☆☆☆
Isa ka Sulat sa mga Judio sa Egipto
1 Ang mga Judio sa Jerusalem kag sa kadutaan ni Juda nagatamyaw sang ila mga utod, ang mga Judio sa Egipto, kag nagapangabay para sa ila sang kauswagan kag sang paghidait.2 “Kabay nga pauswagon kamo sang Dios kag madumdoman niya ang iya kasugtanan kay Abraham, kay Isaac kag kay Jacob, ang iya masaligan nga mga alagad.
3 Kabay nga pahumokon niya ang inyo mga tagipusoon sa pagsimba sa iya kag sa paghimo sang iya kabubot-on nga may bukas nga panghunahona kag handa nga espiritu.
4 Kabay unta nga buksan niya ang inyo mga tagipusoon sa iya mga kasugoan kag mga mando, kag hatagan kamo sang paghidait.
5 Kabay nga pamatian niya ang inyo mga pag-ampo kag mag-ayuhay kamo liwat kag indi kamo pagpatumbayaan sa tion sang kalautan.
6 Nagapangamuyo kami karon para sa inyo.
7 “Sang si Demetrio hari sang tuig 169, kami nga mga Judio nagsulat sa inyo sang masunod: Sa tion sang dili matabangan nga kasakitan nga naglaslas sa amon sa sadtong mga tinuig sugod sang pagluib ni Jason kag sang iya mga kaupdanan sang Balaan nga Duta kag sang ginharian,
8 ginsunog nila ang puwerta sang Templo kag ginpamatay ang mga wala sing sala. Dayon nag-ampo kami sa Ginoo kag iya kami ginpamatian; nagdulot kami sang halad nga kalan-on, ginsindihan namon ang mga suga kag ginpanagtag ang tinapay.
9 Gani karon ginapanugyan namon sa inyo ang pagsaulog sang Piesta sang mga Tolda sa bulan sang Kisleb, sa tuig 188.”
ANG SULAT KAY ARISTOBOLO
Ang Kamatayon ni Hari Antioco
10 Ang mga pumoluyo sang Jerusalem kag sang Juda, ang senado kag si Judas, nagatamyaw kag nagapangamuyo sang ikaayong lawas para kay Aristobolo, manunudlo ni Haring Tolemeo kag katapo sang panimalay sang mga pari, kag para sa mga Judio sa Egipto.11 “Tungod kay ginluwas kita sang Dios sa dalagko nga mga katalagman, dako gid ang amon pagpasalamat tungod sang iya pagdampig sa aton batok sa hari; sia ang nagtabog sadtong mga tawo
12 nga nagsalakay sang Balaan nga Siyudad. Sang makalambot
13 si Hari Antioco sa Persia upod ang iya daw indi malutos nga mga hangaway, ginhatukhatok sia sa templo ni Nanaea, tungod sang padugi nga gingamit sang mga pari nga nagaalagad sa diosa. Sa pagpakunokuno
14 nga pakaslan niya si Nanaea, si Antioco nagkadto sa sadto nga duog upod ang iya mga kaabyanan, nga may tuyo sa pagkuha sang manggad bilang regalo sa kasal. Sang mapagwa sang mga pari
15 ni Nanaea ang malahalon nga mga pagkabutang, sumolod si Antioco sa balaan nga duog upod ang isa ka diutay nga hubon sang mga soldado. Sang didto na sila sa sulod sang templo, gintrangkahan dayon sila sang mga pari.
16 Dayon ila ginbuksan ang isa ka tago nga puwertahan sa kisame, kag ila ginpamatay yadtong pangulo kag ang iya mga kaupdanan paagi sa paghaboy sang mga bato nga daw nagapangilat. Ila sila ginpanghatukhatok, ginpamugotan kag ginhaboy sa mga tawo sa gwa.
