Liturhiya sang Pulong
(Domingo, Oktubre 7, 2018)
1. Ang Pagbasa gikan sa Libro sang:
Genesis 2:18-24
Dayon ang GINOONG Dios nagsiling, “Indi maayo nga ang tawo magpangabuhi nga isahanon lamang. Himuan ko sia sing kaupod nga bagay sa iya sa pagbulig sa iya.” Gani nagkuha sia sing duta kag ginhimo ang tanan nga mga kasapatan kag ang tanan nga mga kapispisan, kag gindala niya ini sa tawo sa pagtan-aw kon ano ang ipahingalan niya sa ila. Ang ngalan nga ginhatag sang tawo sa tagsa sa ila amo ang nanginngalan nila. Gani ang tawo naghingalan sang tanan nga mga kapispisan kag sang tanan nga mga kasapatan. Pero wala gid sing isa sa ila nga bagay manginkaupod niya sa pagbulig sa iya. Dayon ginpatulog sang GINOONG Dios ang tawo sing hamuok gid, kag sang nagakatulog sia ginkuha sang Dios ang isa ka gusok niya kag dayon ginpapali ang unod sa sina nga bahin sang lawas. Ang gusok nga ginkuha niya sa lalaki ginhimo niya nga babayi kag gindala niya ini nga babayi sa lalaki. Dayon ang lalaki nagsiling: “Karon, yari ang pareho sa akon, Tul-an nga ginkuha sa akon tul-an, Kag unod nga ginkuha sa akon unod. Tawgon sia nga ‘Babayi,’ Kay ginkuha sia sa lalaki.” Tungod sini, ang lalaki magabiya sang iya amay kag iloy kag magapuyo upod sa iya asawa, kag sila nga duha mangin-isa.
Salmo sa Pagsabat:
Mga Salmo 128:1-2, 3, 4-5, 6
Bulahan ang mga nagatahod sa Ginoo, nga nagakabuhi suno sa iya mga sugo! Ang imo kinabudlayan mangintuman sa imo mga kinahanglanon, manginmalipayon ka kag manginmainuswagon. Ang imo asawa manginkaangay sang mabinungahon nga ubas sa imo balay, kag ang imo mga anak nga lalaki manginkaangay sang linghod nga kahoy nga olivo sa palibot sang imo lamesa. Ang tawo nga nagatuman sa Ginoo pagabendisyunan kaangay sini. Kabay nga ang Ginoo magabendisyon sa imo gikan sa Sion! Kabay nga makita mo ang Jerusalem nga gauswag sa bug-os nga mga inadlaw sang imo kabuhi! Kabay nga makakita ka pa sang imo mga kaapuhan! Ang paghidait manginyara sa Israel!
2. Ang Pagbasa gikan sa Sulat ni San Pablo nga Apostol, sa mga:
Taga-Hebreo 2:9-11
Pero karon nakita naton si Jesus! Kay sa malip-ot nga tion ginhimo sia nga kuboskubos lamang sa mga anghel, agod nga paagi sa grasya sang Dios dapat sia mapatay tungod sa tanan nga mga tawo. Karon makita naton sia nga nakoronahan sang himaya kag dungog tungod sang kamatayon nga iya gin-antos. Nagakabagay gid man nga ang Dios, nga nagatuga kag nagatipig sang tanan nga mga butang, maghimpit kay Jesus paagi sa mga pag-antos, agod madala ang madamo nga mga anak sa pag-ambit sang iya himaya. Kay si Jesus amo ang nagapangulo sa ila padulong sa kaluwasan. Ginapaputli niya ang mga tawo sa ila mga sala, kag sia kag ang mga tawo nga ginpaputli may isa lamang ka Amay. Tungod sini si Jesus wala mahuya sa pagtawag sa ila nga iya mga utod.
Aleluya:
1 Juan 4:12
Kon nagahigugmaanay kita, ang Dios nagakabuhi sa aton kag ang iya gugma nahimpit sa aton.
Ang Pagbasa sang Santos nga Ebanghelyo suno kay:
San Marcos 10:2-16
May pila ka mga Fariseo nga nagpalapit sa iya, kag sa pagdakupdakop sa iya, nagpamangkot sila, “Sugiri kami, tugot bala sa aton Kasugoan nga ang isa ka tawo magbulag sa iya asawa?” Si Jesus nagsabat paagi sa isa ka pamangkot, “Ano bala ang kasugoan nga ginhatag ni Moises sa inyo?” Nagsabat sila, “Si Moises nagtugot nga ang bana maghimo sing papeles sa pagbulagay kag ugaling magbiya sia sa iya asawa.” Si Jesus nagsiling sa ila, “Ginsulat ni Moises ining kasugoan para sa inyo, tungod kay matig-a gid ang inyo mga tagipusoon. Pero sa ginsugoran, sang pagtuga sang Dios sang kalibutan, ginsiling ini, ‘Ang Dios naghimo sa ila nga lalaki kag babayi. Kag tungod sini, ang lalaki magabiya sang iya amay kag iloy, kag magapuyo upod sa iya asawa, kag sila nga duha mangin-isa.’ Gani, indi na sila duha, kundi isa. Gani, indi dapat bulagon sang tawo ang ginhiusa sang Dios.” Sang pagbalik na nila sa balay, ang mga gintuton-an nagpamangkot liwat kay Jesus nahanungod sini nga butang. Nagsiling sia sa ila, “Ang lalaki nga magbulag sa iya asawa kag magpangasawa liwat, nagapanginbabayi. Amo man ang babayi nga magbulag sa iya bana kag magpamana liwat nagapanginlalaki.” May mga tawo nga nagdala sing mga bata sa kay Jesus agod iya sila matandog, pero ginsaway sang mga gintuton-an ang mga tawo nga nagdala sa ila. Sang matalupangdan ini ni Jesus, naakig sia kag nagsiling sa iya mga gintuton-an, “Pabay-i ninyo ang mga kabataan nga magpalapit sa akon, kag indi ninyo sila pagpunggi, kay ang Ginharian sang Dios iya sang mga kaangay nila. Dumdoma ninyo ini! Ang bisan sin-o nga indi magbaton sang Ginharian sang Dios subong sang isa ka bata indi gid makasulod sa amo nga Ginharian.” Dayon ginkugos ni Jesus ang mga kabataan, iya gintungtong ang iya mga kamot sa tagsatagsa sa ila, kag iya sila ginbendisyunan.
No comments:
Post a Comment