Ang Suga sa Idalom sang Sulodlan

Liturhiya sang Pulong

(Lunes, Setyembre 24, 2018)

Ang Pagbasa gikan sa Libro sang mga:

Hulobaton 3:27-34

Buligi ang buloligan suno sa imo masarangan. Indi na pagpahulata ang imo kaingod tubtob buas kon mabuligan mo man lang sia karon. Indi ka magpahito sang bisan ano nga makahalit sa imo kaingod, kay nagapuyo sia sa luyo mo nga nagasalig sa imo.

Indi ka magpakigbais sa isa ka tawo sa wala sing kabangdanan, kon wala man lang sia sing nahimo nga malain sa imo. Indi ka magkaibog sa ginahimo sang malaut nga tawo ukon sang iya pagginawi, kay ang GINOO nagadumot sa mga tawo nga nagahimo sing malain, pero nagasalig sia sa mga matarong. Ginapakamalaut sang GINOO ang mga panimalay sang mga malaut, pero ginabendisyunan niya ang mga panimalay sang mga matarong. Matigdas sia sa mga bugalon, pero maayo sia sa mga mapainuboson.

Salmo sa Pagsabat:

Mga Salmo 15:2-3, 3-4, 5

Ang tawo nga nagatuman sa Dios sa tanan nga bagay, kag nagahimo sa gihapon sing matarong, nga nagahambal sing matuod kag tinagipusoon, kag wala nagabutangbotang sa iban. Wala sia nagahimo sing malain sa iya mga abyan, kag wala nagapatupato sing malain sa iya isigkatawo. Ginatamay niya ang mga ginasikway sang Dios, pero iya ginapadunggan ang mga nagatuman sa Ginoo. Ginatuman niya sa gihapon ang iya ginasaad, bisan mabudlay ini tumanon. Nagapahulam sia nga wala nagapasaka, kag indi sia mahamhaman sa pagpanaksi batok sa wala sing sala. Ang tawo nga nagahimo sini indi gid malingkang.

Aleluya:

Mateo 5:16

Subong man dapat ninyo pasigahon ang inyo kapawa sa mga tawo agod makita nila ang inyo maayo nga mga binuhatan, kag magadayaw sila sa inyo Amay nga yara sa langit.

Ang Pagbasa sang Santos nga Ebanghelyo suno kay:

San Lucas 8:16-18

“Wala sing may nagasindi sing suga kag tabunan man lang niya ini, ukon ibutang niya ini sa idalom sang higdaan, kundi ginabutang niya ini sa tulongtongan, agod nga ang mga nagasulod makakita sang kapawa. Kay wala sing natago nga indi mapahayag, ukon tinago nga indi mahibaluan kag mabuyagyag. “Gani maghalong kamo sa inyo pagpamati. Kay ang may iya na hatagan pa, pero ang wala iya, bisan pa ang diutay nga ginahunahona niya nga iya pagakuhaon pa.” 

Setyembre 23 | Setyembre 25

"Sin-o ang Labing Daku sa Ginharian sang Dios?"

Liturhiya sang Pulong

(Domingo, Setyembre 23, 2018)

1. Ang Pagbasa gikan sa Libro sang:

Kaalam ni Salomon 2:12,17-20

Ang matarong nga tawo mga disturbo sa aton, gani magpangita kita sing paagi sa pagdula sa ila. Nagapamatok sila sa aton mga ginabuhat; ginasumbong nila kita sa paglapas sa mga Kasugoan ni Moises kag sa mga pagsulondan nga kinaugali sang aton mga katigulangan. Pero tan-awon naton kon matuod ini! Tan-awon naton kon ano ang mahanabo sa tion nga sila mapatay! Kon ang mga matarong matuod nga mga anak sang Dios, ang Dios magaluwas sa ila batok sa ila mga kaaway. Gani, tilawan naton sila. Aton sila pintasan kag sakiton; dayon aton mahibaluan kon indi sila magpangakig kag manginmatarong sila. Mahibaluan naton kon tubtob sa diin sila makaantos! Pamatbatan naton sila sang isa ka makahuluya nga kamatayon. Kon sa bagay, nagsiling sila nga ang Dios magaapin sa ila.”

Salmo sa Pagsabat:

Mga Salmo 54:3-4, 5, 6, 8

Ang bugalon nga mga tawo magakari sa pagsumpong sa akon, ang mapintas nga mga tawo nagahimulat sa pagpatay sa akon, mga tawo nga wala nagasapak sa Dios. Nahibaluan ko nga ang Dios amo ang nagabulig sa akon, nga ang Ginoo amo ang nagaapin sa akon! Kabay nga silutan sang Dios ang akon mga kaaway sang ila kaugalingon nga kalautan! Pagalaglagon niya sila kay matutom sia. O Ginoo, magakalipay ako sa pagdulot sa imo sing isa ka halad, magapasalamat ako sa imo, kay ikaw maayo.

2. Ang Pagbasa gikan sa Sulat ni:

Santiago nga Apostol 3:16-4:3

Kay kon diin may kahisa kag pagkamaiyaiyahon, may kinagamo man kag tanan nga sahi sang kalaut. Pero una sa tanan, ang kaalam nga gikan sa langit putli. Mahidaiton man ini, malulo kag mainabyanon. Puno ini sing kaluoy kag nagapatubas sang maayo nga mga buhat. Wala ini sing pinilian kag pagkasalimpapaw. Ang kaayo amo ang patubas sang mga binhi nga gintanom sa paghidait sang mga manughikot sang paghidait. Sa diin bala nagahalin ang tanan nga pag-ilinaway kag pagbinaisay sa tunga ninyo? Nagahalin ini sa inyo mga handom sa pagpangalipay, nga nagainaway pirme sa sulod sang inyo mga lawas. Nagahandom kamo sang madamo nga mga butang, pero indi ninyo ini maangkon, gani handa kamo sa pagpatay. Nagakaibog kamo, kag indi ninyo ini matigayon, gani nagasinuay kag nagailinaway kamo. Indi ninyo maangkon ang inyo luyag, tungod kay wala ninyo ini ginapangayo sa Dios. Kag kon nagapangayo kamo, wala kamo ginahatagi, kay ang inyo mga tinutoyo malaut. Ginapangayo ninyo ini nga mga butang para sa inyo kaugalingon nga kalipayan. 

Aleluya:

2 Tesalonica 2:14

Sa sini gintawag kamo sang Dios paagi sa Maayong Balita agod makaambit kamo sang himaya sang aton Ginoong Jesu-Cristo.

Ang Pagbasa sang Santos nga Ebanghelyo suno kay:

San Marcos 9:30-37

Naghalin sila sa sadto nga lugar kag nagpadayon sa paglakat nga nagaagi sa Galilea. Indi luyag ni Jesus nga mahibaluan kon diin sia, kay nagapanudlo sia sa iya mga gintuton-an nga nagasiling, “Ang Anak sang Tawo igatugyan sa mga tawo nga magapatay sa iya, pero sa tapos ang tatlo ka adlaw, pagabanhawon sia.” Wala sila makahangop kon ano ang kahulogan sini, pero nahadlok sila sa pagpamangkot sa iya. Nag-abot sila sa Capernaum, kag sang nakasulod na si Jesus sa balay, nagpamangkot sia sa iya mga gintuton-an, “Ano bala ang ginbaisan ninyo sa dalanon?” Pero wala sila magsabat sa iya kay man ang ila ginbaisan amo kon sin-o sa ila ang labing daku. Naglingkod si Jesus kag gintawag niya ang dose ka mga apostoles kag nagsiling sa ila, “Kon sin-o ang luyag mangin-una sa tanan, dapat magpaulihi sa tanan kag manginsuloguon sang tanan.” Nagkuha sia sing isa ka bata kag ginpatindog sa atubangan nila. Ginkugos niya ini kag nagsiling sa ila, “Ang tawo nga nagabaton sang isa sining mga bata sa akon ngalan, nagabaton sa akon, kag ang nagabaton sa akon, wala lamang nagabaton sa akon, kundi nagabaton man sang nagpadala sa akon.” 