17 Dayawon ang Dios sa gihapon, nga nagasilot sa mga indi diosnon!
Ang Makatilingala nga Pagtago sang Balaan nga Kalayo
18 “Tungod nga aton pagasaulogon ang pagpaninlo sang Templo sa ika-26 nga adlaw sang Kisleb, ginpakamaayo namon nga pahibaluon kamo agod inyo man saulogon ang Piesta sang mga Tolda kag sang kalayo nga nagpakita sang si Nehemias, nga amo ang nagpatukod sang Templo kag sang altar, nagdulot sang halad.19 Sang gintapok ang aton mga katigulangan sa Persia, ang matinuohon nga mga pari sadto nga tion nagsindi sang kalayo gikan sa altar kag gintago sing likom sa buho sang isa ka mamala nga awang, sa diin ila gintago nga wala gid sing may nakahibalo.
20 Sang pagkaligad sang pila ka tuig, sa tion nga nahamut-an sang Dios, si Nehemias nga ginhatagan sing gahom sang hari sang Persia, nagpadala sang mga kaliwatan sang mga pari nga nagtago sang kalayo sa pagkuha sini. Pero ila kami ginpahibalo nga wala sila sing nakita nga kalayo kundi lunangon nga tubig. Ginmandoan sila ni Nehemias nga magsandok sini kag dalhan sia.
21 Sang naaman na ang mga galamiton para sa paghalad, ginmandoan ni Nehemias ang mga pari nga ulaan sining lunangon nga tubig ang mga kahoy kag ang tanan nga natungtong didto.
22 Sang mahimo ini kag sang magsanag ang adlaw nga nalikupan sing gal-om, ang isa ka nagaharahara nga kalayo nagsadlab nga ginakatingalahan sang tanan.
23 Samtang ginasunog ang halad, ang mga pari kag ang tanan nga mga tumalambong upod sa ila nagpangamuyo. Si Jonatan nagsugod kag ang tanan nagasabat upod kay Nehemias.
24 Amo ini ang ila pangamuyo: ‘O Ginoo, Ginoong Dios, manunoga sang tanan nga mga butang, talahuron, malig-on, matarong, maluloy-on, ang matuod nga hari kag manugbulig,
25 nga amo lamang ang nagahatag sing kaayuhan, nga amo lamang ang matarong, makagagahom kag walay katapusan, ang manlulowas sang Israel sa tanan nga mga kalautan, nga nagpili sang amon nga katigulangan kag nagpakabalaan sa ila,
26 batuna ining halad para sa imong bug-os nga katawuhan nga Israel. Bantayi kag pakabalaana ining imo mga manunobli.
27 Tipuna ang nag-alaplaag, buy-i ang mga gin-ulipon sang mga pagano, magmaayo ka sa mga ginapakanubo kag ginakangil-aran, kag ipahibalo sa mga pagano nga ikaw ang amon Dios.
28 Siloti ang mga nagapigos sa amon, kag ang mga nagapahambog sa ila pagtratar sa amon,
29 kag pagpuy-a ang imo mga tawo sing malig-on sa imo Balaan nga Duog, suno sa ginsaad ni Moises.’
Nabatian sang Hari sang Persia ang Nahanungod sa Kalayo
30 “Dayon ang mga pari nagkanta sang balaan nga mga ambahanon.31 Sang maubos sunog ang tanan nga mga halad, nagmando si Nehemias nga ang nabilin nga tubig ibubo sa dalagku nga mga bato.
32 Sang mahimo ini, isa ka daku nga kalayo ang nagadabadaba, pero ang iya kapawa nalikupan sang kasanag nga naggikan sa altar.
33-34 “Sang maglapnag ang natabo kag nabatian sang hari sang Persia nga sa lugar sa diin gintago sang nabihag nga mga pari ang kalayo ila nakit-an ang tubig nga gingamit ni Nehemias kag sang iya mga tawo sa pagpaputli sang mga galamiton sa paghalad, ginpakudalan ini sang hari kag iya ginkabig nga balaan ang duog sa tapos niya mapamatud-an ang natabo.
35 Ginpanagtagan sang hari sang malahalon nga mga dulot ang mga tawo nga iya nahamut-an.
36 Si Nehemias kag ang iya mga kaupdanan nagtawag sa sining tubig nga neptar, nga kon sayuron ‘pagpaninlo,’ pero ang kalabanan sang mga tawo nagatawag sini nga ‘napta.’
No comments:
Post a Comment