"Kalipay sa Pagkakita sang Ginlubong nga Manggad kag Perlas nga Malahalon"

Liturhiya sang Pulong

(Miyerkules, Agosto 1, 2018)

Ang Pagbasa gikan sa Libro ni:

Propeta Jeremias 15:10, 16-21

Daw ano ka masinulob-on sa akon! Ngaa bala ginbun-ag pa ako sang akon iloy sa sining kalibutan? Dapat ako mag-away kag magpakigsuay sa bisan sin-o sa duta. Wala ako magpahulam ukon maghulam sang kuwarta sa kay bisan sin-o, pero ginapakamalaut ako sang tanan. Naghambal ka sa akon, kag ginpamatian ko ang tanan mo nga ginahambal. Imo ako, O Ginoong Dios nga Makagagahom, gani ang imo mga pulong nagpuno sang akon tagipusoon sing kalipay kag kasadya. Wala ako mag-upod-upod sa iban nga mga tawo nga nagakadlaw kag nagapangalipay. Tungod sang bulohaton nga ginhatag mo sa akon, nag-isahanon lang ako kag napuno sing kaakig. Ngaa bala nagapadayon pa ako sa pag-antos? Ngaa indi mag-ayo ang akon pilas? Ngaa indi sila magpali? Hungod mo bala nga napaslawan ako subong sang isa ka sapa nga nagamala sa tingadlaw?" Sa sini ang Ginoo nagsabat,"Kon magbalik ka, batunon ko ikaw, kag mangin-alagad ko ikaw liwat. Kon maghambal ikaw sing mga butang nga mapuslanon, kag indi ang mga butang nga wala sing pulos, mangin-akon ikaw propeta liwat. Magabalik sa imo ang mga tawo, pero indi ikaw magkadto sa ila. Himuon ko ikaw kaangay sang isa ka pader nga saway nga bilog sa sini nga mga tawo. Magapakig-away sila batok sa imo, pero indi nila ikaw madaog. Magaupod ako sa imo sa pag-apin sa imo, agod indi ikaw maano. Luwason ko ikaw sa mga kamot sang malaut nga mga tawo, kag hilwayon ko ikaw sa gahom sang mapintas nga mga tawo. Ako, ang Ginoo, naghambal sini." 

Salmo sa Pagsabat:

Mga Salmo 59:2-3, 4, 10-11, 17, 18

Luwasa ako sa sadtong malaut nga mga tawo, tabangi ako sa sadtong mga manugpatay! Tan-awa! Nagahulat sila sa pagpatay sa akon! Ang mabangis nga mga tawo nagahimbon batok sa akon. Indi tungod sang sala ukon malain nga akon nahimo, indi tungod sang akon kasaypanan, O Ginoo, nga sila nagadalidali sa pagbantay batok sa akon. Ang akon Dios, nga nagahigugma sa akon, magakari sa akon; ipakita niya sa akon ang pagkalutos sang akon mga kaaway. Indi sila pagpamatya, O Dios, agod nga indi malipat ang akon mga tawo. Paalaplaaga sila kag laglaga sila sang imo gahom, O GINOO, nga amon mangangapin! Dayawon ko ikaw, akon mangangapin; ang akon dalangpan amo ang Dios, ang Dios nga nagahigugma sa akon.

Aleluya:

Juan 15:15

Ginatawag ko kamo mga abyan, siling sang Ginoo, kay ginsugid ko sa inyo ang tanan nga akon nabatian gikan sa akon Amay. 

Ang Pagbasa sang Santos nga Ebanghelyo suno kay:

San Mateo 13:44-46

“Ang Ginharian sang langit kaangay sang manggad nga ginlubong sa uma. Nasapwan ini sang isa ka tawo kag iya liwat gintampukan. Sa daku nga kalipay naglakat sia kag ginbaligya niya ang tanan niya nga mga pagkabutang, kag nagbalik sa pagbakal sadto nga uma.” “Subong man, ang Ginharian sang langit kaangay sang isa ka negosyante nga nagpangita sang malahalon nga perlas. Sang pagkakita niya sang isa ka perlas nga malahalon, naglakat sia kag ginbaligya niya ang tanan niya nga mga pagkabutang kag ginbakal ang perlas.”

Hulyo 31 | Agosto 2