Setyembre 22 | Setyembre 24

"Kon Sin-o ang Luyag Magpamati, Magpamati Sia"

Liturhiya sang Pulong

(Sabado, Setyembre 22, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 15:35-37, 42-49

Pero may magapamangkot, “Paano bala ang pagkabanhaw sang mga patay? Ano bala nga sahi sang lawas ang ila maangkon?” Binuang ini nga pamangkot! Kon magpanggas ka sang binhi sa duta, indi ini magpamuhi kon indi anay ini mapatay. Kag ang imo ginapanggas sa duta indi ang tanom nga nagapamuhi na, kundi ang binhi, nga ayhan trigo ukon iban nga binhi. Subong man sini ang pagkabanhaw sang mga patay. Ang lawas nga ginalubong mamalatyon. Kon mabanhaw na ini, indi na mamalatyon. Kon ginalubong ini, malaw-ay kag maluya. Kon mabanhaw ini, matahom kag makusog. Kon ginalubong ini, lawasnon pa. Kon mabanhaw na, mangin-espirituhanon na ini nga lawas. Kon may yara nga unodnon nga lawas, may yara man nga espirituhanon nga lawas. Kay ang kasulatan nagasiling, “Ang nahauna nga tawo nga si Adam gintuga nga may kabuhi.” Pero ang ulihi nga Adam amo ang Espiritu nga nagahatag sing kabuhi. Indi una ang espirituhanon, kundi ang lawasnon, kag ugaling ang espirituhanon. Ang nahauna nga Adam ginhimo gikan sa yab-ok sang duta, ang ikaduha nga Adam nagikan sa langit. Ang mga tawo nga dutan-on kasubong sila sadtong ginhimo gikan sa duta. Ang mga tawo nga langitnon kasubong sila sadtong nagikan sa langit. Subong nga kaangay kita sang tawo nga ginhimo gikan sa duta, manginkaangay man kita sang Tawo nga nagikan sa langit. 

Salmo sa Pagsabat:

Mga Salmo 56:10-12, 13-14

Nagasalig ako sa Dios kag nagadayaw sang iya saad, pagadayawon ko ang saad sang Ginoo. Nagasalig ako sa iya, kag indi na ako magkahadlok. Ano ang mahimo sa akon sang ahaw nga tawo? Ihalad ko sa imo, O Dios, ang akon ginsaad, ihatag ko sa imo ang akon halad sa pagpasalamat, kay ginluwas mo ako sa kamatayon kag wala mo ako ginpalutos. Gani nagalakat ako sa atubangan sang Dios, sa kapawa nga nagasilak sa mga nagakabuhi. 

Aleluya:

Lucas 8:15

Ang nagapamati sang pulong kag nagatipig sini sa maayo kag masinulondon nga tagipusoon kag nagapadayon tubtob nga magpamunga sila.

Ang Pagbasa sang Santos nga Ebanghelyo suno kay:

San Lucas 8:4-15

Padayon ang pag-inabot sang mga tawo halin sa mga kabanwahanan, kag sang madamo na gid sila, naghambal si Jesus sining palaanggiran. “May isa ka tawo nga nagkadto sa uma sa pagsab-og. Sang pagsab-og niya ang iban nga binhi nagtupa sa dalan. Tinapakan ini kag tinuka sang mga pispis. Ang iban nagtupa sa batuhon nga duta, kag sang magtubo ang binhi nalaya man lang dayon kay mamala ang duta. Ang iban nagtupa sa talungon kag ang talungon nagtubo upod sa tanom kag naglumos sang tanom. Ang iban nga binhi nagtupa sa maayo nga duta kag nagtubo kag nagpatubas sing 100 ka pilo.” Si Jesus nagsiling pa gid, “Gani, kon sin-o ang luyag magpamati, magpamati sia.” Ang mga gintuton-an ni Jesus nagpamangkot sa iya, “Ano bala ang kahulogan sining palaanggiran?” Si Jesus nagsabat, “Ang paghibalo sang tinago sang Ginharian sang Dios ginhatag sa inyo. Pero sa iban ginahatag ini paagi sa mga palaanggiran, agod nga kon magtan-aw sila, indi sila makakita kag kon makabati sila, indi sila makahangop.” “Amo ini ang kahulogan sang palaanggiran: ang binhi amo ang pulong sang Dios. Ang binhi nga nagtupa sa dalan amo ang nakabati, ugaling nagaabot ang Yawa kag nagaagaw sang pulong sa ila tagipusoon, agod nga indi sila magtuo kag maluwas. Ang binhi nga nagtupa sa batuhon nga duta amo ang nakabati sang pulong kag nagabaton sini sing malipayon. Pero ang pulong wala gid makapanggamot sa ila. Wala magdugay ang ila pagtuo kay kon mag-abot ang mga pagsulay, nagabiya sila sang ila pagtuo. Ang binhi nga nagtupa sa mga talungon amo ang nakabati, pero ang pagpalibog kag ang manggad kag ang kalipayan sining kabuhi nagalumos sa ila, kag ang ila bunga wala nagagulang. Ang binhi nga nagtupa sa maayo nga duta amo ang nagapamati sang pulong kag nagatipig sini sa maayo kag masinulondon nga tagipusoon kag nagapadayon tubtob nga magpamunga sila.” 

Setyembre 21 | Setyembre 23

Gintawag ni Jesus si Mateo

Liturhiya sang Pulong

(Biyernes, Setyembre 21, 2018)

Ang Pagbasa gikan sa Sulat ni San Pablo nga Apostol, sa mga:

Taga-Efeso 4:1-7, 11-13

Karon, ako nga binilanggo tungod sang akon pag-alagad sa Ginoo, nagapakiluoy sa inyo: magkabuhi kamo suno sa talaksan nga ginhatag sang Dios, sang pagtawag niya sa inyo. Magmapainuboson kamo, magmalulo, kag magmapinasensyahon sa gihapon. Ipakita ang inyo gugma paagi sa inyo pagbinuligay. Tinguhai gid ninyo ang pagtipig sang paghiliusa nga ginahatag sa inyo sang Espiritu, paagi sa paghidait nga amo ang nagahiusa sa inyo. May isa ka lawas kag isa ka Espiritu, subong nga may isa ka paglaom nga tungod sini gintawag kamo sang Dios. May isa ka Ginoo, isa ka pagtuo, isa ka bautiso, may isa ka Dios kag Amay sang tanan nga mga tawo, nga amo ang Ginoo sang tanan, nga nagapanghikot sa tanan, kag yara sa tanan. Ang tagsatagsa sa aton ginhatagan sing pinasahi nga bugay, suno sa talaksan nga ginhatag ni Cristo.  Sia amo ang “naghatag sang mga bugay sa mga tawo,” ginpili niya ang iban nga mangin-apostoles, ang iban nga manginpropeta, ang iban nga manginmanugwali sang Maayong Balita, ang iban nga manginpastor kag manginmanunodlo. Ginhimo niya ini sa pag-aman sang tanan nga mga tumoluo para sa bulohaton sang pag-alagad sa Dios, sa pagpalig-on sang lawas ni Cristo. Kag madangat naton ang pag-isa sang aton pagtuo kag sang aton pagkilala sa Anak sang Dios, kag manginhamtong kita nga mga tawo nga nakalambot sang talaksan sang bug-os nga kataason ni Cristo. 

Salmo sa Pagsabat:

Mga Salmo 19:2-3, 4-5

Ang tagsa ka adlaw nagasugid sini sa madason nga adlaw, ang tagsa ka gab-i nagasulit sini sa madason nga gab-i. Wala sing pulong ukon mga tinuga nga ginagamit, wala sing gahod nga mabatian, pero ang ila tingog nagatugob sa bug-os nga kalibutan, ang ila mga pulong nagalambot sa mga ukbong sang duta. Didto sa langit naghimo ang Dios sing tolda para sa adlaw, kaangay ini sang nobyo nga nagagwa sa iya balay, kaangay sang humalampang nga nagadali sa pagpalumba.

