"Pamatii ang Pulong sang Dios kag Tumana ini"

Liturhiya sang Pulong

(Sabado, Oktubre 13, 2018)

Ang Pagbasa gikan sa Sulat ni San Pablo nga Apostol, sa mga:

Taga-Galacia 3:22-29

Pero ang kasulatan nagasiling nga ang bug-os nga kalibutan yara sa idalom sang gahom sang sala, agod nga mabaton sang mga nagatuo ang ginsaad sang Dios paagi sa pagtuo kay Jesu-Cristo. Pero sang wala pa mag-abot ini nga pagtuo, ginhigtan kita sang Kasugoan subong mga binilanggo tubtob nga mapahayag ining palaabuton nga pagtuo. Gani ang Kasugoan amo ang manunodlo naton tubtob sa pag-abot ni Cristo, agod mapakamatarong kita sa atubangan sang Dios paagi sa pagtuo. Karon kay yari na kita sa panahon sang pagtuo, wala na kita sa idalom sang Kasugoan. Kay paagi sa pagtuo kamo tanan nangin-anak sang Dios paagi sa paghiusa kay Cristo Jesus. Kay ginbautisohan kamo sa paghiusa kay Cristo, gani ginsuklob ninyo ang kinaugali ni Cristo. Gani wala na sing kinatuhay ang mga Judio kag ang mga Gentil, ang mga ulipon kag ang mga hilway, ang mga lalaki kag ang mga babayi. Tanan kamo nangin-isa sa inyo paghiusa kay Cristo Jesus.

Tanan kamo nangin-isa sa inyo paghiusa kay Cristo Jesus. (3:28)

Kon iya kamo ni Cristo, ti mga kaliwat kamo ni Abraham, kag magabaton kamo sang ginsaad sang Dios.

Salmo sa Pagsabat:

Mga Salmo 105:2-3, 4-5, 6-7

Mag-amba kamo sa iya, magkanta kamo sing pagdayaw sa iya; isugid ninyo ang tanan nga makatilingala nga mga binuhatan niya! Magakalipay kamo kay iya kita; ang tanan nga nagaalagad sa GINOO magkalipay! Magdangop kamo sa GINOO agod buligan; magpabilin kamo sa iya atubangan sa gihapon. Kamo nga mga kaliwat ni Abraham nga iya mga alagad, kamo nga mga kaliwat ni Jacob nga iya mga pinili: dumdoma ninyo ang iya gamhanan kag makatilingala nga mga milagro, kag ang mga paghukom sa iya ginhatag. Ang GINOO amo ang aton Dios; ang iya mga sugo para sa bug-os nga kalibutan.

Aleluya:

Lucas 11:28

Bulahan pa gid ang mga nagapamati sang pulong sang Dios kag nagatuman sini.

Ang Pagbasa sang Santos nga Ebanghelyo suno kay:

San Lucas 11:27-28

Sang makahambal si Jesus sini, may isa ka babayi sa tunga sang mga tawo didto nga nagsinggit, “Bulahan ang babayi nga nagbusong kag nagbatiti sa imo.” Pero si Jesus nagsabat, “Bulahan pa gid ang mga nagapamati sang pulong sang Dios kag nagatuman sini!” 

Oktubre 12 | Oktubre 14

"Sa Gahom sang Dios Nagatabog Ako"

Liturhiya sang Pulong

(Biyernes, Oktubre 12, 2018)

Ang Pagbasa gikan sa Sulat ni San Pablo nga Apostol, sa mga:

Taga-Galacia 3:7-14

Gani dapat ninyo talupangdon nga ang mga tawo nga may pagtuo amo ang matuod nga mga kaliwat ni Abraham. Nakita na nga daan sang kasulatan nga ang Dios magapakamatarong sa mga Gentil paagi sa pagtuo. Gani ang kasulatan nagwali nga daan sang Maayong Balita kay Abraham nga nagasiling, “Paagi sa imo pagabendisyunan sang Dios ang tanan nga mga tawo sa kalibutan.” Nagtuo si Abraham kag ginbendisyunan sia sang Dios. Gani ang tanan nga nagatuo ginabendisyunan man subong kay Abraham. Ang nagasalig sa pagtuman sang Kasugoan ginapakamalaut. Kay ang kasulatan nagasiling, “Ang wala nagapadayon sa pagtuman sang tanan nga nasulat sa libro sang Kasugoan ginpakamalaut!” Karon, maathag gid nga wala sing tawo nga ginapakamatarong sa atubangan sang Dios paagi sa pagtuman sang Kasugoan, kay ang kasulatan nagasiling, “Ang ginapakamatarong sa atubangan sang Dios paagi sa pagtuo magakabuhi.” Pero ang Kasugoan wala nasandig sa pagtuo, kundi ang kasulatan nagasiling, “Ang nagatuman sang tanan nga ginasiling sang Kasugoan magakabuhi paagi sa Kasugoan.” Pero si Cristo nga ginpakamalaut tungod sa aton nagtubos sa aton sa pagpakamalaut sang Kasugoan, kay ang kasulatan nagasiling, “Ginapakamalaut ang bisan sin-o nga ginapakabit sa kahoy.” Ginhimo ini ni Cristo agod nga ang bendisyon nga ginsaad sang Dios kay Abraham mahatag man sa mga Gentil paagi kay Cristo Jesus, agod nga kita man paagi sa pagtuo, makabaton sang Espiritu nga ginsaad sang Dios. 

Salmo sa Pagsabat:

Mga Salmo 111:1-2, 3-4, 5-6

Dayawa ang GINOO! Sa bug-os ko nga tagipusoon magapasalamat ako sa GINOO,  sa pagtilipon sang iya mga tawo. Daw ano ka makatilingala sang mga butang nga ginahimo sang GINOO! Ang tanan nga nalipay sang iya nga binuhatan naluyag maghangop sini. Ang tanan nga iya ginahimo puno sang kadungganan kag pagkahalangdon, ang iya pagkamatarong wala sing katapusan. Ang Ginoo nagapadumdom sa aton sang iya makatilingala nga mga binuhatan, maayo sia kag maluloy-on. Nagahatag sia sing kalan-on sa mga nagatahud sa iya; wala sia nagakalipat sang iya kasugtanan. Ginpakita niya ang iya gahom sa iya mga tawo, sa paghatag sa ila sang mga duta sang mga dumoluong.

Aleluya:

Juan 12:31-32

Ang nagagahom sining kalibutan pagadag-on, kon ako mabayaw na gikan sa duta, buyokon ko ang tanan nga mga tawo sa akon, siling sang Ginoo.

Ang Pagbasa sang Santos nga Ebanghelyo suno kay:

San Lucas 11:15-26

Ugaling ang iban sa ila nagsiling, “Si Beelzebul nga hari sang mga yawa ang naghatag sa iya sing gahom sa pagtabog sa ila.” Ang iban luyag magdakupdakop sa iya, gani nagpangayo sila nga maghimo sia sing milagro sa pagpamatuod nga ang Dios nahamuot sa iya. Pero si Jesus nga nakahibalo sang ila mga panghunahona nagsiling sa ila, “Kon ang mga pumoluyo sang isa ka pungsod nagabinahinbahinay kag nagailinaway, ina nga pungsod malaglag. Ang panimalay nga nagabinahinbahinay magabuloblag. Gani, kon ang ginharian ni Satanas magbinahinbahinay, paano bala ini makapadayon? Suno sa inyo nagatabog ako sang mga yawa tungod sang gahom nga ginhatag sa akon ni Beelzebul. Kon nagatabog ako sang yawa paagi kay Beelzebul, sa ano bala nga paagi ang inyo mga sumolunod nagatabog sang yawa? Gani, ang inyo mga sumolunod nagapamatuod nga sayop gid kamo! Sa gahom sang Dios nagatabog ako sang mga yawa, kag ini nagapamatuod nga ang Ginharian sang Dios nakaabot na sa inyo. “Kon ang isa ka makusog nga tawo nga lupit sa hinganiban nagabantay sang iya kaugalingon nga balay, indi maano ang tanan niya nga pagkabutang. Pero kon gubaton sia sang mas makusog pa nga tawo kag madaog sia, maagaw sang makusog nga tawo ang tanan niya nga mga hinganiban nga ginasaligan, kag pamartidahon niya ang iya mga inagaw. “Ang wala nagadampig sa akon batok sa akon, kag ang wala nagabulig sa akon sa pagpanipon nagapaaplaag.” “Kon ang malaut nga espiritu maggwa sa isa ka tawo, nagapanglugayawan sia sa mamala nga mga duog nga wala sing tubig sa pagpangita sing palahuwayan. Kon wala sia sing may makita, nagasiling sia sa iya kaugalingon, ‘Mabalik ako sa akon ginhalinan.’ Sa pagbalik niya, iya nakita nga ang iya ginhalinan matinlo kag nahimos na. Dayon magalakat sia kag manghagad sang pito ka espiritu nga mas malaut pa sa iya. Magasulod sila kag magaestar sa sadto nga tawo. Gani, ini nga tawo magamalaut pa gid sang sa una niya nga kahimtangan.” 

Oktubre 11 | Oktubre 13

"Daw ano pa gid ang Inyo Amay nga Langitnon Maghatag"

Liturhiya sang Pulong

(Huwebes, Oktubre 11, 2018)

Ang Pagbasa gikan sa Sulat ni San Pablo nga Apostol, sa mga:

Taga-Galacia 3:1-5

Buangboang nga mga taga-Galacia! Sin-o bala ang nagganyat sa inyo? Sa atubangan ninyo ginpaathag ang pagkapatay ni Jesu-Cristo sa krus! Sugiri ninyo ako sining isa lang ka butang: nabaton bala ninyo ang Espiritu sang Dios paagi sa pagtuman sang Kasugoan, ukon paagi sa pagpamati kag pagtuo sang Maayong Balita? Daw ano ka buangboang sa inyo! Nagsugod kamo paagi sa Espiritu sang Dios, karon luyag bala ninyo nga tapuson ini paagi sa inyo kaugalingon nga gahom? Nanginwalay pulos bala ang tanan ninyo nga inagihan? Matuod gid nga may pulos ini! Ginahatagan bala kamo sang Dios sang Espiritu kag nagahimo bala kamo sang mga milagro tungod kay nagatuman kamo sang Kasugoan, ukon tungod sang inyo pagpamati kag pagtuo sa Maayong Balita? 

