Tobit 1

1  2  3  4  5  6  7  8  9  10  11  12  13  14

☆☆☆

1 Ako si Tobit kag ang masunod amo ang kasaysayan sang akon kabuhi. Si Tobiel ang akon amay nga anak ni Ananiel kag apo ni Aduel. Ang amay ni Aduel amo si Gabael nga anak ni Rafael kag si Rafael anak ni Raguel. Ini si Raguel naggikan sa kabikahan ni Asiel nga bahin sang tribo ni Neftali.

2 Sa panahon nga si Salamanasar amo ang emperador sang Asiria, nanginbihag ako gikan sa banwa sang Tisbe. Ini nga banwa nahamtang sa naaminhan nayon sang Galilea, nabagatnan sang Cades Neftali, naaminhan-nakatungdan sang Hazor kag naaminhan sang Pogor.

Ang Nahauna nga mga Tinuig sang Kabuhi ni Tobit

3 Sa bug-os ko nga kinabuhi gintinguhaan ko ang pagbuhat sang maayo suno sa kasugoan kag sang matarong. Batasan ko ang pagbulig sa mga imol ko nga mga kapariyentihan kag sa akon kasimanwa nga mga Judio nga nabihag upod sa akon sa Ninive, ang kapital sang Asiria.

4 Sang lamharon pa ako, nagpuyo ako sa naaminhan nga bahin sang Israel. Kinahanglan kuntani nga ang tanan nga mga tribo sang Israel magdulot sing mga halad sa Jerusalem. Amo ini ang siyudad nga ginpili sang Dios nga patindugan sang iya Templo nga mangin-iya balaan kag walay katapusan nga puloy-an. Pero ang tribo ni Neftali sa diin ako naggikan wala nagsunod sini nga pagsulundan. Wala nila ginakilala ang mga hari nga naggikan sa kaliwatan ni David.

5 Sa baylo, ang mga linahe ni Neftali nagsimba sa siyudad ni Dan nga nahamtang sa kabukiran sang naaminhan nga Galilea. Didto naghalad kami sa isa ka baka nga bulawan nga ginabuhat sadto anay ni Hari Jeroboam.

Ang Pagkatutom ni Tobit sa Iya Relihiyon

6 Sa amon panimalay, ako lamang ang nagkadto sa Jerusalem sa tagsa ka pagselebrar sang kapiyestahan nga ginamando sa Kasugoan ni Moises. Sa akon pagkadto didto, nagdala ako sang nahauna ko nga patubas, panganay nga tinday sang akon kasapatan, ikanapulo nga bahin sang akon kahayopan kag ang bag-o pa lamang magunting nga mga bulbol sang akon mga karnero. Ini tanan ginahalad ko sa atubangan sang altar kag ginabaton ini sang mga pari gikan sa linahe ni Aaron.

. . . nagdala ako sang nahauna ko nga patubas. (1:6)

7 Sa mga Levita nga nagaalagad sa Dios sa Jerusalem ginhatag ko ang ikanapulo nga bahin sang akon patubas, bino, lana sang olibo, granada, higos kag iban pa nga mga bunga sang kahoy. Luwas lamang sa ikapito nga tuig nga wala ginaobra ang duta, sa tagsa ka tuig ginbaligya ko ang ikaduha nga ikanapulo nga bahin sang akon pagkabutang agod may galastohon ako sa Jerusalem sa paghiwat sang kapiyestahan.

8 Sa tagsa ka tatlo ka tuig, ang nabilin ko nga kwarta gikan sa balayran ko sa simbahan ginhatag ko sa mga balo kag mga ilo kag subong man sa mga dumoluong nga nagpuyo upod sa akon kasimanwa. Kag upod sa ila nagkaon ako suno sa Kasugoan ni Moises nga gintudlo sa akon ni Debora, ang iloy sang akon lolo nga si Ananiel. (Nailo ako sang mapatay ang akon amay nga si Tobiel.)