Ang Pagbasa sang Santos nga Ebanghelyo suno kay:

San Mateo 9:9-13

Naghalin si Jesus sa sadto nga duog, kag sang nagalakat sia nakita niya ang isa ka manugsokot sang buhis nga ginahingalanan kay Mateo nga nagapungko sa iya opisina. Si Jesus nagsiling sa iya, “Sunod ka sa akon.” Nagtindog si Mateo kag nagsunod sa iya. Sang nagakaon si Jesus didto sa balay ni Mateo, madamo nga mga manugsokot sang buhis kag mga makasasala ang nag-upod sa iya kag sa iya mga gintuton-an sa pagkaon. May mga Fariseo nga nakakita sini kag nagpamangkot sila sa iya mga gintuton-an, “Ngaa bala ang inyo manunodlo nagakaon upod sa mga manugsokot sang buhis kag sa mga makasasala?” Si Jesus nakabati kag nagsabat sa ila, “Ang mga tawo nga wala sing balatian wala nagakinahanglan sing manugbolong, kundi ang mga masakiton lang. Lakat kamo kag usisaa ninyo kon ano ang kahulogan sini nga kasulatan: ‘Indi halad nga mga sapat ang akon ginapangita, kundi ang pagkamaluloy-on.’ Kay wala ako magkari sa pagtawag sang mga nagapakamatarong sang ila kaugalingon kundi sang mga makasasala.” 

Setyembre 20 | Setyembre 22

Si Jesus sa Balay ni Simon nga Fariseo

Liturhiya sang Pulong

(Huwebes, Setyembre 20, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 15:1-11

Karon, mga utod, luyag ko ipahanumdom sa inyo ang Maayong Balita nga ginwali ko sa inyo, nga inyo ginbaton kag sa sini ang inyo pagtuo napasad sing malig-on. Amo ina ang Maayong Balita nga ginwali ko sa inyo. Naluwas kamo paagi sa Maayong Balita kon ginhuptan ninyo ini sing malig-on, luas kon nagtuo kamo sing pasapayan. Ginpaalinton ko sa inyo ang isa ka butang nga labi ka importante nga akon nabaton: si Cristo napatay tungod sang aton mga sala, suno sa mga Kasulatan. Ginlubong sia kag ginbanhaw sa ikatlo ka adlaw, suno sa mga Kasulatan. Nagpakita sia kay Pedro, kag sang ulihi sa dose ka mga apostoles. Sa tapos sini nagpakita sia sa sobra sa 500 sang iya mga sumolunod sing tingob, nga ang kalabanan sa ila buhi pa, kag ang iban patay na. Sang ulihi nagpakita sia kay Santiago kag dayon sa tanan nga mga apostoles. Sa katapusan nagpakita man sia sa akon, bisan nga ako kasubong sang isa nga natawo sa wala pa ang tion. Kay ako ang labing kubos sa mga apostoles. Kon sa bagay, indi gani ako takos nga pagatawgon nga apostol, kay ginhingabot ko ang iglesia sang Dios. Pero sa kaluoy sang Dios nangin-amo ako sini karon, kag ang grasya nga ginhatag niya sa akon indi nanginwalay pulos. Sa baylo, nagpangabudlay ako sing labi pa sa tanan nga mga apostoles, bisan nga indi gid man ako ang nagpangabudlay, kundi ang grasya sang Dios nga yari sa akon. Gani, bisan kon naghalin ini sa akon ukon sa ila man, amo ini ang amon tanan ginawali, kag amo ini ang inyo ginatuohan. 

Salmo sa Pagsabat:

Mga Salmo 118:1-2, 16-17, 28

Magpasalamat sa GINOO, kay maayo siya, kag ang iya gugma nagapadayon sa gihapon. Magsiling ang mga tawo sang Israel, “Ang iya gugma nagapadayon sa gihapon.” Ang iya gahom nagpadaog sa aton, ang iya gamhanan nga kusog sa inaway!” Indi ako mapatay, kundi magakabuhi, kag isugid ko ang ginhimo sang GINOO. Ikaw ang akon Dios, kag nagapasalamat ako sa imo; ibantala ko ang imo pagkagamhanan.

Aleluya:

Mateo 11:28

Kari kamo sa akon, tanan kamo nga ginabudlayan kag ginabug-atan, kag papahuwayon ko kamo. 

"Kari kamo sa akon, tanan kamo nga ginabudlayan . . ." (11:28)

Ang Pagbasa sang Santos nga Ebanghelyo suno kay:

San Lucas 7:36-50

Si Jesus gin-agda sang isa ka Fariseo nga magkaon upod sa iya. Nagkadto si Jesus sa balay sining Fariseo kag nagkaon didto. May isa ka makasasala nga babayi nga nagapuyo sa amo nga banwa. Nakabati sia nga si Jesus yara sa balay sang Fariseo nga nagakaon. Nagkadto sia didto nga may dala nga tibudtibod nga puno sang agwa. Nagtindog sia sa likod nayon ni Jesus malapit sa iya tiil nga nagahibi kag ginbasa niya ang mga tiil ni Jesus sang iya mga luha. Dayon ginpahiran niya ang mga tiil ni Jesus sang iya buhok, iya ginhalukan, kag ginbuboan sang agwa. Sang pagkakita sini sang Fariseo nga nag-agda kay Jesus nagsiling sia sa iya kaugalingon, “Kon matuod nga ining tawo propeta, kuntani nahibal-an niya kon sin-o ining babayi nga nagatandog sa iya kag kon ano kahigko ang iya kabuhi.” Si Jesus nagsiling sa iya, “Simon, may isugid ako sa imo.” Si Simon nagsabat, “Huo, Manunodlo, sugiri ako.” Si Jesus nagsiling, “May duha ka tawo nga may utang sa isa ka manugpautang. Ang isa nakautang sa iya sing P500 kag ang isa P50. Sila nga duha indi gid makabayad, gani, wala na lang sila ginpabayad sang nagpautang sa ila. Diin sa ila nga duha ang magahigugma sing labi sa nagpautang sa ila?” Si Simon nagsabat, “Sa banta ko ang nakautang sing daku kag wala na pagpabayara.” Si Jesus nagsiling, “Husto ang sabat mo.” Dayon ginbalikid niya ang babayi kag nagsiling kay Simon, “Nakita mo ining babayi? Nagsulod ako sa imo balay kag wala ka maghatag sa akon sing tubig para sa akon mga tiil, pero sia naghugas sang akon mga tiil sang iya gid mga luha kag ginpahiran niya sang iya buhok. Wala ka maghalok sa pag-abiabi sa akon, pero sia halin sang akon pag-abot, wala sia mag-untat sa paghalok sang akon mga tiil. Wala mo paghiboi sing lana ang akon ulo, pero sia naghaplas sang akon mga tiil sang agwa. Nagasiling ako sa imo, ang iya daku nga gugma nagapamatuod nga ang iya madamo nga mga sala napatawad na. Ang ginpatawad sing diutay nagahigugma sing diutay.” Dayon si Jesus nagsiling sa babayi, “Ang imo mga sala ginpatawad na.” Ang iban nga upod nila sa kalan-an nagsiling sa ila kaugalingon, “Sin-o bala sia, nga nagapatawad bisan pa sang mga sala?” Pero si Jesus nagsiling sa babayi, “Ang imo pagtuo nagluwas sa imo. Maglakat ka sa paghidait.”