Kalantahon sa Pagsabat:

San Lucas 1:69-70, 71-72, 73-75

Ginbangon niya Ang isa ka gamhanan nga Manlulowas Para sa aton, Ang isa nga kaliwat ni David Nga iya alagad. Amo ini ang iya ginsiling sang una Paagi sa iya balaan nga mga propeta: Nagsaad sia sa pagluwas sa aton Gikan sa aton mga kaaway, Kag sa gahom sang tanan Nga nagadumot sa aton. Nagsiling sia nga kaluoyan niya Ang aton mga ginikanan, Kag dumdomon niya Ang iya balaan nga kasugtanan. Nagsaad sia sa aton amay Nga si Abraham, Kag nagsumpa nga luwason niya kita Sa aton mga kaaway, Kag tugotan kita sa pag-alagad sa iya Nga walay kahadlok, Nga manginbalaan kag matarong Sa iya atubangan, Sa tanan nga mga inadlaw Sang aton kabuhi. 

Aleluya:

Binuhatan 16:14

Ginbuksan sang Ginoo ang iya painuino sa pagbaton sang mga ginhambal ni Pablo. 

Ang Pagbasa sang Santos nga Ebanghelyo suno kay:

San Lucas 11:5-13

Kag si Jesus nagsiling sa iya mga gintuton-an, “Abi may isa sa inyo nga magkadto sa balay sang iya amigo sa tungang gab-i kag magsiling sa iya, ‘Abyan, pahulama ako sing tatlo ka bilog nga tinapay, kay may amigo ako nga nagapanglakaton nga nag-abot sa balay kag wala gid ako sing ipakaon sa iya.’ Kag abi, ang imo amigo magsabat didto sa sulod sang iya balay, ‘Indi ako pagtublaga! Nakapanirado na kami, nagahigda na ako kag ang akon kabataan, mabudlay na ang magbangon sa paghatag sa imo sing bisan ano.’ Ti, ano karon? Nagasiling ako sa inyo, bisan nga indi sia magbangon sa paghatag sa imo sing tinapay tungod sang inyo pag-abyanay, pero tungod sang imo pagpamilit nga wala gid huyahoya magabangon sia kag magahatag sa imo sang imo kinahanglanon. Gani nagasiling ako sa inyo: Pangayo kamo, kag kamo magabaton, pangita kamo kag kamo makakita, panuktok kamo kag ang puwertahan pagabuksan sa inyo. Kay ang tagsatagsa nga nagapangayo magabaton, kag ang nagapangita makakita, kag ang puwertahan pagabuksan sa iya nga nagapanuktok. Kamo nga mga amay, may isa bala sa inyo nga magahatag sa iya bata sing man-og kon ang iya ginapangayo isda? Hatagan mo bala sia sing iwiiwi kon ang iya ginapangayo itlog? Kon kamo nga mga malaut makahibalo maghatag sing maayo nga butang sa inyo mga kabataan, daw ano pa gid ang inyo Amay nga langitnon. Magahatag sia sang Espiritu Santo sa mga nagapangayo sa iya.” 

Oktubre 10 | Oktubre 12

"Ginoo, Tudloi Kami sa Pagpangamuyo"

Liturhiya sang Pulong

(Miyerkules, Oktubre 10, 2018)

Ang Pagbasa gikan sa Sulat ni San Pablo nga Apostol, sa mga:

Taga-Galacia 2:1-2, 7-14

Sang makaligad ang 14 ka tuig, nagbalik ako sa Jerusalem upod kay Bernabe. Gindala ko man si Tito upod sa akon. Nagkadto ako didto kay ang Dios nagpahayag sa akon nga kinahanglan magkadto ako. Nagpakigsapol ako sa mga pangulo lang sang iglesia, kag ginsaysay ko sa ila ang Maayong Balita nga ginawali ko sa mga Gentil. Indi ako luyag nga ang pagpangabudlay ko sang una ukon karon, manginwalay pulos. Sa baylo, nakita nila nga ang Dios naghatag sa akon sing bulohaton sa pagwali sang Maayong Balita sa mga Gentil, subong sang paghatag niya kay Pedro sing bulohaton sa pagwali sang Maayong Balita sa mga Judio. Kay sa gahom sang Dios ginhimo ako nga isa ka apostol sa nga Gentil subong nga si Pedro ginhimo nga apostol sa nga Judio. Si Santiago, si Pedro, kag si Juan, nga daw amo ang mga pangulo, nagkilala nga ang Dios naghatag sa akon sining pinasahi nga bulohaton. Gani ginbaton nila ako kag si Bernabe. Kag naghilisugot kamo tanan nga kami nga duha ni Bernabe magapangabudlay sa mga Gentil kag sila ila sa mga Judio. Ang ila lamang ginapangayo amo nga dumdomon namon ang mga imol sa ila grupo, nga amo gid man ang ginatinguhaan ko nga himuon. Sang pag-abot ni Pedro sa Antioquia, nagpamatok ako sa iya sa atubangan sang madamo nga mga tawo kay maathag gid nga sayop sia. Kay sang wala pa makaabot ang mga ginpadala ni Santiago, nagkaon si Pedro upod sa Gentil nga mga kautoran. Pero sang nakaabot na sila, naghalin sia kag indi na gid sia magkaon upod sa ila kay nahadlok sia sa mga nagasiling nga kinahanglan ang mga Gentil tulion. Ang iban nga mga kautoran nga Judio nahadlok man subong kay Pedro, kag bisan pa gani si Bernabe nadala man sa ila katalaw. Sang makita ko nga wala sila nagaginawi sing matadlong suno sa kamatuoran sang Maayong Balita, ginsilingan ko si Pedro sa atubangan nila tanan, “Ikaw isa ka Judio, pero nagakabuhi ka subong isa ka Gentil, kag indi subong isa ka Judio. Paano karon ang pagpilit mo sa mga Gentil sa pagkabuhi subong mga Judio?” 

Salmo sa Pagsabat:

Mga Salmo 117:1-2

Dayawa ninyo ang GINOO, tanan nga mga kapungsoran! Dayawa ninyo siya, tanan nga mga katawuhan! Ang iya mapinadayunon nga gugma para sa aton malig-on, kag ang iya katutom wala sing katapusan. Dayawa ang GINOO!

Aleluya:

Roma 8:15

Iya kamo ginahimo nga mga anak sang Dios, kag paagi sa gahom sang Espiritu nagapanawag kita sa Dios: O Amay! Amay ko!

Ang Pagbasa sang Santos nga Ebanghelyo suno kay:

San Lucas 11:1-4

Isa sadto ka tion si Jesus nagapangamuyo sa isa ka duog. Sang pagkatapos niya, ang isa sang iya mga gintuton-an nagsiling sa iya, “Ginoo, tudloi kami sa pagpangamuyo, subong nga si Juan nagtudlo man sang iya mga gintuton-an.” Si Jesus nagsiling sa ila, “Magpangamuyo kamo sing subong sini: ‘Amay, Kabay nga magkari ang imo Ginharian. Hatagi kami adlaw-adlaw sang kalan-on Nga amon kinahanglanon. Patawara kami sang amon mga sala, Kay ginapatawad man namon Ang tanan nga nakasala sa amon. Indi kami pag-ipadaog sa mga pagsulay.’ ” 

Oktubre 9 | Oktubre 11

"Nagapalibog ka - pero Isa gid lang ang Kinahanglan"

Liturhiya sang Pulong

(Martes, Oktubre 9, 2018)

Ang Pagbasa gikan sa Sulat ni San Pablo nga Apostol, sa mga:

Taga-Galacia 1:13-24

Ginsugiran na kamo nahanungod sa akon pagkabuhi sang matutom pa ako sa pagtuloohan sang mga Judio, kon paano ang paghingabot ko sa iglesia sang Dios nga wala sing luoyluoy, kag sang akon pagtinguha sa paglaglag sini. Sa pagtuman ko sa pagtuloohan sang mga Judio nalabawan ko ang madamo nga katubotubo ko nga mga Judio, kay may kakugi ako sa pagsunod sang ginpaalinton nga mga pagsulondan sang aton mga katigulangan. Pero ang Dios, sa iya kaayo, nagpili sa akon sa wala pa ako matawo, kag gintawag niya ako sa pag-alagad sa iya. Kag sang ginpakamaayo niya nga ipahayag niya ang iya Anak sa akon, agod mawali ko ang Maayong Balita sa mga Gentil nahanungod sa iya, wala ako magpangayo sing laygay sa bisan kay sin-o nga tawo, ukon magkadto sa Jerusalem sa pagpakigkita sa mga apostoles nga una pa sa akon. Sa baylo, nagkadto ako gilayon sa Arabia, kag nagbalik sa Damasco. Sang makaligad ang tatlo ka tuig, nagkadto ako sa Jerusalem sa pagpakigkita kay Pedro, kag nagpabilin ako upod sa iya sing duha ka simana. Wala ako sing may nakita nga iban nga mga apostoles luas lamang kay Santiago, nga utod sang Ginoo. Ang akon ginasulat sa inyo matuod. Wala ako nagabutig sa atubangan sang Dios! Pagkatapos sini nagkadto ako sa Siria kag sa Cilicia. Sa sadto nga tion wala pa ako makilal-i sang mga katapo sang Cristohanon nga mga iglesia sa Judea. Ang nahibal-an lang nila amo ang ginsugid sa ila sang iban nga nagsiling, “Ang nagahingabot anay sa aton nagwali na karon sang pagtuo nga iya anay gintinguhaan nga laglagon!” Gani, gindayaw nila ang Dios tungod sa akon.

Salmo sa Pagsabat:

Mga Salmo 139:1-3, 13-14, 14-15

O GINOO, gin-usisa mo ako, kag nakilala mo ako. Nahibaluan mo ang tanan nga ginahimo ko; gikan sa malayo nahangpan mo ang akon mga panghunahona. Makita mo ako, bisan nagaobra ukon nagapahuway ako, nahibaluan mo ang tanan ko nga mga ginahimo. Ginhimo mo ang tanan nga mga bahin sang akon lawas; gintaod mo ako sa tiyan sang akon iloy. Ginadayaw ko ikaw kay dapat ka tahuron; ang tanan mo nga ginahimo makatalanhaga kag makatilingala. Nahibal-an ko ini sa bug-os ko nga tagipusoon. Nakita mo ang pagdihon sang akon mga tul-an, nga gintaod sing mainandamon sa tiyan sang akon iloy, sang nagatubo ako didto nga indi makita.

Aleluya:

Lucas 11:28

Bulahan pa gid ang mga nagapamati sang pulong sang Dios kag nagatuman sini.

