"Wala sing Butang nga Indi Ninyo Mahimo"

Liturhiya sang Pulong

(Sabado, Agosto 11, 2018)

Ang Pagbasa gikan sa Libro ni:

Propeta Habacuc 1:12-2:4

GINOO, halin sa ginsugoran Dios ikaw. Dios ko ikaw, balaan kag walay katubtoban. GINOO, Dios ko kag nagaapin sa akon, ginpili mo ang mga taga-Babilonia kag ginpabakod mo sila agod masilutan nila kami. Pero makabatas ka man sa pagtan-aw sining mapintas kag malaut nga mga tawo? Ang imo mga mata balaan nga indi makatulok sa malaut, kag indi ikaw makaagwanta sa pagtan-aw sang mga tawo nga nagahimo sing sayop. Gani, ngaa nagahipos ka samtang ginalaglag nila ang mga tawo nga matarong pa sa ila?

Makabatas ka man sa pagtan-aw sining mapintas kag malaut nga mga tawo? (1:13)

Makabatas ka man bala magkabig sa mga tawo kaangay sang isda ukon kaangay sang mga sapatsapat nga wala sing may nagadumala sa ila? Ang mga taga-Babilonia nagadakop sang mga tawo paagi sa taga nga daw mga isda lang sila. Ginasihod nila sila kag nagasinggit sila sa kalipay tungod sang ila nga nadakpan! Ginasimba nila kag ginadulotan sing mga halad ang ila mga sihod, tungod kay ang ila mga sihod nagahatag sa ila sang labing maayo nga mga butang. Gamiton bala nila ang ila mga espada sa walay katubtoban, kag magpadayon sing pangguba sang mga pungsod sa wala sing kaluoy? Magasaka ako sa akon tore nga balantayan, kag hulaton ko kag tan-awon kon ano ang isiling sang Ginoo nga dapat ko ihambal, kag kon ano ang iya isabat sa akon reklamo. Amo ini ang ginsabat sang Ginoo sa akon: "Isulat sing maathag sa tapitapi nga lunang ang akon ipahayag sa imo, agod nga sa isa lang ka pagtan-aw mabasahan ini. Isulat ini, kay indi pa ini tion nga matuman ini. Pero ang tion magaabot sa indi madugay, kag ang ginapahayag ko sa imo matuman. Ayhan daw madugay ini mag-abot, pero hulata ini kay matuman gd ini, kag indi na ini magdugay. Kag amo ini ang mensahi: 'Ang malaut indi mabuhi, pero ang matarong magakabuhi kay matutom sila sa Dios.' "

Salmo sa Pagsabat:

Mga Salmo 9:8-9, 10-11, 12-13

Ginagamhan niya ang kalibutan sing matarong, nagahukom sia sang mga tawo suno sa katarungan. Dalangpan sang mga ginapigos ang GINOO, palanaguan sia sa tion sang kinagamo. Ang mga nakakilala sa imo, O GINOO, magasalig sa imo, kay wala mo ginapatumbayai ang mga nagadangop sa imo. Amba kamo sing mga pagdayaw sa GINOO nga nagagahom sa Sion! Ibantala sa mga kapungsoran ang iya mga binuhatan! Ginadumdom sang Dios ang mga nagaantos; wala niya ginakalimti ang ila pagpangayo sing bulig, kag iya ginasilutan ang nagahimo sing malaut sa ila. Kaluoyi ako, O GINOO! Tan-awa kon daw ano ang pagsakit sang mga nagadumot sa akon. Luwasa ako sa kamatayon, O GINOO.

Aleluya:

2 Timoteo 1:10

Ang aton Manlulowas nga si Cristo Jesus gindula ang gahom sang kamatayon kag paagi sa Maayong Balita iya ginpahayag ang kabuhi nga wala sing katapusan. 

Ang Pagbasa sang Santos nga Ebanghelyo suno kay:

San Mateo 17:14-20

Sang pagbalik nila sa madamo nga mga tawo, may isa ka tawo nga nagpalapit kay Jesus, kag nagluhod nga nagasiling, “Sir, kaluoyi ang akon anak nga lalaki. Kuyapon sia kag kon abuton tama gid ang iya pag-antos sa bagay nga pirme nagakatumba sa kalayo ukon sa tubig. Gindala ko sia sa imo mga gintuton-an, pero indi sila makaayo sa iya.” Si Jesus nagsabat, “Daw ano ka di-matinuohon kag kabalingag sa inyo! Tubtob san-o pa bala magaupod ako sa inyo? Tubtob san-o pa bala ako magabatas sa inyo? Dalha ang bata diri sa akon!” Gintabog ni Jesus ang yawa kag naggwa ini, kag sa sadto gid nga tion nag-ayo ang bata. Dayon nagpalapit kay Jesus ang mga gintuton-an sang silahanon na lang kag nagpamangkot, “Ngaa indi kami makatabog sang yawa sa bata?” Si Jesus nagsabat, “Ina tungod kay kulang ang inyo pagtuo. Dumdoma ninyo ini! Kon may pagtuo kamo subong kadaku sang liso sang mostasa sarang kamo makasiling sa sini nga bakulod, ‘Saylo ka didto!’ kag ini magasaylo. Wala sing butang nga indi ninyo mahimo! 

Agosto 10 | Agosto 12