Setyembre 19 | Setyembre 21

"Ang Kaalam sang Dios Ginapahayag nga Matuod sang Tanan nga Nagabaton sini"

Liturhiya sang Pulong

(Miyerkules, Setyembre 19, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 12:31-13:13

Handuma ninyo ang dalagku pa nga mga bugay. Pero ang labaw sa tanan nga paagi amo ang masunod. Bisan makahambal ako sang nagakalainlain nga mga hambal sang mga tawo kag bisan sang mga anghel, pero kon wala ako sing gugma, ang akon hambal pareho lang sang magahod nga tunog sang agong ukon sang bagting sang lingganay. Kag bisan maayo ako magwali sang pulong sang Dios, kag akon ang tanan nga ihibalo kag paghangop sang tanan nga mga tinago, kag bisan may pagtuo ako nga makahalin sang mga bukid, pero kon wala ako sing gugma, wala ako sing kapuslanan. Kag bisan ipanghatag ko ang tanan ko nga pagkabutang, kag bisan itugyan ko ang akon lawas nga sunogon, pero kon wala ako sing gugma, wala ini sing kapuslanan sa akon. Ang gugma mapinasensyahon kag malulo. Ang gugma indi maimon, indi palabilabihon ukon bugalon. Ang gugma indi bastos, indi maiyaiyahon ukon maakigon. Ang gugma wala nagadumot. Ang gugma wala nagakalipay sa kalautan, kundi nagakalipay sa kamatuoran. Ang gugma nagabatas sang tanan nga mga butang, nagapati sang tanan nga mga butang, nagalaom sang tanan nga mga butang, kag nagaantos sang tanan nga mga butang. Ang gugma wala sing katapusan. Ang bugay sa pagwali sang pulong sang Dios umalagi, ang paghambal sa iban nga mga hambal magauntat, kag ang ihibalo may katapusan. Kay ang aton ihibalo kag ang pagwali sang pulong sang Dios nga ginbugay sa aton indi pa himpit. Pero kon ang himpit mag-abot, ang di-himpit magataliwan. Sang bata pa ako, ang akon panghambal, balatyagon, kag panghunahona binata man. Pero sang hamtong na ako ginbayaan ko ang binata nga mga pagginawi. Ang aton makita karon kasubong sang indi maathag nga larawan sa espeho, pero sa ulihi makakita kita sing maathag sa tampad. Ang nahibal-an ko karon bahin pa lang, pero sa ulihi mahibaluan ko ang tanan, pareho sang pagkahibalo sang Dios nahanungod sa akon.

Ang aton makita karon kasubong sang indi maathag nga larawan sa espeho. (13:12)

Karon, ining tatlo nagapadayon: ang pagtuo, ang paglaom, kag ang gugma, kag ang labing daku sini sa ila amo ang gugma.

Salmo sa Pagsabat:

Mga Salmo 33:2-3, 4-5, 12, 22

Magpasalamat kamo sa GINOO paagi sa pagtukar sing arpa, magkanta kamo sa iya nga ginaupdan sang mga instrumento nga may kuwerdas. Kantahi ninyo sia sing bag-o nga ambahanon, tukara sing maayo ang arpa, kag magkanta sing tudo! Ang mga pulong sang GINOO matuod, kag ang tanan niya nga mga binuhatan masaligan. Ang GINOO nagahigugma sang matarong kag nagakabagay, ang iya mapinadayunan nga gugma nagapuno sang duta. Bulahan ang pungsod nga ang iya Dios amo ang GINOO; bulahan ang mga tawo nga ginpili sang GINOO nga mangin-iya kaugalingon! Kabay nga ang imo mapinadayunon nga gugma magpabilin sa amon, O GINOO, kay ang amon paglaom yara sa imo.

Aleluya:

Juan 6:63, 68

Ang mga pulong nga ginahambal ko sa inyo amo ang Espiritu kag kabuhi, ang mga pulong nga nagahatag sang kabuhi nga dayon. 

Ang Pagbasa sang Santos nga Ebanghelyo suno kay:

San Lucas 7:31-35

“Karon, sa ano ko bala ipaanggid ang mga tawo sining panahon? Kaangay bala sila sang ano? Kaangay sila sa mga kabataan nga nagpungko didto sa tiyendahan kag nagasinggitanay, ‘Nagtukar kami sa inyo sing plawta, pero wala kamo magsaot. Nagpanalambiton kami, pero wala man kamo maghibi.’ Nagkari si Juan Bautista nga nagapuasa kag wala nagainom sing bino, kag kamo nagsiling, ‘Ginagamhan sia sang yawa.’ Ang Anak sang Tawo nagkari nga nagakaon kag nagainom, kag kamo nagsiling, ‘Tan-awa ninyo ini nga tawo! Palakaon sia kag palainom sing bino, kag amigo sang mga manugsokot sang buhis kag sang mga makasasala!’ Pero ang kaalam sang Dios ginapahayag nga matuod sang tanan nga nagabaton sini.”

Setyembre 18 | Setyembre 20

Ginbanhaw ni Jesus ang Anak sang Balo

Liturhiya sang Pulong

(Martes, Setyembre 18, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 12:12-14, 27-31

Kay si Cristo kasubong sang isa ka lawas nga may madamo nga mga bahin. Bisan may madamo ini nga mga bahin, pero isa lang ini ka lawas. Sa amo man nga bagay, kita tanan, Judio ukon Gentil, ulipon ukon hilway, ginbautisohan sang amo nga Espiritu, agod mangin-isa kita ka lawas, kag kita tanan ginpainom sa amo man nga Espiritu. Kay ang lawas indi isa lang ka bahin, kundi may madamo nga mga bahin. Karon kamo tanan amo ang lawas ni Cristo, kag ang tagsatagsa sa inyo bahin sina nga lawas. Gani, ang Dios nagbutang sa iglesia, nahauna, sang mga apostoles; ikaduha, sang mga propeta; ikatlo, sang mga manunodlo; kag ugaling sang mga manugbuhat sing mga milagro, dason ang mga manugpang-ayo, mga manugtabang, mga manugmando, kag mga manughambal sa iban nga mga hambal. Indi ang tanan mga apostoles, ukon mga propeta, ukon mga manunodlo. Indi ang tanan makahimo sang mga milagro, ukon may gahom sa pagpang-ayo, ukon sa paghambal sa iban nga mga hambal, ukon sa pagsaysay sang kahulogan sini. Handuma ninyo ang dalagku pa nga mga bugay. Pero ang labaw sa tanan nga paagi amo ang masunod.

Salmo sa Pagsabat:

Mga Salmo 100:1-2, 3, 4, 5

Magkanta nga mga kalipay sa GINOO, O bug-os nga kalibutan! Magsimba sa GINOO sing masinadyahon; magpalapit sa iya atubangan nga may malipayon nga mga ambahanon! Indi pagkalimti nga ang GINOO Dios! Ginhimo niya kita, kag iya kita; iya kita mga tawo kag iya mga karnero. Magsulod kamo sa iya Templo nga may pagpasalamat, kag sa iya santuaryo nga may pagdayaw! Magpasalamat kamo kag magdayaw sa iya! Ang GINOO maayo; ang iya gugma wala sing katapusan, kag ang iya katutom nagapadayon sa tanan nga panahon.

Aleluya:

Lucas 7:16

Ang isa ka daku nga propeta nagpakita sa tunga naton, kag ang Dios nagkari sa pagluwas sang iya mga tawo.

Ang Pagbasa sang Santos nga Ebanghelyo suno kay:

San Lucas 7:11-17

Sa tapos sini, si Jesus nagkadto sa banwa nga ginatawag Nain. Nag-upod sa iya ang iya mga gintuton-an kag ang madamo nga mga tawo. Sang nagahinampot sia sa puwerta sang banwa, may patay nga ginayayungan pa gwa kag madamo nga mga tawo sa banwa ang nagakompanyar. Ang patay nga tawo amo ang bugtong nga anak sang isa ka iloy nga balo. Sang pagkakita sang Ginoo sa balo naluoy gid sia kag nagsiling sa iya, “Indi ka maghibi.” Dayon nagpalapit sia sa lungon kag gintandog niya ini. Ang mga nagayayong nagdulog. Si Jesus nagsiling, “Noy, nagasiling ako sa imo, bangon ka.” Ang patay nagbangon kag naghambal, kag gintugyan sia ni Jesus sa iya iloy. Ang tanan hinadlukan gid kag nagdayaw sila sa Dios nga nagasiling, “Ang isa ka daku nga propeta nagpakita sa tunga naton, kag ang Dios nagkari sa pagluwas sang iya mga tawo.” Ining balita nahanungod kay Jesus naglapnag sa bug-os nga Judea kag sa palibot nga kadutaan.