Ang Pagbasa sang Santos nga Ebanghelyo suno kay:

San Lucas 10:38-42

Sang nagpadayon si Jesus kag ang iya mga gintuton-an sang ila pagpanglakaton, nakaabot sia sa isa ka baryo. Didto ginbaton sia sang isa ka babayi nga ginahingalanan kay Marta sa iya balay. Si Marta may utod nga babayi nga ginahingalanan kay Maria nga naglingkod sa tiilan sang Ginoo sa pagpamati sang iya pagpanudlo. Si Marta indi na makaarapal sang madamo nga mga hilikuton, gani nagpalapit sia kay Jesus kag nagsiling, “Ginoo, wala ka bala nagakabalaka nga ginapabayaan lang ako sang akon utod sa mga hilimuson? Singgana sia nga magbulig sia sa akon.” Ang Ginoo nagsabat sa iya, “Marta, Marta, nagapalibog ka, kag indi ka mapahamtang tungod sang madamo nga mga butang, pero isa gid lang ang kinahanglan. Husto ang ginpili ni Maria, kag ina indi makuha sa iya.”

Oktubre 8 | Oktubre 10

"Lakat ka kag Himoa ang subong man"

Liturhiya sang Pulong

(Lunes, Oktubre 8, 2018)

Ang Pagbasa gikan sa Sulat ni San Pablo nga Apostol, sa mga:

Taga-Galacia 1:6-12

Natingala gid ako nga kadali sa inyo magbiya sa Dios nga nagtawag sa inyo paagi sa grasya ni Cristo, kag magsunod sa iban nga maayong balita. Kon sa bagay, wala na sing “iban pa nga maayong balita,” pero ginasiling ko ini sa inyo tungod kay may iban nga mga tawo nga nagatublag sa inyo kag luyag magpatiko sang Maayong Balita ni Cristo. Pero bisan kami, ukon ang isa ka anghel gikan sa langit, ang magwali sing isa ka maayong balita nga lain sang sa amon ginwali sa inyo, kabay nga kondenahon sia sa impiyerno! Ginsiling na namon ini sang una, kag karon akon ginasiling liwat: ang bisan sin-o nga nagawali sang isa ka maayong balita nga lain sang sa inyo nabaton, kabay nga kondenahon sia sa impiyerno! Nagakahulogan bala ini nga luyag ako mahamut-an sang mga tawo? Indi! Luyag ako nga mahamut-an sang Dios! Nagatinguha bala ako sa pagpaayon sa mga tawo? Kon amo pa ini ang ginahimo ko, kuntani indi ako alagad ni Cristo. Ginasugiran ko kamo, mga utod, nga ang Maayong Balita nga akon ginawali wala nagikan sa tawo. Wala ko ini nabaton sa bisan kay sin-o, ukon may nagtudlo sini sa akon, kundi si Jesu-Cristo mismo amo ang nagpahayag sini sa akon. 

Salmo sa Pagsabat:

Mga Salmo 111:1-2, 7-8, 9, 10

Dayawa ang GINOO! Sa bug-os ko nga tagipusoon magapasalamat ako sa GINOO,  sa pagtilipon sang iya mga tawo. Daw ano ka makatilingala sang mga butang nga ginahimo sang GINOO! Ang tanan nga nalipay sang iya nga binuhatan naluyag maghangop sini. Matutom sia kag matarong sa tanan nga iya ginahimo, masaligan ang tanan niya nga mga sugo. Nagapadayon ini sa tanan nga panahon, ginhatag ini suno sa kamatuoran kag katarungan. Ginluwas niya ang iya mga tawo, kag naghimo sia sing walay katapusan nga kasugtanan sa ila. Balaan kag gamhanan sia! Ang pagtahod sa GINOO amo ang paagi nga magmaalam ang tawo; nagahatag sia sing husto nga paghukom sa tanan nga nagatuman sang iya mga sugo. Dapat sia dayawon sa walay katapusan!

Aleluya:

Juan 13:34

Ginahatag ko sa inyo ang isa ka bag-o nga sugo: maghigugmaanay kamo subong nga ako nagahigugma sa inyo. 

Ang Pagbasa sang Santos nga Ebanghelyo suno kay:

San Lucas 10:25-37

Dayon may isa ka manunodlo sang Kasugoan nga nagtindog sa pagdakupdakop kay Jesus paagi sa isa ka pamangkot, “Manunodlo, ano bala ang himuon ko agod maangkon ko ang kabuhi nga wala sing katapusan?” Si Jesus nagsabat, “Ano bala ang ginasiling sang mga Kasulatan? Ano bala ang kahulogan sini sa imo?” Ang tawo nagsabat, “ ‘Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, sa bug-os mo nga kusog, kag sa bug-os mo nga hunahona,’ kag, ‘Higugmaa ang imo isigkatawo subong sang imo kaugalingon.’ ” Si Jesus nagsabat, “Husto ang imo sabat. Himoa ini kag magakabuhi ka.” Pero ang manunodlo sang Kasugoan buot magpakamatarong sang iya kaugalingon, gani ginpamangkot niya si Jesus, “Sin-o bala ang akon isigkatawo?” Si Jesus nagsabat, “May isa ka tawo nga nagdulhog pakadto sa Jerico halin sa Jerusalem nga ginbanggaan sang mga buyong. Ginkuha nila ang iya tanan nga pagkabutang pati ang iya bayu, ginbakol sia kag ginbayaan nga daw sa patay na. May nag-agi nga isa ka pari sa sina nga dalan. Sang pagkakita niya sang tawo, naglikaw sia sa pihak sang dalan. Sa amo man nga dalan may nag-agi nga isa ka Levita, kag sang pagkakita niya sang tawo iya lang gintan-aw kag naglikaw sia sa pihak sang dalan. Pero may isa ka Samariahanon nga nakaagi sa amo nga dalan. Sang pagkakita niya sang tawo naluoy gid sia.

Sang pagkakita niya sang tawo naluoy gid sia. (10:33)

Ginpalapitan niya ang tawo, ginhaplasan niya sing lana kag bino ang iya sini mga pilas kag ginbugkosan. Dayon ginpasakay niya sia sa iya kaugalingon nga asno, gindala sa dalayunan kag gin-atipan niya sia. Sang madason nga adlaw nagkuha sia sing P40 kag ginhatag niya ini sa tag-iya sang dalayunan. Nagsiling sia sa iya, ‘Tatapa sia, kag sa akon pagbalik bayaran ko ikaw sang tanan nga magasto mo sa iya.’ ” Dayon si Jesus nagpamangkot, “Ti, sa imo abi, sin-o bala sa sining tatlo, ang nangin-isigkatawo sining tawo nga ginbanggaan sang mga buyong?” Nagsabat sia, “Yadtong nagkaluoy gid sa iya.” Si Jesus nagsiling, “Ti, lakat ka kag himoa ang subong man.” 

Oktubre 7 | Oktubre 9

"Indi dapat Bulagon sang Tawo ang Ginhiusa sang Dios"

Liturhiya sang Pulong

(Domingo, Oktubre 7, 2018)

1. Ang Pagbasa gikan sa Libro sang:

Genesis 2:18-24

Dayon ang GINOONG Dios nagsiling, “Indi maayo nga ang tawo magpangabuhi nga isahanon lamang. Himuan ko sia sing kaupod nga bagay sa iya sa pagbulig sa iya.” Gani nagkuha sia sing duta kag ginhimo ang tanan nga mga kasapatan kag ang tanan nga mga kapispisan, kag gindala niya ini sa tawo sa pagtan-aw kon ano ang ipahingalan niya sa ila. Ang ngalan nga ginhatag sang tawo sa tagsa sa ila amo ang nanginngalan nila. Gani ang tawo naghingalan sang tanan nga mga kapispisan kag sang tanan nga mga kasapatan. Pero wala gid sing isa sa ila nga bagay manginkaupod niya sa pagbulig sa iya. Dayon ginpatulog sang GINOONG Dios ang tawo sing hamuok gid, kag sang nagakatulog sia ginkuha sang Dios ang isa ka gusok niya kag dayon ginpapali ang unod sa sina nga bahin sang lawas. Ang gusok nga ginkuha niya sa lalaki ginhimo niya nga babayi kag gindala niya ini nga babayi sa lalaki. Dayon ang lalaki nagsiling: “Karon, yari ang pareho sa akon, Tul-an nga ginkuha sa akon tul-an, Kag unod nga ginkuha sa akon unod. Tawgon sia nga ‘Babayi,’ Kay ginkuha sia sa lalaki.” Tungod sini, ang lalaki magabiya sang iya amay kag iloy kag magapuyo upod sa iya asawa, kag sila nga duha mangin-isa. 

Salmo sa Pagsabat:

Mga Salmo 128:1-2, 3, 4-5, 6

Bulahan ang mga nagatahod sa Ginoo, nga nagakabuhi suno sa iya mga sugo! Ang imo kinabudlayan mangintuman sa imo mga kinahanglanon, manginmalipayon ka kag manginmainuswagon. Ang imo asawa manginkaangay sang mabinungahon nga ubas sa imo balay, kag ang imo mga anak nga lalaki manginkaangay sang linghod nga kahoy nga olivo sa palibot sang imo lamesa. Ang tawo nga nagatuman sa Ginoo pagabendisyunan kaangay sini. Kabay nga ang Ginoo magabendisyon sa imo gikan sa Sion! Kabay nga makita mo ang Jerusalem nga gauswag sa bug-os nga mga inadlaw sang imo kabuhi! Kabay nga makakita ka pa sang imo mga kaapuhan! Ang paghidait manginyara sa Israel! 

2. Ang Pagbasa gikan sa Sulat ni San Pablo nga Apostol, sa mga:

Taga-Hebreo 2:9-11

Pero karon nakita naton si Jesus! Kay sa malip-ot nga tion ginhimo sia nga kuboskubos lamang sa mga anghel, agod nga paagi sa grasya sang Dios dapat sia mapatay tungod sa tanan nga mga tawo. Karon makita naton sia nga nakoronahan sang himaya kag dungog tungod sang kamatayon nga iya gin-antos. Nagakabagay gid man nga ang Dios, nga nagatuga kag nagatipig sang tanan nga mga butang, maghimpit kay Jesus paagi sa mga pag-antos, agod madala ang madamo nga mga anak sa pag-ambit sang iya himaya. Kay si Jesus amo ang nagapangulo sa ila padulong sa kaluwasan. Ginapaputli niya ang mga tawo sa ila mga sala, kag sia kag ang mga tawo nga ginpaputli may isa lamang ka Amay. Tungod sini si Jesus wala mahuya sa pagtawag sa ila nga iya mga utod. 

Aleluya:

1 Juan 4:12

Kon nagahigugmaanay kita, ang Dios nagakabuhi sa aton kag ang iya gugma nahimpit sa aton. 

