Ang Gamhanan nga Buhat ni Jesus

Liturhiya sang Pulong

(Domingo, Hulyo 29, 2018)

1. Ang Pagbasa gikan sa Ikaduha nga Libro sang:

Mga Hari 4:42-44

Isa sadto ka tion, may isa ka tawo halin sa Baal Salisa, nga may dala kay Eliseo nga 20 ka bilog nga tinapay nga nahimo sa nahauna nga patubas sang sebada sina nga tuig, kag bag-o lang maani nga trigo. Ginsingganan ni Eliseo ang iya suloguon nga pakan-on sini ang grupo sang mga propeta, pero ang suloguon nagsabat, “Nagahunahona ka bala nga makaigo ini sa 100 ka mga tawo?” Nagsabat si Eliseo, “Ihatag sa ila agod kaunon, kag ang GINOO nagsiling nga magakaon sila kag may mabilin pa gid.” Gani ginbutang sang suloguon ang kalan-on sa ila, kag suno sa ginsiling sang GINOO nagkaon sila tanan kag may nabilin pa.

Salmo sa Pagsabat:

Mga Salmo 145:10-11, 15-16, 17-18

Ang tanan mo nga mga tinuga, O GINOO, magadayaw sa imo, kag ang imo mga tawo magapasalamat sa imo! Magahambal sila sang himaya sang imo ginharian, kag magasugid sila sang imo gahom. Ang tanantanan nga nagakabuhi nagalaom sa iya, kag ginahatagan niya sila sing pagkaon sa tion nga ila kinahanglanon ini. Ginahatagan mo sila sing tuman kag ginahimun-an mo ang tanan sa ila mga kinahanglanon. Ang GINOO matarong sa tanan nga iya ginahimo, maluloy-on sa tanan niya nga mga buhat. Malapit sia sa tanan nga nagapanawag sa iya, nga nagapanawag sa iya sing maminatud-on.

2. Ang Pagbasa gikan sa Sulat ni San Pablo nga Apostol, sa mga:

Taga-Efeso 4:1-6

Karon, ako nga binilanggo tungod sang akon pag-alagad sa Ginoo, nagapakiluoy sa inyo: magkabuhi kamo suno sa talaksan nga ginhatag sang Dios, sang pagtawag niya sa inyo. Magmapainuboson kamo, magmalulo, kag magmapinasensyahon sa gihapon. Ipakita ang inyo gugma paagi sa inyo pagbinuligay. Tinguhai gid ninyo ang pagtipig sang paghiliusa nga ginahatag sa inyo sang Espiritu, paagi sa paghidait nga amo ang nagahiusa sa inyo. May isa ka lawas kag isa ka Espiritu, subong nga may isa ka paglaom nga tungod sini gintawag kamo sang Dios. May isa ka Ginoo, isa ka pagtuo, isa ka bautiso, may isa ka Dios kag Amay sang tanan nga mga tawo, nga amo ang Ginoo sang tanan, nga nagapanghikot sa tanan, kag yara sa tanan. 

Aleluya:

Lucas 7:16

Ang isa ka daku nga propeta nagpakita sa tunga naton, kag ang Dios nagkari sa pagluwas sang iya mga tawo.

Ang Pagbasa sang Santos nga Ebanghelyo suno kay:

San Juan 6:1-15

Sa tapos sini, si Jesus nagtabok liwat sa Linaw sang Galilea nga ginatawag man nga Linaw sang Tiberias. Madamo nga mga tawo ang nag-apas sa iya, kay nakakita sila sang iya gamhanan nga mga buhat sa pagpang-ayo sang mga masakiton.  Nagtaklad si Jesus sa isa ka bakulod kag naglingkod sia upod sa iya mga gintuton-an. Ang Piesta sang Pascua sang mga Judio malapit na. Nanghulonghulong si Jesus kag nakita niya ang madamo nga mga tawo nga nagapalapit sa iya, gani nagpamangkot sia kay Felipe, “Diin bala kita makabakal sang kalan-on nga makaigo sa sini nga mga tawo?” (Nagpamangkot sia sini sa pagtilaw kay Felipe; ang matuod amo nga si Jesus nakahibalo na kon ano ang iya himuon.) Si Felipe nagsabat, “Bisan tigdiutay lang ang ihatag mo sa sining mga tawo, ang tinapay nga nagabili sang P200 kulang pa.” Si Andres nga isa sang iya mga gintuton-an kag utod ni Simon Pedro nagsiling, “May bata diri nga lalaki nga may lima ka bilog nga tinapay nga sebada kag duha ka bilog nga isda. Pero ano bala ang pulos sini sa amo nga kadamuon sang mga tawo?” Si Jesus nagsiling sa ila, “Palingkura ninyo ang mga tawo.” (Hilamunon yadto nga duog.) Gani naglingkod ang tanan. Mga 5,000 ang mga lalaki. Ginkuha ni Jesus ang tinapay, nagpasalamat sia sa Dios, kag ginpanagtag niya ini sa mga tawo nga nagalingkod didto. Amo man ang ginhimo niya sa isda, kag ang tanan nakakaon suno sa luyag nila. Sang nabusog na sila tanan, nagsiling si Jesus sa iya mga gintuton-an, “Tipuna ninyo ang mga nabilin nga wala gid sing may mausik.” Gani gintipon nila ang tanan nga nabilin, kag ang sobra sang lima ka bilog nga tinapay nga sebada nga ginkaon sang mga tawo nagpuno sang dose ka mga alat. Sang makita sang mga tawo ining gamhanan nga buhat nga ginhimo ni Jesus, nagsiling sila, “Matuod gid nga ini sia amo ang Propeta nga magakari sa kalibutan!” Nahibaluan ni Jesus nga magakari sila kag piliton sia nga manginhari nila. Gani nagkadto sia liwat sa mga bakulod nga isahanon lang. 

Hulyo 28 | Hulyo 30