Setyembre 17 | Setyembre 19

Gin-ayo ni Jesus ang Suloguon sang Kapitan nga Romanhon

Liturhiya sang Pulong

(Lunes, Setyembre 17, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 11:17-26, 33

Sa sining masunod nga mga panugyan wala ako nagadayaw sa inyo, tungod kay ang inyo mga pagtilipon wala nagadala sing kaayuhan, kundi kalainan. Una sa tanan, ginsugiran ako nga may mga grupo nga nagasumponganay sa inyo mga pagtilipon sa iglesia, kag nagapati ako nga daw may kamatuoran ini.  (Kinahanglan gid man nga may pagbinahinbahin sa inyo, agod nga mahibaluan kon sin-o ang matuod sa inyo.) Ang inyo pagtipon sing tingob indi sa pagkaon sang Panihapon sang Ginoo. Kay ang kada isa sa inyo nagakaon anay sang iya dala, kag amo ina nga ang iban sa inyo gutom kag ang iban hubog. Wala bala kamo sing kaugalingon nga balay sa diin kamo makakaon kag makainom? Ukon ginatamay bala ninyo ang iglesia sang Dios kag ginapakahuy-an ang mga tawo nga wala sing sarang? Ano bala ang ginapaabot ninyo nga isiling ko sa inyo nahanungod sini? Dayawon ko bala kamo sa sining pagginawi ninyo? Indi ako magdayaw sa inyo! Kay ginbaton ko halin sa Ginoo ang pagtulon-an nga ginpaalinton ko man sa inyo: nga si Ginoong Jesus, sang gab-i nga gintugyan sia, nagkuha sing tinapay, nagpasalamat sa Dios, nagpamihakpihak sini kag nagsiling, “Ini amo ang akon lawas para sa inyo. Himoa ninyo ini sa akon handumanan.” Sa amo man nga bagay ginkuha niya ang kupa sa tapos ang panihapon kag nagsiling, “Ini nga kupa amo ang bag-o nga kasugtanan nga ginsilyuhan sang akon dugo. Sa inyo pag-inom sini, himoa ninyo ini sa akon handumanan.” Kay sa tagsa ninyo ka pagkaon sini nga tinapay kag pag-inom sa sini nga kupa, ginabantala ninyo ang kamatayon sang Ginoo tubtob nga magkari sia. Gani, mga utod, sa inyo pagtipon sing tingob sa pagkaon sang panihapon sang Ginoo, maghinulatay kamo. 

Salmo sa Pagsabat:

Mga Salmo 40:7-8, 8-9, 10, 17

Gani nagsabat ako, “Yari ako! Ang imo mga mando para sa akon yara sa libro sang Kasugoan. Daw ano ang kaluyag ko sa pagtuman sang imo kabubot-on, O Dios ko! Ginahuptan ko ang imo pagtulon-an sa akon tagipusoon.” Sa mga pagtililipon sang tanan nimo nga mga tawo, O GINOO, ginasugid ko ang maayong balita nga ikaw nagaluwas. Ikaw nakahibalo nga indi ako mag-untat sa pagsugid sini. Wala ko gintago ang balita sang kaluwasan sa akon kaugalingon; ang imo pagkamatutom kag pagbulig ginasugid ko sa gihapon. Sa pagtililipon sang tanan nimo nga mga tawo, wala ako maghipos nahanungod sang imo mapinadayunon nga gugma kag pagkamainunongon. Maluya ako kag wala sing mahimo, pero ginadumdom mo ako, O GINOO. Ikaw ang akon manugbulig kag Manlulowas, indi ka magpadugay, O Dios ko!

Aleluya:

Juan 3:16

Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang tagsatagsa nga nagatuo sa iya indi na mapatay, kundi may kabuhi nga wala sing katapusan. 

Ang Pagbasa sang Santos nga Ebanghelyo suno kay:

San Lucas 7:1-10

Sa tapos ni Jesus mahambal ining mga butang sa mga tawo, nagkadto sia sa Capernaum. Ang kapitan nga Romanhon didto may isa ka suloguon nga palangga gid niya. Ini nga suloguon nagamasakit kag tagumatayon. Sang pagkabati sang kapitan nahanungod kay Jesus, ginpadala niya ang pila ka mga katigulangan sang mga Judio sa pagpangabay kay Jesus nga magkari kag ayuhon ang iya suloguon. Nagkadto sila kay Jesus kag nagpakiluoy gid sa iya: “Ini nga kapitan takos gid sang imo bulig. Nagahigugma sia sang aton pungsod kag sia gid nagpatindog sang amon sinagoga.” Gani si Jesus nag-upod sa ila. Sang malapit na si Jesus sa balay, ginsugo sang kapitan ang iya mga abyan nga sugataon si Jesus kag silingon, “Sir, indi ka na magpagamo! Indi ako takos nga magkadto ka sa akon balay, kag indi man ako takos magpalapit sa imo. Pero magsiling ka lang kag magaayo ang akon suloguon. Kay ako sa idalom man sang pagbulot-an sang mataas pa nga mga opisyales, kag may mga soldado man ako. Ginasugo ko ining isa, ‘Lakat!’ kag nagalakat sia. Ginasugo ko inang isa, ‘Kari!’ kag nagakari sia. Kag ginasugo ko ang akon suloguon, ‘Himoa ini!’ kag ginahimo niya.” Natingala si Jesus sang pagkabati niya sini. Nagliso sia kag nagsiling sa mga nagasunod sa iya, “Nagasiling ako sa inyo, wala ako makakita sing pagtuo kasubong sini, bisan sa Israel.” Sang magbalik sa balay sang kapitan ang mga ginsugo nakita nila nga maayo na ang suloguon.

Setyembre 16 | Setyembre 18

“Pero suno sa Inyo Sin-o gid bala si Jesus?”

Liturhiya sang Pulong

(Domingo, Setyembre 16, 2018)

1. Ang Pagbasa gikan sa Libro ni:

Propeta Isaias 50:4-9

Ang Ginoo nagtudlo sa akon kon ano ang akon ihambal, agod mapabakod ko ang ginakapoy. Sa tagsa ka aga ginahatagan niya ako sing handom sa pagpamati sang iya igatudlo sa akon. Ang Ginoo naghatag sa akon sing paghangop, kag wala magsupak ukon magpalayo sa iya. Ginataya ko ang akon likod sa ila nga nagahanot sa akon. Ginpabay-an ko lang sila sang pagpakahuya nila sa akon, sang pagbutong  nila sang akon bungot kag pagdupla sang akon guya. Pero ang ila mga pagpakahuya indi makahalit sa akon, kay ang Ginoo nga Dios nagabulig sa akon. Ginpalig-on ko ang akon kaugalingon agod mabatas ko sila, nahibaluan ko nga indi ako mahuy-an, kay ang Dios malapit sa akon, kag pamatud-an niya nga wala ako sing sala. May yara bala nga mangahas sa pagpasaka sang mga panumbongon batok sa akon? Kitaon ta ini sa hukmanan! Ipasaka sa korte ang iya panumbongon! Ang Ginoo gid amo ang nagaapin sa akon—sin-o bala ang makapamatuod nga nakasala ako? Ang tanan nga nagasumbong sa akon madula; mawala sila kaangay sang panapton nga ginkaon sang anay!

Salmo sa Pagsabat:

Mga Salmo 116:1-2, 3-4, 5-6, 8-9

Ginahigugma ko ang Ginoo, kay ginapamatian niya ako; ginpamatian niya ang akon mga pangamuyo. Nagapamati sia sa akon sa tagsa ka tion nga magpanawag ako sa iya. Nagsambod sa akon sing hugot ang lubid sang kamatayon, ang kakugmat sang lulobngan naglikop sa akon, napun-an ako sang kahadlok kag kalangkag. Dayon nagpanawag ako sa Ginoo, "O Ginoo, nagapakiluoy ako sa imo, luwasa ako!" Ang Ginoo maluloy-on kag maayo, ang aton Dios mainawaon. Ang Ginoo nagaapin sang mga maluya, sang yara ako sa katalagman, ginluwas niya ako. Ang Ginoo nagluwas sa akon sa kamatayon; ginpauntat niya ang akon mga luha kag wala niya ako pag-ipalutos. Gani nagalakat ako sa atubangan sang Ginoo sa kalibutan sang mga buhi.