Ang Pagkatutom ni Tobit sa Duta sang Asiria

9 Sang hamtong na ako ginpangasawa ko si Ana nga katapu man sang akon tribo. Nag-anak kami kag ginhingalanan ko kay Tobias.

10 Sang ulihi nabihag ako pa Asiria, kag gani nagpuyo ako sa Ninive.

11 Wala gid ako magkaon sang pagkaon sang mga taga-Ninive kag sang mga tawo nga nagapuyo didto bisan pa nga ang akon mga kapariyentihan kag kasimanwa nagkalaon sini.

12 Tungod kay gintuman ko ang kasugoan sang Dios nga labing Mataas, ginbuot sang Dios nga tahuron ako ni Emperador Salamanasar kag

13 gani ako ang ginhatagan sang gahom sa pagbakal sang tanan niya nga kalan-on.

14 Samtang nga buhi pa ang emperador, masunsun ako nga nagkadto sa Media sa pagbakal sang iya mga kinahanglanon. Sa isa ka sining akon pagpanglakaton, nakakadto ako sa siyudad sang Rages. Didto ginpatago ko kay Gabael nga utod ni Gabrias ang kapin sa 600 ka libra nga mga sinsilyo nga pilak.

15 Sang mapatay ang emperador, gintal-usan sia ni Senaquerib nga iya anak. Nag-untat ako sa pagkadto sa Media kay ang dalanon pakadto didto amat-amat nga napun-an sang mga katalagman.

Si Tobit Naglubong sang mga Patay

16 Sang buhi pa si Emperador Salamanasar, ginsapopo ko ang akon kasimanwa kon yara sila sa kaiwaton.

17 Ginpakaon ko sila kon gutom sila; ginhatagan ko sila sing bayu kon nagakinahanglan sila sing bayu. Ginapalubong ko ang ila bangkay kon ini ginahaboy lamang sa gwa sang pader sang siyudad.

18 Sang isa ka adlaw ginpanghimalaut ni Senaquerib ang Dios nga Hari sang kalangitan. Gani ginsilotan sia sang Dios paagi sa pagkalutos sa inaway nga amo ang nagtulod sa iya sa pagpalagyo gikan sa Juda. Sang iya pagbalik gikan sa Media, napun-an sia sing daku gid nga kaakig kag iya ginpamatay ang madamo nga Israelinhon. Sang pangitaon ni Senaquerib ang mga bangkay, indi ini makita sanglit, sa tago lamang, ginkuha ko ini kag ipalubong.

19 Ang isa sang mga taga-Ninive nagsugid sa emperador nga ako ang nagalubong sa mga minatay. Nahibaloan ko nga nabutang sa katalagman ang akon kabuhi kag gani kinulbaan ako. Nagpalagyo ako sa pagpanago.

20 Ginkuha ang tanan ko nga pagkabutang kag gindugang ini sa manggad sang emperyo. Ang nabilin sa akon amo si Ana nga akon asawa kag si Tobias nga akon anak.

Ginluwas si Tobit sang Iya Hinablos

21 Matapus ang anom ka semana ginpatay si Senaquerib sang duha niya ka anak kag dayon nagpalagyo sila sa kabukiran sang Ararat. Si Esarhadon nga anak ni Senaquerib amo ang nagtal-us sa iya amay. Kinuha niya nga kabulig sa palasyo ang akon hinablos nga si Ahikar nga anak ni Anael. Ginbuhat sia nga manugtatap sang tanan nga manggad sang ginharian.

22 Tungod kay Ahikar nakabalik ako sa Ninive. Ikaduha na ini nga tion ginbutang sa sini nga palangakoan kay sa tiempo ni Senaquerib, si Ahikar yara na sa palasyo subong tagtagay sang bino sa hari, tesorero, manugtatap sang manggad sang ginharian kag manugtago sang silyo sang emperador.

Malaquias 4 | Tobit 2