Ang Pagbasa sang Santos nga Ebanghelyo suno kay:

San Marcos 10:2-16

May pila ka mga Fariseo nga nagpalapit sa iya, kag sa pagdakupdakop sa iya, nagpamangkot sila, “Sugiri kami, tugot bala sa aton Kasugoan nga ang isa ka tawo magbulag sa iya asawa?” Si Jesus nagsabat paagi sa isa ka pamangkot, “Ano bala ang kasugoan nga ginhatag ni Moises sa inyo?” Nagsabat sila, “Si Moises nagtugot nga ang bana maghimo sing papeles sa pagbulagay kag ugaling magbiya sia sa iya asawa.” Si Jesus nagsiling sa ila, “Ginsulat ni Moises ining kasugoan para sa inyo, tungod kay matig-a gid ang inyo mga tagipusoon. Pero sa ginsugoran, sang pagtuga sang Dios sang kalibutan, ginsiling ini, ‘Ang Dios naghimo sa ila nga lalaki kag babayi. Kag tungod sini, ang lalaki magabiya sang iya amay kag iloy, kag magapuyo upod sa iya asawa, kag sila nga duha mangin-isa.’ Gani, indi na sila duha, kundi isa. Gani, indi dapat bulagon sang tawo ang ginhiusa sang Dios.” Sang pagbalik na nila sa balay, ang mga gintuton-an nagpamangkot liwat kay Jesus nahanungod sini nga butang. Nagsiling sia sa ila, “Ang lalaki nga magbulag sa iya asawa kag magpangasawa liwat, nagapanginbabayi. Amo man ang babayi nga magbulag sa iya bana kag magpamana liwat nagapanginlalaki.” May mga tawo nga nagdala sing mga bata sa kay Jesus agod iya sila matandog, pero ginsaway sang mga gintuton-an ang mga tawo nga nagdala sa ila. Sang matalupangdan ini ni Jesus, naakig sia kag nagsiling sa iya mga gintuton-an, “Pabay-i ninyo ang mga kabataan nga magpalapit sa akon, kag indi ninyo sila pagpunggi, kay ang Ginharian sang Dios iya sang mga kaangay nila. Dumdoma ninyo ini! Ang bisan sin-o nga indi magbaton sang Ginharian sang Dios subong sang isa ka bata indi gid makasulod sa amo nga Ginharian.” Dayon ginkugos ni Jesus ang mga kabataan, iya gintungtong ang iya mga kamot sa tagsatagsa sa ila, kag iya sila ginbendisyunan.

Oktubre 6 | Oktubre 8

"Ang Inyo Ngalan Nasulat sa Langit"

Liturhiya sang Pulong

(Sabado, Oktubre 6, 2018)

Ang Pagbasa gikan sa Libro ni:

Job 42:1-3, 5-6, 12-16

Dayon si Job nagsabat sa Ginoo. O Ginoo nakahibalo ako nga ikaw labi ka gamhanan, nga makahimo ka sang tanan nga luyag mo. Nagapamangkot ka kon ngaa nakapangahas ako sa pagpangduhadoha sa imo kaalam nga kon sa bagay ako kulang sa ihibalo. Naghambal ako sang mga butang nga wala ko mahangpi, nahanungod sang mga katingalahan nga labaw sa akon mahibaluan. Sang una ang nahibal-an ko lamang nahanungod sa imo amo ang ginsugid sang iban sa akon, pero karon nakita ko gid ikaw sang akon mga mata. Gani nahuya ako sang tanan nga ginhambal ko kag nagahinulsol ako nga nagapungko sa yab-ok kag sa abo. Ang Ginoo nagpabugana sang naulihi nga bahin sang kabuhi ni Job labaw pa sang iya pagpabugana sang una. Si Job may 14,000 ka mga karnero, 6,000 ka mga kamelyo, 2,000 ka mga baka, kag 1,000 ka mga asno. May pito sia ka mga anak nga lalaki kag tatlo ka mga anak nga babayi. Ang magulang gid ginhingalanan niya kay Jemima, ang ikaduha kay Kesia, kag ang kamanghuran kay Keren-Hapok. Wala na sing mga babayi sa bug-os nga kalibutan nga pareho katahom sang mga anak ni Job. Ang ila amay naghatag sa ila sang ila palanublion upod sa ila mga tuod nga lalaki. Sa tapos sini si Job nagkabuhi sing 140 pa ka tuig, kag nakakita pa sia sang iya mga apo kag mga apo sa tuhod.

Salmo sa Pagsabat:

Mga Salmo 119:66, 71, 75, 91, 125, 130

Hatagi man ako sing kaalam kag ihibalo, kay nagasalig ako sa imo mga sugo. Ang akon silot maayo para sa akon, kay ini nagtudlo sa akon sa pagtuon sang imo mga sugo. O GINOO, nakahibalo ako nga ang imo mga pagsulondan matarong, kag ginsilutan mo ako kay ikaw matutom. Ang tanan nga mga butang nagapadayon tubtob karon tungod sang imo sugo, kay ini tanan imo mga alagad. Alagad mo ako, gani hatagi ako sing paghangop, agod akon mahibaluan ang imo mga pagtulon-an. Ang kasaysayan sang imo mga pagtulon-an nagahatag sing kapawa, kag nagahatag sing kaalam sa mga wala sing tinun-an.

Aleluya:

Mateo 11:25

O Amay, Ginoo sang langit kag duta, ginpahayag mo sa mga di-maalam, ang ginlipdan mo sa mga maalam kag may mataas nga tinun-an.

Ang Pagbasa sang Santos nga Ebanghelyo suno kay:

San Lucas 10:17-24

Ang 72 nagbalik nga puno sang kalipay. Nagsiling sila, “Ginoo, bisan pa ang mga yawa nagtuman sa amon tungod sa imo ngalan!” Si Jesus nagsabat sa ila, “Nakita ko si Satanas nga nahulog subong sang kilat gikan sa langit. Pamatii ninyo ini! Ginhatag ko sa inyo ang gahom sa pagtapak sa mga man-og kag mga iwiiwi, kag sang tanan nga gahom sang Kaaway, kag wala sing bisan ano nga makahalit sa inyo. Pero indi kamo magkalipay tungod kay ang malaut nga mga espiritu nagatuman sa inyo, kundi magkalipay kamo kay ang inyo ngalan nasulat sa langit.” Sa amo nga takna si Jesus nga puno sing kalipay sang Espiritu Santo nagsiling, “O Amay, Ginoo sang langit kag duta, nagapasalamat ako sa imo kay ang imo gintago sa mga maalam kag may tinun-an imo ginpakita sa indi mga maalam. Huo, Amay, kay amo ini ang ginpakamaayo mo. “Gintugyan sa akon sang Amay ang tanan nga butang. Wala sing may nakakilala sa Anak luas sa Amay, kag wala sing may nakakilala sa Amay luas sa Anak kag sa mga luyag sang Anak ipahayag ang Amay.” Dayon si Jesus nag-atubang sa iya mga gintuton-an kag nagsiling sini sa ila lamang, “Bulahan kamo nga makakita sang mga butang nga inyo ginatan-aw. Nagasiling ako sa inyo nga madamo sang mga propeta kag mga hari ang naghandom sa pagtan-aw sang inyo ginatan-aw karon, pero indi sila makakita, kag sa pagpamati sa inyo ginapamatian, pero wala sila makabati.” 

Oktubre 5 | Oktubre 7

"Ang Nagapamati sa Inyo, Nagapamati sa Akon"

Liturhiya sang Pulong

(Biyernes, Oktubre 5, 2018)

Ang Pagbasa gikan sa Libro ni:

Job 38:1, 12-21; 40:3-5

Gikan sa bagyo ang Ginoo naghambal kay Job, sa bug-os mo nga pagkabuhi nakamando ka bala sang adlaw nga magpamanagbanag? Nakasugo ka bala sa pamanagbanag sa pagtugob sang duta kag nagapagwa sang mga malaut sa ila palanaguan? Ang kasanag sang adlaw nagapakita sing maathag sang mga bakulod kag mga kapatagan kaangay sang pinil-an sang bayu. Ang kapawa sang adlaw tama kasanag para sa malaut, kag nagaupang sa ila sa paghimo sing kalautan. Nakakadto ka bala sa mga tuboran sa kaidadalman sang dagat? Nakalakat ka bala sa kadadalman sang kadagatan? May nagpatan-aw bala sa imo sang mga puwerta nga nagatakop sang madulom nga kalibutan sang mga patay? Nakahibalo ka bala kon daw ano kadaku sang kalibutan? Sabta ako, kon nahibaluan mo ini tanan. Nakahibalo ka bala kon diin nagahalin ang kapawa? Ukon ang ginahalinan sang kadudolman? Matudloan mo bala sila kon daw ano kalayo ang ila kaladtuan, ukon mapabalik mo bala sila? Napat-od ko nga mahimo mo, kay tigulang na gid ikaw, kag natawo na ikaw sang pagtuga sang kalibutan. O GINOO, naghambal ako sing binuang. Ano ang isabat ko? Indi na ako maghambal bisan ano. Sobra na ang akon ginhambal.

Salmo sa Pagsabat:

Mga Salmo 139:1-3, 7-8, 9-10, 13-14

O GINOO, gin-usisa mo ako, kag nakilala mo ako. Nahibaluan mo ang tanan nga ginahimo ko; gikan sa malayo nahangpan mo ang akon mga panghunahona. Makita mo ako, bisan nagaobra ukon nagapahuway ako, nahibaluan mo ang tanan ko nga mga ginahimo. Diin bala ako makadto agod makapalagyo sa imo Espiritu? Diin ako makadto agod makapalayo sa imo atubangan? Kon magsaka ako sa langit, didto ikaw; kon maghigda ako sa duog sang mga patay didto man ikaw. Kon maglupad ako sa unhan sang sidlangan, ukon magpuyo sa pinakalayo nga duog sa nakatundan, didto ikaw sa pagtuytoy sa akon, didto ikaw sa pagbulig sa akon. Ginhimo mo ang tanan nga mga bahin sang akon lawas; gintaod mo ako sa tiyan sang akon iloy. Ginadayaw ko ikaw kay dapat ka tahuron; ang tanan mo nga ginahimo makatalanhaga kag makatilingala. Nahibal-an ko ini sa bug-os ko nga tagipusoon.

Aleluya:

Mga Salmo 95:8

Indi kamo magpakatig-a subong sang inyo mga katigulangan didto sa Meriba, subong sang didto sila sa desierto sa Masa.