2. Ang Pagbasa gikan sa Sulat ni:

Santiago nga Apostol 2:14-18

Mga utod ko! Ano bala ang makuha sang tawo sa iya pagsiling, “May pagtuo ako,” kon ang iya mga binuhatan wala nagapamatuod sini? Makaluwas bala sa iya ina nga pagtuo? Abi may mga utod nga lalaki ukon babayi nga nagakinahanglan sing bayu kag ginakulang sa ila pagkaon, ano bala ang pulos kon magsiling ka lang sa ila, “Kabay pa nga mag-ayo ang imo kahimtangan! Magpainit-init ka kag magkaon sing madamo,” kag wala mo man sila ginahatagi sang ila mga kinahanglanon? Amo man ini sa pagtuo: kon wala ini ginaupdi sing maayo nga mga buhat, ini nga pagtuo patay. Pero ayhan may magasiling, “Ikaw may pagtuo kag ako may mga binuhatan.” Sabton ko sia, “Ipakita sa akon kon paano nga makatuo ka nga wala sing mga binuhatan kag ipakita ko sa imo ang akon pagtuo paagi sa akon mga binuhatan.” 

Aleluya:

Galacia 6:14

Ang akon lamang mapabugal amo ang krus sang aton Ginoong Jesu-Cristo, kay paagi sa iya krus ang kalibutan patay para sa akon kag ako patay man para sa kalibutan. 

Ang Pagbasa sang Santos nga Ebanghelyo suno kay:

San Marcos 8:27-35

Dayon si Jesus kag ang iya mga gintuton-an nagkadto sa mga baryo sang Cesarea Filipo. Sa dalanon nagpamangkot sia sa ila, “Sugiri ninyo ako, sin-o bala ako suno sa mga tawo?” Nagsabat sila, “Suno sa iban ikaw si Juan Bautista, ang iban nagasiling ikaw si Elias, pero ang iban pa gid iya nagasiling nga ikaw isa sang mga propeta.” Si Jesus nagpamangkot sa ila, “Pero suno sa inyo, sin-o gid bala ako?” Si Pedro nagsabat, “Ikaw amo ang Cristo.” Dayon si Jesus nagmando sa ila, “Indi ninyo pag-isugid bisan kay sin-o, kon sin-o ako.” Dayon si Jesus nagsugod sa pagpanudlo sa iya mga gintuton-an, “Ang Anak sang Tawo magaagi sang madamo nga mga pag-antos, kag pagasikwayon sia sang mga katigulangan sang mga Judio, sang pangulo nga mga pari, kag sang mga manunodlo sang Kasugoan. Pagapatyon sia kag sa tapos sang tatlo ka adlaw pagabanhawon sia.” Ginpaathag gid niya ini sa ila. Gani gindala sia ni Pedro sa unhan kag ginsaway. Pero nagliso si Jesus, nagtulok sa iya mga gintuton-an, kag ginsaway si Pedro, “Magpalayo ka sa akon, Satanas, ang imo panghunahona iya sang tawo kag indi iya sang Dios!” Dayon gintawag ni Jesus ang mga tawo kag ang iya mga gintuton-an sa pagpalapit. Nagsiling sia sa ila, “Kon sin-o ang luyag mag-upod sa akon, kinahanglan nga kalimtan niya ang iya kaugalingon, magpas-an sang iya krus kag magsunod sa akon.

" . . . kalimtan niya ang iya kaugalingon, magpas-an sang iya krus kag magsunod sa akon." (8:34)

Kay ang tawo nga buot magluwas sang iya kaugalingon nga kabuhi madula niya ini, pero ang tawo nga nagahalad sang iya kabuhi tungod sa akon kag sa Maayong Balita maluwas niya ini. 

Setyembre 15 | Setyembre 17

"Sa Tupad sang Krus ni Jesus Nagatindog"

Liturhiya sang Pulong

(Sabado, Setyembre 15, 2018)

Ang Pagbasa gikan sa Sulat ni San Pablo nga Apostol, sa mga:

Taga-Hebreo 5:7-9

Sang si Jesus nagakabuhi pa diri sa duta, nagpangamuyo sia kag nag-ampo sa mabaskog nga tingog nga nagahilibion sa Dios nga sarang makaluwas sa iya sa kamatayon. Ginpamatian sia sang Dios, tungod kay mapainuboson sia kag mainampuon. Pero bisan Anak sia sang Dios, nagtuon sia sa pagkamatinumanon paagi sa iya mga pag-antos. Sang nahimpit na sia, nahimo sia nga ginagikanan sang walay katapusan nga kaluwasan para sa tanan nga nagatuman sa iya, 

Salmo sa Pagsabat:

Mga Salmo 31:2-3, 3-4, 5-6, 15-16, 20

Pamatii ako! Karon gid luwasa ako! Ikaw ang akon dalangpan nga magaapin sa akon, ang akon mangangapin nga magaluwas sa akon. Tungod kay Ikaw ang akon dalangpan kag mangangapin, ubayi kag tuytoyi ako suno sa imo ginsaad. Ilikaw ako sa siod nga ila ginbutang para sa akon; ikaw ang akon dalangpan. Sa imo mga kamot ginatugyan ko ang akon kaugalingon, Ikaw, O GINOO, ang magaluwas sa akon; Dios ikaw nga masaligan. Ginadumtan mo ang nagasimba sa di-matuod nga mga dios, pero ako akon nagasalig sa imo. Yara ako sa gihapon sa imo mga kamot; luwasa ako sa akon mga kaaway kag sa mga nagahingabot sa akon. Ako imo alagad; ipakita ang imo kaayo sa akon, luwasa ako tungod sang imo mapinadayunon nga gugma! Ginatipigan mo sila nga indi maano sa imo atubangan gikan sa mga paghimbon sang mga tawo; ginatago mo sila agod indi maano sa mga pagpasipala sang ila nga mga kaaway.

Ang Pagbasa sang Santos nga Ebanghelyo suno kay:

San Juan 19:25-27

Sa tupad sang krus ni Jesus nagatindog didto ang iya iloy, ang utod sang iya iloy, si Maria nga asawa ni Cleofas, kag si Maria Magdalena. Sang makita ni Jesus ang iya iloy kag ang iya hinigugma nga gintuton-an nga nagatindog didto, nagsiling sia sa iya iloy, “Babayi, yari ang imo anak.” Dayon nagsiling man sia sa gintuton-an, “Yari ang imo iloy.” Kag sugod sadto, gindala sang gintuton-an si Maria sa pagpuyo sa iya balay. 

Setyembre 14 | Setyembre 16

"Sa amo man nga Bagay Pagabayawon ang Anak sang Tawo"

Liturhiya sang Pulong

(Biyernes, Setyembre 14, 2018)

1. Ang Pagbasa gikan sa Libro sang:

Numeros 21:4-9

Ang mga Israelinhon naghalin sa bukid sang Hor paagi sa alagyan nga nagapadulong sa baybayon sang Aqaba, agod makalibot sila sa kadutaan sang Edom. Pero sa dalanon nadulaan sila sang pasensya, kag naghambal sila batok sa Dios kag kay Moises. Nagreklamo sila, “Ngaa bala ginpagwa ninyo kami halin sa Egipto agod magkalamatay sa sini nga desierto, sa diin wala sing kalan-on kag tubig? Indi kami makaagwanta sining kalan-on nga wala sing data!” Dayon ang GINOO nagpadala sing mga man-og nga dalitan sa tunga sang mga tawo, kag madamo sang mga Israelinhon ang ginkagat kag nagkalamatay. Ang mga tawo nagpalapit kay Moises kag nagsiling, “Nakasala kami sang paghambal namon batok sa GINOO kag sa imo. Karon magpangamuyo ka sa GINOO nga panguhaon niya ini nga mga man-og.” Gani si Moises nagpangamuyo para sa mga tawo. Dayon ang GINOO nagsugo kay Moises sa paghimo sing man-og nga saway kag ibutang ini sa isa ka tukon, agod nga ang bisan sin-o nga makagat makatulok sa sini kag magaayo. Gani si Moises naghimo sing isa ka man-og nga saway kag ginbutang ini sa isa ka tukon. Ang bisan sin-o nga ginkagat magatulok sa sining man-og nga saway kag magaayo sia.

