GINOO, ang Templo sang GINOO!’ “Bayluhi ang inyo pagginawi kag ang mga butang nga inyo ginahimo. Magtratahay kamo sing husto. Indi na kamo magpamintaha sa mga dumoluong, mga ilo, kag mga balo. Indi kamo magpamatay sang mga tawo nga wala sing sala sa sining duta. Indi na kamo magsimba sa iban nga mga dios, kay ini magalaglag sa inyo. Kon magbaylo kamo padayunon ko kamo sa pagkabuhi sa duta nga akon ginhatag sa inyo mga katigulangan subong ila palanublion nga wala sing katapusan. “Tan-awa, nagasalig kamo sa mga pulong nga malimbungon. Nagapangawat kamo, nagapamatay, nagapanginbabayi kag nagapanginlalaki, nagasumpa sing butig, nagadulot sing mga halad kay Baal, kag nagasimba sa iban nga mga dios nga wala gani ninyo makilal-i. Ginahimo ninyo ang akon ginadumtan, kag dayon nagakari kamo kag nagatindog sa akon atubangan, sa akon Templo, kag nagasiling, ‘Indi kami maano!’ Nagahunahona bala kamo nga ang akon Templo palanaguan sang mga makawat? Nakit-an ko ang inyo ginahimo.

Salmo sa Pagsabat:

Mga Salmo 84:3, 4, 5-6, 8, 11

Bisan ang mga maya nagahimo sang ila pugad, kag ang mga salimbabatang may kaugalingon nga puloy-an; ginabutang nila ang ila mga boto malapit sa imo mga altar, GINOO nga Makagagahom, akon hari kag akon Dios. Bulahan ang mga nagapuyo sa imo Templo, nga nagakanta sa gihapon sing pagdayaw sa imo! Bulahan sila nga ang ila mga kusog nagagikan sa imo, yadtong nagahandom gid sa pagbuylog sa mga mainampuon pakadto sa bukid sang Sion. Sang nagalatas sila sang mamala nga kapatagan sang Baca nanginduog ini sang mga tuboran; ang nahauna nga ulan nagahimo sini nga mga danaw. Pamatii ang akon pangamuyo, O GINOONG Dios nga Makagagahom, pamatii, O Dios ni Jacob! Ang GINOO aton mangangapin kag mahimayaon nga hari, nga nagahatag sa aton sing kaayuhan kag kadungganan. Wala niya ginadumili ang bisan ano nga maayo nga butang sa mga nagahimo sing matarong.

Aleluya:

Santiago 1:21

Gani, bayai ninyo ang inyo mahigko nga pamatasan kag ang inyo malaut nga pagginawi. Itugyan ang inyo kaugalingon sa Dios kag batuna ninyo ang pulong nga iya ginatanom sa inyo mga tagipusoon, nga sarang makaluwas sa inyo.

Ang Pagbasa sang Santos nga Ebanghelyo suno kay:

San Mateo 13:24-30

Si Jesus nagsugid sa ila sing isa naman ka palaanggiran, “Ang Ginharian sang langit kaangay sang isa ka tawo nga nagsab-og sang maayo nga binhi sa iya uma. Isa ka gab-i, sang nagakatulog ang mga tawo, nag-abot ang iya kaaway kag ginsab-ugan man sang bugang ang iya uma kag naglakat. Sang nagtubo ang tanom, kag nagpamunga, ang mga bugang nagtubo man. Ang mga suloguon sang tawo nagkadto sa iya kag nagsiling, ‘Sir, maayo nga binhi ang imo ginsab-og sa imo nga uma, pero diin bala maghalin ining mga bugang?’ Nagsabat sia, ‘Ginsab-og ini sang kaaway.’ Nagpamangkot sila, ‘Luyag mo bala nga panggabuton namon ang mga bugang?’ Nagsabat sia, ‘Indi lang, kay basi may magabot man kamo nga mga trigo kaupod sa mga bugang. Pabay-i lang ninyo anay nga magpamuhi ang mga bugang kag ang mga trigo tubtob sa tig-alani, kay kon tig-alani na singganon ko ang mga mangangani: Gabuta anay ninyo ang mga bugang, bugkosa ini kag idap-ong sa kalayo. Dayon tipuna ninyo ang trigo kag isulod sa akon tambubo.’ ”

Hulyo 27 | Hulyo 29