Ang Pagbasa sang Santos nga Ebanghelyo suno kay:

San Lucas 10:13-16

“Kailo ka man, Corazin! Kailo ka man, Betsaida! Kay kon ang mga milagro nga ginhimo sa inyo ginhimo sa Tiro kag Sidon, dugay na kuntani ang mga tawo didto nagpungko, nagbayu sing sako kag nagbutang sing abo sa ila ulo sa pagpakita nga nagbiya sila sa ila mga sala. Sa Adlaw sang Paghukom sobra pa nga silot ang inyo pagabatunon sang sa Tiro kag sa Sidon. Kag ikaw, Capernaum, luyag ka bala magbayaw sang imo kaugalingon sa langit? Ihaboy ka sa impiyerno!” Nagsiling si Jesus sa iya mga gintuton-an, “Ang nagapamati sa inyo, nagapamati sa akon. Ang nagasikway sa inyo, nagasikway sa akon. Kag ang nagasikway sa akon, nagasikway man sa iya nga nagpadala sa akon.” 

Oktubre 4 | Oktubre 6

"Ang Ginharian sang Dios Malapit na sa Inyo"

Liturhiya sang Pulong

(Huwebes, Oktubre 4, 2018)

Ang Pagbasa gikan sa Libro ni:

Job 19:21-27

Mga abyan ko kamo! Kaluoyi ninyo ako! Ginpatup-an ako sang Dios sang iya kamot. Ngaa nga ginahingabot ninyo ako subong sang paghingabot sang Dios? Indi bala sobra na ang inyo pagsakit sa akon? Maayo kuntani kon may isa nga nagasulat sang akon ginahambal, kag may nagabutang sang akon mga pulong sa isa ka libro! Ukon magsinsil sang akon mga pulong sa bato, kag masulat ini agod magapadayon sa wala sing katapusan. Pero nakahibalo ako nga sa langit may isa nga magakari sa ulihi sa pag-apin sa akon. Bisan sa tapos ang akon panit madunot sa balatian, sa sini nga lawas makita ko ang Dios. Makita ko sia sang akon kaugalingon nga mga mata, kag indi sia mangindumoluong. Nagakadula ang akon kaisog tungod kamo nagsiling.

Salmo sa Pagsabat:

Mga Salmo 27:7-8, 8-9, 13-14

Pamatii ako, O GINOO, sa akon pagpanawag sa imo! Kaluoyi kag sabta ako! Nagsiling ka, “Kari ka sa akon.” Nagsabat ako, “Mapalapit ako, O GINOO.” Indi ka magpanago sa akon! Indi ka magkaakig sa akon, indi man pagsikwaya ang imo, alagad. Ikaw ang akon bulig, indi man ako pagpabayai kag pagpatumbayai, O Dios nga akon manlulowas! Huo, sa sini nga kinabuhi makakita pa ako sang kaayo sang GINOO sa iya mga tawo. Magsalig sa GINOO! Magtuo kag indi magdula sing paglaom. Magsalig sa GINOO!

Aleluya:

Marcos 1:15

Ang Ginharian sang Dios malapit na; bayai ninyo ang inyo mga sala kag magpati sa Maayong Balita.

Ang Pagbasa sang Santos nga Ebanghelyo suno kay:

San Lucas 10:1-12

Sa tapos sini ang Ginoo nagpili sing 72 ka mga tawo kag iya sila ginpadala sing tag-duhadoha sa pag-una sa iya sa tagsa ka mga banwa kag duog nga iya pagakadtuan. Nagsiling sia sa ila, “Malapad ang alanyon, pero diutay lang ang mga mangangani. Gani magpangamuyo kamo sa tag-iya sang alanyon nga magpadala sia sing dugang pa nga mga mangangani sa iya alanyon. Lakat kamo! Ginapadala ko kamo subong mga karnero sa tunga sang mga lobo. Indi kamo magdala sing kahita, ukon puyo, ukon sandalyas. Indi kamo magdulog sa pagpanamyaw bisan kay sin-o sa dalan. Kon magsulod kamo sa isa ka balay, magsiling kamo anay, ‘Paghidait sa sini nga balay.’ Kon ang nagapuyo dira tawo nga mahidaiton, ibilin sa iya ang inyo panamyaw sang paghidait. Kon indi sia mahidaiton, bawia ninyo ang inyo panamyaw sang paghidait. Magdayon kamo sa sina nga balay, magkaon kag mag-inom sang ginaamuma nila sa inyo, kay ang manugpangabudlay dapat hatagan sang iya suhol. Indi kamo magsagad saylusaylo sing dalayunan. Kon magkadto kamo sa isa ka banwa kag ginaabiabi kamo, kauna ninyo ang ginaamuma sa inyo, ayuha ninyo ang mga nagamasakit sa sina nga banwa, kag magsiling kamo sa mga tawo didto, ‘Ang Ginharian sang Dios malapit na sa inyo.’ Pero kon magsulod kamo sa isa ka banwa kag wala kamo ginaabiabi didto, kadto kamo sa mga dalan kag magsiling, ‘Bisan ang yab-ok sang inyo banwa nga nagatapik sa amon mga tiil amon nga taktakon batok sa inyo. Pero dumdoma ninyo ini, ang Ginharian sang Dios malapit na kuntani sa inyo.’ Nagasiling ako sa inyo nga sa Adlaw sang Paghukom sobra pa ang silot nga pagabatunon sadto nga banwa sang Sodoma.” 

Oktubre 3 | Oktubre 5

"Takos para sa Ginharian sang Dios"

Liturhiya sang Pulong

(Miyerkules, Oktubre 3, 2018)

Ang Pagbasa gikan sa Libro ni:

Job 9:1-12, 14-16

Huo, nabatian ko na ina tanan sang una. Pero paano ang tawo makadaog sang iya kaso batok sa Dios? Paano sia makapakigsuay sa iya? Makapamangkot sia sing isa ka libo ka mga pamangkot nga wala gid sing may makasabat. Ang Dios maalam gid kag gamhanan, wala gid sing tawo nga makatindog batok sa iya. Sa wala sing paandam ginahalin niya ang mga bukid, kag sa iya kaakig ginalaglag niya sila. Ang Dios nagapadala sing linog kag nagatay-og sang duta, nagauyog sia sang mga haligi nga nagatukod sang kalibutan. Ang Dios makapugong sang pagbutlak sang adlaw, kag sang pagsiga sang mga bituon kon gab-i. Wala sing may nagbulig sa Dios sa paghumlad sang langit, ukon sa pagtapak sa likod sang dragon sa dagat. Ang Dios nagbutang sang mga bituon sa langit, ang Oso, Orion, Pleyades, kag mga bituon sa bagatnan. Indi naton mahangpan ang dalagku nga mga butang nga iya ginahimo. Kag wala sing katapusan ang iya mga milagro. Ang Dios nagalabay, pero indi ko sia makita. Ginakuha niya ang iya naluyagan, kag wala sing may makapugong sa iya, wala sing may makapamangkot sa iya, "Ano bala ang ginahimo mo?" Gani paano ang pagsabat ko sa Dios? Bisan ako wala sing sala, ang akon lamang mahimo amo ang pagpakiluoy sa Dios nga akon hukom. Pero bisan tugotan niya ako sa paghambal, indi ako magpati nga pamatian niya ako.

Salmo sa Pagsabat:

Mga Salmo 88:10-11, 12-13, 14-15

Nagahimo ka bala sing mga milagro para sa mga patay? Nagabangon bala sila kag nagadayaw sa imo? Ginabantala bala ang imo mapinadayunon nga gugma sa lulobngan, ukon ang imo pagkamatutom sa duog sang kalaglagan? Makita bala ang imo mga milagro sa sadto nga duog sang kadudolman, ukon ang imo kaayo sa duta sang nagkawala? O Ginoo, nagapanawag ako sa imo sa pagpangayo sing bulig, agaaga nagapangmuyo ako sa imo. Ngaa bala ginasikway mo ako, O Ginoo? Ngaa bala nagapanago ka sa akon? Halin sang pamatan-on pa ako nag-antos ako nga yara sa bibi sang kamatayon, nalapyo na gid ako sa kabug-at sang imo mga silot.

Aleluya:

Filipos 3:8-9

Ang tanan ginakabig ko nga kapiyerdihan agod maangkon ko si Cristo kag agod nga mangin-isa kami sing bug-os.

Ang Pagbasa sang Santos nga Ebanghelyo suno kay:

San Lucas 9:57-62

Sang nagapadayon sila sa paglakat, may isa ka tawo nga nagsiling kay Jesus, “Maupod ako sa imo bisan diin ka magkadto.” Si Jesus nagsiling sa iya, “Ang mga singgalong may mga buho, kag ang mga pispis may mga pugad, pero ang Anak sang Tawo wala gid sing hiligdaan kag palahuwayan.” Nagsiling si Jesus sa isa na man ka tawo, “Upod ka sa akon.” Pero ang tawo nagsiling, “Ginoo, tugoti anay ako sa pagpauli kag paglubong sang akon amay.” Si Jesus nagsabat, “Pabay-i ang mga patay sa paglubong sang ila mga minatay. Lakat ka kag ibantala ang Ginharian sang Dios.” Ang isa pa gid ka tawo nagsiling, “Maupod ako sa imo, Ginoo, pero tugoti ako anay sa pagpaalam sa akon panimalay.” Si Jesus nagsiling sa iya, “Ang tawo nga nagaarado kag nagabulobalikid wala sing pulos sa Ginharian sang Dios.”

Oktubre 2 | Oktubre 4

"Ang ila mga Anghel yara sa Amay nga Langitnon"

Liturhiya sang Pulong

(Martes, Oktubre 2, 2018)

Ang Pagbasa gikan sa Libro sang:

Exodo 23:20-23

"Magapadala ako sing anghel sa pag-una kag sa pagbantay sa imo sa dalanon mo, kag sa pagdala sa imo sa duog nga gin-aman ko. Pamati sa iya, kag tumana ang iya ginasiling. Indi ka magpamatok sa iya, kay ang ginahimo niya para sa akon. Indi niya patawaron ini nga sala. Pero kon magpamati ka sa iya, kag magtuman sang tanan nga ginasiling ko, awayon ko ang imo mga kaaway, kag sumpongon ang mga nagapamatok sa imo. Ang akon anghel magauna sa imo, kag magadala sa imo sa duta sang mga Amornon, Hethanon, Peresnon, Canaanhon, Hebhanon, kag Jebusnon, kag ako magalaglag sa ila.