Salmo sa Pagsabat:

Mga Salmo 78:1-2, 34-35, 36-37, 38

Pamati kamo, mga tawo ko, sa akon mga pagtudlo, kag talupangda ang akon ginasiling. Magahambal ako sa inyo, kag sugiran ko kamo sang mga tinago sang una, pero sang pamatyon niya ang iban sa ila, ang nabilin nagbalik sa iya; naghinulsol sila kag nagpangamuyo sing hugot sa iya. Nadumdoman nila nga ang Dios amo ang ila mangangapin, nga ang Labing Mataas amo ang ila manlulowas. Pero ang ila mga ginahambal mga kabutigan, kag ang tanan nga ila ginsiling pagdayaw-dayaw lang. Indi sila mainunongon sa iya, ukon matutom sa ila kasugtanan sa iya. Pero ang Dios nagmaluloy-on sa iya mga tawo. Ginpatawad niya ang ila mga sala kag wala niya sila paglaglaga. Sa madamo nga mga tion ginpaiway niya ang iya kaakig kag ginpunggan niya ang iya kasingkal.

2. Ang Pagbasa gikan sa Sulat ni San Pablo nga Apostol, sa mga:

Taga-Filipos 2:6-11

Ang kinaugali sang Dios Yara sa iya gihapon, Pero wala sia maghunahona Nga sa pakusog Dapat sia magtinguha Nga manginkaangay sa Dios. Sa baylo Sa iya kaugalingon nga kabubot-on Ginpaiway niya ini tanan, Kag nagsuklob sia Sang kinaugali sang isa ka ulipon. Nagpakatawo sia, Kag nagpakita sa dagway sang tawo. Nagpaubos siya sang iya kaugalingon Kag nagmasinulondon Tubtob sa kamatayon, Bisan pa ang kamatayon sa krus. Tungod sini Ginbayaw sia sang Dios sa kahitaasan, Kag ginhatagan sia sing ngalan Nga labaw sa tanan nga ngalan. Gani sa ngalan ni Jesus, ang tanan nga mga tinuga, sa langit kag sa duta, kag sa idalom sang duta Magaluhod, kag ang tanan magkilala sing dayag nga si Jesu-Cristo amo ang Ginoo, sa himaya sang Dios nga Amay. 

Ang Pagbasa sang Santos nga Ebanghelyo suno kay:

San Juan 3:13-17

Kag wala sing bisan isa nga nakasaka sa langit luas lamang sa Anak sang Tawo nga nagpanaog halin sa langit.” Subong nga si Moises nagbayaw sang man-og nga saway sa isa ka tukon didto sa desierto, sa amo man nga bagay pagabayawon ang Anak sang Tawo, agod nga ang tagsatagsa nga magtuo sa iya may kabuhi nga wala sing katapusan. Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang tagsatagsa nga nagatuo sa iya indi na mapatay, kundi may kabuhi nga wala sing katapusan. Kay ang Dios wala magpadala sang iya Anak sa kalibutan sa paghukom sang kalibutan, kundi sa pagluwas sang kalibutan. 

Setyembre 13 | Setyembre 15

"Higugmaa ang Inyo Kaaway"

Liturhiya sang Pulong

(Huwebes, Setyembre 13, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 8:1-7, 11-13

Karon, amo ini ang akon masiling nahanungod sa mga kalan-on nga nahalad sa mga diosdios. Matuod nga tanan kita may ihibalo suno sa ginasiling. Ugaling ini nga ihibalo nagahatag sing bugal sa tawo, pero ang gugma nagapabakod. Ang tawo nga nagahunahona nga may nahibaluan sia, sa pagkamatuod wala pa niya mahibaloi ang dapat niya mahibaluan. Pero ang tawo nga nagahigugma sa Dios nakilala sang Dios. Gani, nahanungod sa mga kalan-on nga nahalad sa mga diosdios, nakahibalo kita nga ang diosdios wala sing pulos sa kalibutan. Kay may isa lamang ka Dios. Kay bisan nga may ginatawag nga mga “dios” sa langit ukon sa duta, kag bisan nga may madamo nga mga “dios” kag mga “ginoo,” pero sa aton may isa lamang ka Dios, ang Amay, nga amo ang nagtuga sang tanan nga mga butang, kag kita nagakabuhi sa iya. Kag may isa lamang ka Ginoo, si Jesu-Cristo, nga paagi sa iya gintuga ang tanan nga mga butang kag paagi sa iya kita nagakabuhi. Pero indi ang tanan nakahibalo sini nga kamatuoran. May mga tawo nga naanad gid sa mga diosdios, sa bagay nga tubtob karon kon magkaon sila sini nga kalan-on nagahunahona pa sila nga ini nahalad sa diosdios. Tungod kay ang ila konsyensya maluya, nagabatyag sila nga nadagtaan sila sini nga pagkaon. Gani ining maluya nga tawo nga imo utod nga ginpanginmatyan ni Cristo, mawala tungod sa imo nga may “ihibalo”! Kag sa sini nga paagi magapakasala kamo batok kay Cristo tungod sang inyo pagpakasala batok sa inyo mga utod kag sang inyo pagpilas sang ila maluya nga konsyensya. Kon ang kalan-on manginkabangdanan sang pagpakasala sang akon utod, indi na ako magkaon sang karne nga nahalad sa mga diosdios agod indi makasala ang akon utod tungod sa akon.

Salmo sa Pagsabat:

Mga Salmo 139:1-3, 13-14, 23-24

O GINOO, gin-usisa mo ako, kag nakilala mo ako. Nahibaluan mo ang tanan nga ginahimo ko; gikan sa malayo nahangpan mo ang akon mga panghunahona. Makita mo ako, bisan nagaobra ukon nagapahuway ako, nahibaluan mo ang tanan ko nga mga ginahimo. Ginhimo mo ang tanan nga mga bahin sang akon lawas; gintaod mo ako sa tiyan sang akon iloy. Ginadayaw ko ikaw kay dapat ka tahuron; ang tanan mo nga ginahimo makatalanhaga kag makatilingala. Nahibal-an ko ini sa bug-os ko nga tagipusoon. Usisaa ako, O Dios, kag hibaloa ang akon painuino, tilawi ako, kag tungkara ang akon mga panghunahona. Tan-awa kon may paglimbong ako, kag tuytoyi ako sa dalan nga walay katubtoban.

Aleluya:

1 Juan 4:12

Kon nagahigugmaanay kita, ang Dios nagakabuhi sa aton kag ang iya gugma nahimpit sa aton. 