Salmo sa Pagsabat:

Mga Salmo 91:1-2, 3-4, 5-6, 10-11

Ang bisan sin-o nga nagadangop sa Labing Mataas, ang bisan sin-o nga nagapabilin sa idalom sang pagpangapin sang Labing Makagagahom, makasiling sa GINOO, “Ikaw ang akon palalipdan kag mangangapin! Ikaw ang akon Dios, sa imo nga akon nagasalig ako.” Sia magaluwas gid sa imo sa tago nga mga katalagman, kag sa tanan nga makamamatay nga mga balatian. Sia magatabon sa imo sang iya mga pakpak; indi ikaw maano sa idalom sang iya pagtatap; ang iya pagkatutom magaapin kag magatabang sa imo. Indi ka mahadlok sang mga katalagman sa kagab-ihon, ukon sang hinali nga pagsalakay sa kaadlawon, sang mga kalalat-an nga nagaabot sa kadudolman, ukon sang kalautan nga nagapamatay sa adlaw. Wala sing kalaglagan nga magaabot sa imo, wala sing kalalat-an nga magpalapit sa imo puloy-an. Ang Dios magapadala sang iya mga anghel sa pagbantay sa imo, sa pag-apin sa imo bisan diin ikaw makadto.

Aleluya:

Mga Salmo 103:21

Dayawa ninyo ang GINOO, tanan kamo nga gamhanan sa langit, kamo nga mga alagad niya nga nagatuman sang iya naluyagan.

Ang Pagbasa sang Santos nga Ebanghelyo suno kay:

San Mateo 18:1-5, 10

Sa sadto nga tion nagpalapit ang mga gintuton-an kay Jesus kag nagpamangkot, “Sin-o bala ang labing daku sa Ginharian sang langit?” Gintawag ni Jesus ang isa ka diutay nga bata kag ginpatindog sia sa ila atubangan, kag nagsiling, “Dumdoma ninyo ini! Kon indi kamo magbaylo kag manginkaangay sa magamay nga mga kabataan, indi gid kamo makasulod sa Ginharian sang langit.

"Kon indi kamo magbaylo kag manginkaangay sa magamay nga mga kabataan . . . " (18:3)

Gani ang nagapaubos sang iya kaugalingon kag manginkaangay sining diutay nga bata, amo ang labing daku sa Ginharian sang langit. Kag ang nagabaton sang kasubong sining diutay nga bata sa akon ngalan nagabaton sa akon.” “Mag-andam kamo nga indi ninyo matamay ang isa sining magamay nga mga kabataan. Nagasiling ako sa inyo nga ang ila mga anghel sa langit yara pirme sa atubangan sang akon Amay nga langitnon. 

Oktubre 1 | Oktubre 3

"Nahibaluan ni Jesus kon ano ang Ila Ginahunahona"

Liturhiya sang Pulong

(Lunes, Oktubre 1, 2018)

Ang Pagbasa gikan sa Libro ni:

Job 1:6-22

Sang pag-abot sang adlaw nga ang mga anghel magaatubang sa GINOO, si Satanas didto man upod sa ila. Ang GINOO nagpamangkot sa iya, “Diin ka maghalin?” Si Satanas nagsabat, “Naglagawlagaw ako pakadto pakari nga nagalibutlibot sa duta.” Ang GINOO nagsiling, “Natalupangdan mo bala ang akon alagad nga si Job? Wala sing isa sa duta nga maayo kag matutom subong sa iya. Ginasimba niya ako kag nagalikaw gid sia sa paghimo sang bisan ano nga malaut.” Nagsabat si Satanas, “Simbahon ka bala ni Job kon wala sia sing may makuha? Gin-apinan mo sia kag ang iya panimalay kag ang tanan niya nga pagkabutang. Ginapauswag mo ang tanan nga iya ginahimo, kag ginhatagan mo sia sing madamo gid nga mga kasapatan nga nagpuno sang bug-os nga duta. Abi kuhaa ini tanan nga mga butang sa iya kag tan-awon ta, kon indi ka niya pagpakamalauton sa imo atubangan.” Ang GINOO nagsiling kay Satanas, “Sigi, ini tanan nga mga butang ginatugyan ko sa imo gahom, pero indi lang pag-anha si Job.” Gani naghalin si Satanas. Isa ka adlaw sang nagakinaon kag nagaininom ang mga kabataan ni Job sa balay sang ila kamagulangan nga utod nga lalaki, may manugbalita nga nagdalagan pakadto kay Job. Nagsiling sia, “Samtang nagaarado kami sa uma, kag ang mga asno nagahalab sa malapit lamang nga duog, sa hinali lamang ginsalakay kami sang mga Sabeanhon kag ginkuha nila ang tanan nga mga kahayupan. Ginpamatay nila ang tanan mo nga mga suloguon, kag ako lang ang nakapalagyo sa pagsugid sa imo.” Sa wala pa sia makatapos hambal, nag-abot ang isa ka suloguon kag nagsiling, “Naigo sang kilat ang mga karnero kag ang mga manugbantay kag nagkalamatay sila tanan. Ako lang ang naluwas sa pagsugid sa imo.” Sa wala pa sia makatapos hambal, nag-abot ang isa ka suloguon kag nagsiling, “Ginsalakay kami sang tatlo ka guban sang mga Caldeanhon, ginpamatay nila ang tanan mo nga mga suloguon, gindala nila ang tanan nga mga kamelyo, kag ako lang ang nakapalagyo sa pagsugid sa imo.” Sa wala pa sia makatapos hambal, nag-abot ang isa ka suloguon kag nagsiling, “Samtang nagakinaon kag nagaininom ang tanan mo nga mga kabataan sa balay sang imo kamagulangan nga anak nga lalaki, nag-abot ang mabaskog nga buhawi halin sa desierto. Ginhakwat kag ginlampos sang buhawi ang balay kag nagkalamatay sila tanan kag ako lang ang naluwas sa pagsugid sa imo.” Dayon nagtindog si Job kag gingisi niya ang iya bayu sa daku nga kasubo. Ginkiskisan niya ang iya ulo kag naghapa sa duta. Nagsiling sia, “Natawo ako nga wala sing dala kag mapatay man nga wala gid sing dala. Ang GINOO nagahatag, kag sia man ang nagabawi. Dayawon ang iya ngalan!” Wala sapayan sang tanan nga natabo, si Job wala magpakasala paagi sa pagbasol sa Dios.

Salmo sa Pagsabat:

Mga Salmo 17:1, 2-3, 6-7

Pamatii, O GINOO, ang akon matarong nga pagpakiluoy, talupangda ang akon pagpangayo sing bulig! Pamatii ang akon pangamuyo, kay wala ako nagalimbong. Magahukom ka pabor sa akon, kay nakahibalo ka sang matarong. Nahibaluan mo ang akon tagipusoon, ginaduaw mo ako sa kagab-ihon. Gin-usisa mo ako sing maayo, kag wala ka sing nakita nga malaut nga handom sa akon, wala ako nagahambal sing malaut. Nagapangamuyo ako sa imo, O Dios, kay ikaw nagasabat sa akon, gani balikda ako, kag pamatii ang akon mga pulong. Ipahayag ang imo makatilingala nga gugma, O Manlulowas; sa imo luyo indi kami maano sa amon mga kaaway.

Aleluya:

Marcos 10:45

Ang Anak sang Tawo nagkari agod sa pag-alagad kag sa paghatag sang iya kabuhi sa pagtubos sang madamo nga mga tawo.

Ang Pagbasa sang Santos nga Ebanghelyo suno kay:

San Lucas 9:46-50

Ang mga gintuton-an nagbinais kon sin-o sa ila ang labing daku. Nahibaluan ni Jesus kon ano ang ila ginahunahona, gani nagkuha sia sing isa ka bata nga diutay kag ginpatindog sia sa iya luyo kag nagsiling sa ila, “Ang nagabaton sining diutay nga bata sa akon ngalan nagabaton sa akon, kag ang nagabaton sa akon nagabaton man sang nagpadala sa akon. Kay ang labing kubos sa inyo amo ang labing daku.” Si Juan nagsiling, “Manunodlo, may nakita kami nga isa ka tawo nga nagatabog sang mga yawa sa imo ngalan, kag ginpauntat namon sia tungod kay indi sia katapo namon.” Si Jesus nagsiling sa iya kag sa iban nga mga gintuton-an, “Indi ninyo sia pagdumilii, kay ang indi batok sa inyo apin sa inyo.”

September 30 | Oktubre 2

Ang Indi batok sa Aton Kaapin Naton

Liturhiya sang Pulong

(Domingo, Setyembre 30, 2018)

1. Ang Pagbasa gikan sa Libro sang:

Numeros 11:25-29

Dayon ang GINOO nagpanaog sa panganod kag naghambal sa iya. Ginkuha niya ang iban nga espiritu nga iya ginhatag kay Moises kag ginhatag sa 70 ka mga pangulo. Sang mag-abot sa ila ang espiritu, nagsinggit sila nga nagawalay, pero indi man lang madugay. Ang duha sang 70 ka mga pangulo, si Eldad kag si Medad, nagpabilin sa kampamento kag wala maggwa pakadto sa Tolda. Didto sa kampamento nag-abot sa ila ang espiritu, kag nagsinggit sila nga nagawalay. Ang isa ka pamatan-on nga lalaki nagdalagan sa pagsugid kay Moises sang ginhimo ni Eldad kag ni Medad. Dayon si Josue nga anak ni Nun, nga nanginkabulig ni Moises halin sang pamatan-on pa sia naghambal kag nagsiling kay Moises, "Sir, pauntata sila!” Si Moises nagsabat, "Nabalaka bala ikaw sa akon kaayohan? Luyag ko kontani nga ang GINOO maghatag sang iya espiritu sa tanan niya nga mga tawo kag pahambalon niya sila kaangay sa mga propeta."

Salmo sa Pagsabat:

Mga Salmo 19:8, 10, 12-13, 14

Matarong ang mga pagsulondan sang GINOO, kag ang mga nagatuman sini malipayon, matarong gid ang iya mga sugo, kag nagahatag sing paghangop kag sa hunahona. Halandumon pa sila sang sa bulawan, bisan pa sang sa pinakapuraw nga bulawan. Matam-is pa sila sang sa dugos, bisan pa sang sa wala simbog nga dugos. Wala sing tawo nga makakita sang iya kaugalingon nga mga sayop; luwasa man ako sa tago nga mga kasaypanan! Ipahilayo man ako sa hayag nga mga sala, indi ako pag-ipadaog sa ila. Dayon manginhimpit ako, kag hilway sa makasiligni nga mga sala. Kabay pa nga mabaton mo ang akon mga pulong kag panghunahona, O GINOO nga akon dalangpan kag Manunobos!

2. Ang Pagbasa gikan sa Sulat ni:

Santiago nga Apostol 5:1-6

Kag karon, kamo nga mga manggaranon, magpamati kamo sa akon! Maghibi kag magpanalambiton kamo bangod sa mga kamusmosan nga magaabot sa inyo! Nagakadunot ang inyo mga manggad, kag ginaut-ot sang sapatsapat ang inyo mga bayu. Ang inyo mga bulawan kag pilak ginatuktokan, kag ini nga tuktok magapanaksi batok sa inyo, kag magaupod sang inyo mga unod subong sang kalayo. Nakatipon kamo sang inyo mga manggad sa sining katapusan nga mga panahon. Wala ninyo pagsuholi ang mga tawo nga nagpangabudlay sa inyo mga uma. Pamatii ninyo ang ila mga reklamo! Kag ang paghinibi sang mga nagpang-ani sang inyo patubas nakalambot na sa palamatin-an sang Dios, ang Ginoo nga Makagagahom! Ang inyo pagkabuhi diri sa duta puno sing pagpatuyang kag pagpangalipay. Ginpatambok na ninyo ang inyo kaugalingon para sa adlaw sang pag-ihaw. Ginkondenar kag ginpamatay ninyo ang matarong nga tawo kag wala gid sia magbato sa inyo. 

Aleluya:

Juan 17:17

Pakabalaana sila paagi sa kamatuoran; ang imo pulong kamatuoran.

Ang Pagbasa sang Santos nga Ebanghelyo suno kay:

San Marcos 9:38-43, 45, 47-48

Si Juan nagsiling sa iya, “Manunodlo, nakakita kami sang isa ka tawo nga nagatabog sang mga yawa sa imo ngalan, kag gintapna namon sia kay indi sia kaupod naton.” Si Jesus nagsiling, “Pabay-i lang ninyo sia kay wala sing may nagahimo sing milagro paagi sa akon ngalan kag makahambal dayon sing malain batok sa akon.  Kay ang bisan sin-o nga indi batok sa aton kaapin naton. Dumdoma ninyo ini! Ang bisan sin-o nga nagapainom sa inyo sing tubig, tungod kay iya kamo ni Cristo magabaton gid sing balos.” “Ang bisan sin-o nga manginkabangdanan sang pagbiya sining magamay nga mga kabataan nga nagatuo sa akon, maayo pa nga ihigot ang galingan nga bato sa iya liog kag itagbong sia sa dagat. Gani, kon ang imo kamot manginkabangdanan sang imo pagbiya sa akon, utda ini! Maayo pa nga magsulod ka sa langit nga wala na ang isa mo ka kamot sang sa duha ang imo kamot kag itagbong ka sa impiyerno sa kalayo nga wala nagakapalong. Kag kon ang isa mo ka tiil manginkabangdanan sang imo pagbiya sa akon, utda ini! Maayo pa nga magsulod ka sa langit nga isa lang ang imo tiil sang sa duha ang imo tiil kag itagbong ka sa impiyerno. Kag kon ang imo mata manginkabangdanan sang imo pagbiya sa akon, lukata ini! Maayo pa nga magsulod ka sa Ginharian sang Dios nga isa lang ang imo mata sang sa duha ang imo mata kag itagbong ka sa impiyerno. Didto ‘ang ila ulod wala nagakapatay kag ang kalayo wala nagakapalong.’ 

Setyembre 29 | October 1

"Ang mga Anghel sang Dios nga Nagasakapanaog sa Ibabaw sang Anak sang Tawo"

Liturhiya sang Pulong

(Sabado, Setyembre 29, 2018)

Ang Pagbasa gikan sa Libro sang:

Bugna kay Juan 12:7-12

Dayon nagsugod ang inaway sa langit. Si Miguel kag ang iya mga anghel nagpakig-away batok sa dragon. Ang dragon nagbato upod sa iya mga anghel. Pero ang dragon nalutos, kag sia kag ang iya mga anghel gintabog halin sa langit. Ginhaboy pa gwa ang daku nga dragon! Sia amo anay yadtong una nga man-og, nga gintawag Yawa ukon Satanas, nga nagpatalang sang bug-os nga kalibutan. Ginhulog sia sa duta, upod sang tanan niya nga mga anghel. Dayon nabatian ko ang mabaskog nga tingog sa langit nga nagasiling, “Karon nag-abot na ang kaluwasan halin sa Dios! Karon ang Dios nagpahayag sang iya gahom subong Hari! Karon ang iya Cristo nagpahayag sang iya awtoridad! Kay ang manugsumbong sang aton mga kautoran, nga nagtindog sa atubangan sang Dios sa pagsumbong sa ila sa adlaw kag gab-i, ginpagwa sa langit. Ang aton mga kautoran nagdaog batok sa iya paagi sa dugo sang Cordero, kag paagi sa kamatuoran nga ila ginbantala. Handa sila sa paghalad sang ila kabuhi kag sa pagpanginmatay. Gani, magkalipay kamo, mga langit, kag tanan kamo nga nagapuyo dira! Pero daw ano ka makakulogmat para sa duta kag sa kadagatan! Kay ang Yawa nagpanaog sa inyo, nga nagabalingaso sa kaakig, kay nahibaluan niya nga diutay na lang ang iya tion nga nabilin.” 

Salmo sa Pagsabat:

Mga Salmo 138:1-2, 2-3, 4-5

Nagapasalamat ako sa imo, O GINOO, sa bug-os ko nga tagipusoon; nagakanta ako sing pagdayaw sa imo sa atubangan sang mga dios. Nagasimba ako sa atubangan sang imo balaan nga Templo kag nagadayaw sang imo ngalan, tungod sang imo mapinadayunon nga gugma kag katutom, kay nagpahayag ka nga ikaw kag ang imo mga sugo labaw sa tanan. Ginsabat mo ako sang nagpanawag ako sa imo; ginpabakod mo ako sang imo kusog. Ang tanan nga mga hari sang duta magadayaw sa imo, O Ginoo, kay nakabati sila sang imo mga saad. Magakanta sila nahanungod sang ginhimo sang Ginoo, kag nahanungod sang iya daku nga himaya.

Aleluya:

Mga Salmo 103:21

Dayawa ninyo ang GINOO, tanan kamo nga gamhanan sa langit, kamo nga mga alagad niya nga nagatuman sang iya naluyagan.

Ang Pagbasa sang Santos nga Ebanghelyo suno kay:

San Juan 1:47-51

Sang makita ni Jesus si Natanael nga nagapakadto sa iya nagsiling sia nahanungod kay Natanael, “Yari ang isa ka matuodtuod nga Israelinhon; waay sing limbong sa iya!”  Si Natanael nagpamangkot sa iya, “Paano mo ako nakilala?” Si Jesus nagsabat, “Nakita ko na ikaw didto sa idalom sang kahoy nga higera, sa wala pa ikaw gintawag ni Felipe.” Nagsabat si Natanael, “Manunodlo, ikaw amo ang Anak sang Dios! Ikaw amo ang Hari sang Israel!” Nagsiling si Jesus, “Nagatuo bala ikaw tungod kay nagsiling ako sa imo nga nakita ko ikaw sang didto ikaw sa idalom sang kahoy nga higera? Dalagku pa gid sini nga mga butang ang imo makita!” Kag si Jesus nagsiling sa ila, “Matuod gid, makita ninyo ang langit nga nabuksan kag ang mga anghel sang Dios nga nagasakapanaog sa ibabaw sang Anak sang Tawo!”

Setyembre 28 | Setyembre 30

Ang Anak sang Tawo Nagkari sa Pag-alagad

Liturhiya sang Pulong

(Biyernes, Setyembre 28, 2018)

Ang Pagbasa gikan sa Libro sang:

Manugwali 3:1-11

Ang tagsa ka butang nga nagakatabo sa sining kalibutan nagakatabo sa tion nga luyag sang Dios. Gintalana niya ang tion sa pagpakatawo kag ang tion sa pagkapatay, ang tion sa pagtanom kag ang tion sa paggabot, ang tion sa pagpatay kag ang tion sa pagbulong, ang tion sa pagguba kag ang tion sa pagpatindog. Gintalana niya ang tion sa pagpangasubo kag ang tion sa pagpangalipay, ang tion sa paglalaw kag ang tion sa pagsinaot, ang tion sa paghilawasay kag tion nga wala sing paghilawasay, ang tion sa paghalukanay kag ang tion nga wala sing paghalukanay. Gintalana niya ang tion sa pagpangita kag ang tion sa pagdula, ang tion sa pagtago kag ang tion sa pagpilak, ang tion sa paggisi kag ang tion sa pagtahi, ang tion sa paghipos kag ang tion sa paghambal. Gintalana niya ang tion sa paghigugma kag ang tion sa pagkaakig, ang tion sa pag-inaway kag ang tion sa paghidait. Ano bala ang makuha sang tawo sa tanan niya nga pagpangabudlay? Nahibal-an ko ang kapalaran nga ginhatag sa aton sang Dios. May nagakaigo sia nga tion nga gintalana para sa tagsa ka butang. Ginhatagan niya kita sing handom sa paghibalo sang palaabuton, pero indi gid naton mahangpan sing bug-os ang iya ginahimo.

Salmo sa Pagsabat:

Mga Salmo 144:1, 2, 3-4

Dayawon ang Ginoo nga akon mangangapin; ginahanas niya ako para sa pagpakig-away, kag ginahanda niya ako para sa inaway. Sia ang akon mangangapin kag mananabang, akon palalipdan kag manlulowas, sa iya nagasalig ako nga indi ako maano. Ginatugyan niya ang mga pungsod sa akon paggahom. O Ginoo, ano bala ang tawo, nga gintalupangod mo sia, ang ahaw nga tawo, nga ginasapak mo sia? Kaangay sia sa isa ka huyop sang hangin; ang iya mga inadlaw kaangay sang umalagi nga landong.

Aleluya:

Marcos 10:45

Ang Anak sang Tawo nagkari sa pag-alagad kag sa paghatag sang iya kabuhi sa pagtubos sang madamo nga mga tawo.

Ang Pagbasa sang Santos nga Ebanghelyo suno kay:

San Lucas 9:18-22

Sang isa ka adlaw sang nagapangamuyo si Jesus nga isahanon lang, ang iya mga gintuton-an nagpalapit sa iya. Si Jesus nagpamangkot sa ila, “Sin-o bala ako suno sa mga tawo?” Nagsabat sila, “May mga tawo nga nagasiling nga si Juan Bautista ikaw. Ang iban nagasiling nga si Elias ikaw, kag ang iban pa gid nagasiling nga isa ikaw sang mga propeta sang una nga nabanhaw.” Ginpamangkot niya sila, “Pero suno sa inyo, sin-o bala ako?” Si Pedro nagsabat, “Ikaw ang Cristo sang Dios.” Dayon ginmanduan sila ni Jesus nga indi magpanugid sini sa bisan kay sin-o. Kag nagsiling pa gid sia, “Kinahanglan mag-antos gid ang Anak sang Tawo kag pagasikwayon sang mga katigulangan sang mga Judio, sang pangulo nga mga pari, kag sang mga manunodlo sang Kasugoan. Pagapatyon sia kag pagabanhawon sa ikatlo nga adlaw.”

Setyembre 27 | Setyembre 29

"Ako amo ang Dalan, ang Kamatuoran, kag ang Kabuhi"

Liturhiya sang Pulong

(Huwebes, Setyembre 27, 2018)

Ang Pagbasa gikan sa Libro sang:

Manugwali 1:2-11

Ang Kabuhi wala sing kapuslanan, wala sing kapuslanan, ang siling sang Manugwali. Wala sing kapuslanan, ang tanan wala sing kapuslanan. Ginagamit mo ang imo kabuhi sa pagpangabudlay, sa paghimakas, kag ano bala ang makuha mo sini? Ang mga kaliwatan nagaabot kag nagataliwan, pero ang kalibutan amo man gihapon. Ang adlaw nagabutlak kag nagatunod sa gihapon, kag nagabalik sa duog diin magasugod sia liwat. Ang hangin nagahuyop sa bagatnan, nagahuyop sa aminhan, nagabuyong-buyong ini kag nagabalik liwat. Ang tanan nga suba nagailig sa dagat, pero ang dagat wala nagakapuno. Ang tubig nagabalik sa iya ginhalinan, kag nagailig ini liwat. Ang tanan nga butang nagapalapyo sa tawo—ang pagkapalapyo nga indi masaysay. Ang aton mga mata indi mabusog sang ila ginatan-aw, kag ang aton mga dulonggan indi maayawan sang ila ginapamatian. Ang natabo sang una matabo man liwat. Ang nahimo sang una pagahimuon liwat. Wala sing bag-o nga butang sa bug-os nga kalibutan. Nagasiling sila, “Tan-awa, yari ang bag-o nga butang!” Indi ina matuod! Yara na ina sang una, sang wala pa kita matawo. Wala sing may nagadumdom sang natabo sang nagliligad, kag sa mga adlaw nga palaabuton wala sing may magadumdom sang matabo sumogod karon kag sa sadto nga tion.

Salmo sa Pagsabat:

Mga Salmo 90:3-4, 5-6, 12-13, 14, 17

Ginamanduan mo ang mga tawo sa pagbalik sa ila ginhalinan, ginahimo mo sila liwat nga duta. Ang isa ka libo ka tuig para sa imo subong lang sang isa ka adlaw; kaangay lang sila sang kahapon nga nagligad na, subong sang isa ka malip-ot nga takna sa kagab-ihon. Ginaanod mo ang mga tawo subong sang baha; subong sila sang damgo nga wala nagadugay. Subong sila sang hilamon nga nagaulhot kon aga, nagatubo kag nagalagtom, pero pagkahapon nagakalaya kag nagakapatay. Tudloi kami kon daw ano kalip-ot sang amon kabuhi, agod nga manginmainandamon kami. O Ginoo, tubtob pa bala san-o ikaw malugpayan? Kaluoyi man ang imo mga alagad! Pun-a kami sa tagsa ka aga sang imo mapinadayunon nga gugma, agod magkanta kag magkalipay kami sa bug-os namon nga kabuhi. Ginoo nga amon Dios, kabay nga bendisyunan mo kami, kag hatagi kami sing kadalag-an sa tanan nga amon ginahimo! Huo, hatagi kami sing kauswagan sa tanan nga amon ginahimo!

Aleluya:

Juan 14:6

Ako amo ang dalan, ang kamatuoran, kag ang kabuhi, siling sang Ginoo; wala sing may makakadto sa Amay kon indi paagi sa akon.

Ang Pagbasa sang Santos nga Ebanghelyo suno kay:

San Lucas 9:7-9

Si Herodes nga pangulo sang Galilea nakabati sang tanan nga nagkalatabo. Naglibog gid ang ulo niya kay may mga tawo nga nagsiling, “Nabanhaw si Juan Bautista.” Ang iban nagsiling nga si Elias nagpakita, kag ang iban pa gid nagsiling nga ang isa sang mga propeta sang una nabanhaw. Nagsiling si Herodes, “Ginpapugotan ko sing ulo si Juan, pero sin-o ining tawo nga madamo ang akon nabatian nahanungod sa iya?” Kag nagtinguha sia sa pagpakigkita sa kay Jesus. 

Setyembre 26 | Setyembre 28

Ginpadala ni Jesus sa Pagwali sang Ginharian sang Dios kag sa Pag-ayo sang mga Masakiton

Liturhiya sang Pulong

(Miyerkules, Setyembre 26, 2018)

Ang Pagbasa gikan sa Libro sang mga:

Hulobaton 30:5-9

“Ang Dios nagatuman sang tagsa niya ka saad. Kaangay sia sang taming sa tanan nga nagapaapin sa iya. Kon magpatupato ka sang wala niya ginsiling, sabdungon niya ikaw, kag ipakilala niya nga butigon ka.” O Dios, nagapangayo ako sa imo sang duha ka butang sa wala pa ako mapatay. Ipahilayo ako sa pagbutig kag indi ako pagpamanggara ukon pagpaimula. Hatagi lamang ako sang kalan-on nga akon kinahanglanon. Kon magsobra ang akon kalan-on, basi magsiling ako nga wala ako sing kinahanglan sa imo. Pero kon imol ako, basi magpangawat ako, kag magpakahuya sa akon Dios.

Salmo sa Pagsabat:

Mga Salmo 119:29, 72, 89, 101, 104, 163

Buligi ako nga indi magtalang, kag sa imo kaayo tudloi ako sang imo kasugoan. Ang kasugoan nga imo ginahatag labi pa sa akon sang sa tanan nga pilak sa kalibutan. Ang imo pulong, O Ginoo, magapadayon sa walay katubtoban; kay napasad ini sing malig-on sa langit. Ginlikawan ko ang tanan nga malain nga pagginawi, kay luyag ako magtuman sang imo pulong. Nagakuha ako sing kaalam gikan sa imo mga kasugoan,gani ginadumtan ko ang tanan nga malain nga pagginawi. Ginapakalain ko kag ginakangil-aran ang tanan nga kabutigan, pero ginahigugma ko ang imo kasugoan.

Aleluya:

Marcos 1:15

Ang Ginharian sang Dios malapit na bayai ninyo ang inyo mga sala, kag magpati sa Maayong Balita.

Ang Pagbasa sang Santos nga Ebanghelyo suno kay:

San Lucas 9:1-6

Gintawag ni Jesus sing tingob ang iya dose ka mga apostoles kag ginhatagan sila sing gahom kag awtoridad sa pagtabog sang tanan nga mga yawa kag sa pag-ayo sang mga balatian. Dason iya sila ginpadala sa pagwali sang Ginharian sang Dios kag sa pag-ayo sang mga masakiton. Nagsiling sia sa ila, “Indi kamo magdala sing bisan ano sa inyo pagpanglakaton: bisan sungkod, puyo, tinapay, kuwarta ukon isa ka ilislan nga bayu. Kon diin kamo nga balay ginabaton, dira lang kamo dayon tubtob maghalin kamo sa sina nga banwa. Kon ang mga tawo indi magbaton sa inyo, bayai ninyo ina nga banwa kag taktaka ang yab-ok sa inyo mga tiil subong pagpaandam sa ila.” Ang mga gintuton-an naglakat kag nagkadto sa tanan nga kabaryuhanan sa pagwali sang Maayong Balita kag sa pag-ayo sang mga tawo sa tanan nga duog. 

Setyembre 25 | Setyembre 27

"Bulahan ang mga Nagapamati sang Pulong sang Dios kag Nagatuman sini"

Liturhiya sang Pulong

(Martes, Setyembre 25, 2018)

Ang Pagbasa gikan sa Libro sang mga:

Hulobaton 21:1-6, 10-13

Ang Ginoo nagagahom sang panghunahona sang hari subong kahapos sang pagtuytoy niya sang alagyan sang kasulgan. Bisan nagahunahona ka nga ang tanan mo nga ginahimo matarong, dumdoma nga ang Ginoo nagahukom sang imo mga tinutoyo. Ginapasulabi sang GINOO nga maghimo ka sing husto kag nagakabagay sang sa magdala ka sa iya sing mga halad. Ang malaut nga mga tawo ginagamhan sang ila pagkamaiyaiyahon kag bugal, kag ini sala. Magtinguha ka kag magmapisan kag magabugana ka. Magdasudaso ka kag pirme ka lang ginakulang. Ang manggad nga imo makuha paagi sa daya madali madula, kag magadala ini sa imo sa bibi sang kamatayon. Ang handom sang malaut nga tawo amo ang paghimo sang malaut. Wala sila sing kaluoy sa bisan kay sin-o. Kon ang bugalon nga tawo masilutan, bisan pa ang wala mg tinun-an makatuon sing leksyon. Ang maalam nga tawo mahapos tudloan. Ang matarong nga Dios nakahibalo sang nagakatabo sa mga puloy-an sang mga malaut, kag pagalaglagon niya ang mga malaut. Ang wala nagapamati sa pagpangayo sing bulig sang mga imol, indi man pagpamatian ang iya pagpangayo sing bulig.

Salmo sa Pagsabat:

Mga Salmo 119:1, 27, 30, 34, 35, 44

Bulahan ang mga wala sing dagta sa ila kabuhi, nga nagakabuhi suno sa kasugoan sang GINOO. Tudloi ako sa pagtuman sang imo mga kasugoan, kag ako magapamalandong sang imo makatilingala nga mga pagtudlo. Nagtapat ako nga magmasinulondon; gintuman ko ang imo mga pagsulondan. Isaysay sa akon ang imo kasugoan, kag akon ini tumanon; tipigan ko ini sa bug-os ko nga tagipusoon. Tuytoyi ako sa dalanon sang imo mga sugo, kay sa ila may kalipayan ako. Tumanon ko sa gihapon ang imo kasugoan, sa walay katubtoban!

Aleluya:

Lucas 11:28

Bulahan pa gid ang mga nagapamati sang pulong sang Dios kag nagatuman sini.

Ang Pagbasa sang Santos nga Ebanghelyo suno kay:

San Lucas 8:19-21

Ang iloy kag mga utod ni Jesus nagkadto sa iya, pero indi sila makapalapit sa iya tungod sang madamo nga mga tawo. May nagsiling sa iya, “Ang imo iloy kag mga utod yara sa gwa nga luyag magpakigkita sa imo.” Si Jesus nagsiling sa ila tanan, “Ang akon iloy kag mga utod amo sila nga nagapamati sang pulong sang Dios kag nagatuman sini.”

Setyembre 24 | Setyembre 26