Ang Pagbasa sang Santos nga Ebanghelyo suno kay:

San Lucas 6:27-38

“Pero nagasiling ako sa inyo nga nagapamati sa akon: Higugmaa ang inyo kaaway, ayuhi ang mga nagadumot sa inyo, pakamaayuha ang mga nagapakamalaut sa inyo, kag pangamuyoi ang nagatratar sa inyo sing malain. Kon may magtampa sa imo sa pihak nga guya, itaya man ang pihak. Kon may magkuha sang imo kunop, ihatag man ang imo bayu. Hatagi ang nagapangayo sa imo, kag kon may magkuha sang imo pagkabutang, indi na pagbawia ina sa iya. Himoa ninyo sa mga tawo ang luyag ninyo nga himuon nila sa inyo. “Kon ang ginahigugma ninyo amo man lang ang nagahigugma sa inyo, ano bala nga kaayuhan ang inyo nahimo? Bisan gani ang mga makasasala nagahigugma sa mga nagahigugma sa ila. Kag kon ang ginahimuan ninyo sing maayo amo man lang ang nagahimo sing maayo sa inyo, ano bala nga kaayuhan ang inyo nahimo? Bisan pa gani ang mga makasasala nagahimo man sina! Kag kon ang ginapahulam ninyo amo man lang ang makabayad sa inyo, ano bala nga kaayuhan ang inyo nahimo? Bisan gani ang mga makasasala nagapahulam man sa mga makasasala nga makabayad. Indi amo ina! Higugmaa ang inyo mga kaaway kag himoa ang maayo sa ila. Magpahulam kamo nga wala nagapaabot nga bayaran. Kag magabaton kamo sing daku nga balos, kag mangin-anak kamo sang Labing Makagagahom nga Dios. Kay maalwan sia bisan pa sa mga tawo nga walay kabalaslan kag mga malaut. Magmaluloy-on kamo, subong nga ang inyo Amay maluloy-on.” “Indi kamo magpanghukom, kag ang Dios indi man maghukom sa inyo. Indi kamo magpangkondenar sang iban, kag ang Dios indi man magkondenar sa inyo. Magpatawad kamo, kag ang Dios magapatawad man sa inyo. Magpanghatag kamo sa iban, agod ang Dios magahatag man sa inyo. Ang ihatag sa inyo nasukob sing maayo, nadasok, nauyog kag nagaawas. Kay ang ginagamit ninyo nga talaksan para sa iban amo man ang talaksan sang Dios para sa inyo.” 

Setyembre 12 | Setyembre 14

"Bulahan Kamo nga mga Imol - Inyo ang Ginharian sang Dios"

Liturhiya sang Pulong

(Miyerkules, Setyembre 12, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 7:25-31

Karon nahanungod sa wala sing bana ukon asawa, wala ako sing sugo halin sa Ginoo, pero nagahatag ako sang akon panghunahona subong isa nga sarang masaligan tungod sang kaluoy sang Dios. Tungod sang mga kabudlayan karon, kon sa akon lang maayo pa nga ang isa ka tawo magpadayon sa iya kahimtangan karon. May asawa ka bala? Indi na sia pagbulagi. Wala ka bala sing asawa? Indi ka na lang magpangasawa. Pero kon mangasawa ka gid man, indi ka makasala. Kon ang dalaga magpamana, indi man sia makasala. Pero luyag ko kuntani nga malikawan ninyo ang adlaw-adlaw nga palaligban sang may asawa ukon bana. Mga utod, amo ini ang buot ko silingon: diutay na lang ang tion nga nabilin. Sugod karon ang may mga asawa magkabuhi nga daw wala sing asawa, ang mga nagakalisod subong nga daw wala man sila sing kalisod, ang mga nagakalipay subong nga daw wala man sila sing kalipay, ang mga nagabakal subong nga daw wala man sila sing binaklan, kag ang nagagamit sang mga pagkabutang sining kalibutan magkabuhi subong nga daw wala man sila nagagamit sini. Kay ang kahimtangan karon nagapakita nga ining kalibutan indi na gid magdugay. 

Salmo sa Pagsabat:

Mga Salmo 45:11-12, 14-15, 16-17

Pagahandumon ka sang hari tungod sang imo katahom, agalon mo sia, gani dapat ka magtuman sa iya. Ang mga pumoluyo sang Tiro magadala sa imo sing mga regalo, ang mga manggaranon magatinguha nga mahamuot ka sa ila. Sa iya matahom nga trahe ginadala sia sa hari, nga ginasunod sang iya mga kaubay nga mga kadalagahan, kag sila man ginadala sa hari. Nagakari sila sing malipayon kag masinadyahon, kag nagasulod sa palasyo sang hari. Magaanak ikaw, O hari ko, sing madamo nga mga anak nga lalaki,sa pagtal-os sa imo mga katigulangan, kag himuon mo sila nga mga pangulo sa bug-os nga duta. Ang akon ambahanon magasugid sa walay katubtoban sang imo kabantugan, kag ang tanan magadayaw sa imo sa gihapon sa palaabuton nga mga panahon.

Aleluya:

Lucas 6:23

Magkalipay kag maghinugyaw kamo, kay daku ang inyo balos sa langit.

Ang Pagbasa sang Santos nga Ebanghelyo suno kay:

San Lucas 6:20-26

Gintulok ni Jesus ang iya mga gintuton-an kag ginsingganan: “Bulahan kamo nga mga imol, kay inyo ang Ginharian sang Dios! “Bulahan kamo nga ginagutom karon, kay pagabusgon kamo! “Bulahan kamo nga nagahibi karon, kay magakadlaw kamo! “Bulahan kamo kon ang mga tawo magdumot sa inyo, magsikway sa inyo, magpasipala sa inyo, kag magtawag sa inyo nga malaut tungod sa Anak sang Tawo. Magkalipay kamo kon ina matabo, kag maghinugyaw kamo, kay daku ang inyo balos sa langit. Kay amo man ini ang ginhimo sang ila mga katigulangan sa mga propeta. “Pero kailo man kamo nga mga manggaranon karon, nga nakaagom na sang mahapos nga pagpangabuhi! “Kailo man kamo nga mga busog karon, kay gutomon kamo! “Kailo man kamo nga nagakadlaw karon, kay magapangasubo kag magahibi kamo! “Kailo man kamo kon ang tanan nga mga tawo magdayaw sa inyo, kay amo man ini ang ginhimo sang ila mga katigulangan sa di-matuod nga mga propeta.” 

Setyembre 11 | Setyembre 13

Si Jesus Nagpili sang Dose ka Apostoles

Liturhiya sang Pulong

(Martes, Setyembre 11, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 6:1-11

Kon ang isa sa inyo may kasuayon batok sa isa ka utod, ngaa bala nga ginadala niya sa pagano nga mga hukom, sa baylo nga ipahusay niya sa mga tumoluo? Wala bala kamo makahibalo nga ang mga tumoluo magahukom sang kalibutan? Gani, kon kamo amo ang magahukom sang kalibutan, indi bala kamo makasarang sa paghukom sang diutay nga mga bagay? Wala bala kamo makahibalo nga kita ang magahukom sang mga anghel? Daw ano pa gid ang mga butang sining kabuhi!  Abi kon may mahanabo nga tagsubong sina nga mga butang, dalhon bala ninyo ina sa atubangan sang mga wala ginatahod sa iglesia agod ila paghukman? Makahuloya sa inyo! Matuod gid nga may yara nga isa nga maalam nga tawo sa tunga ninyo nga makahusay sang kaawayon sang mga kautoran! Pero kamo nga mag-utod nagaasuntohanay, kag ginapahukman ninyo ini sa hukom nga di-tumoluo! Ang inyo pag-asuntohanay nagapakita nga may kakulangan gid kamo. Indi bala nga maayo pa nga ang iban lang ang makasayop sa inyo? Indi bala nga maayo pa nga ang iban lang ang makapangawat sa inyo? Pero kamo inyo ang nagahimo sing sayop sa isa kag isa, kag nagakinawatay, bisan pa sa inyo mga kautoran! Nakahibalo gid kamo nga ang malaut indi makapanubli sang Ginharian sang Dios. Indi ninyo pagbuanga ang inyo kaugalingon! Ang mga makihilawason, ang mga nagasimba sa mga diosdios, ukon nagapanginbabayi, ukon nagapanginlalaki, ukon mga lalaki nga nagapakighilawas sa pareho nila nga lalaki, ukon ang mga nagapangawat, ukon mga maibugon, ukon mga palahubog, ukon mga mapasipalahon, ukon mga makawat, wala gid sing isa sini sa ila nga makapanubli sang Ginharian sang Dios. Ang iban sa inyo pareho anay sini nga mga tawo. Pero natinluan na kamo sa sala. Nahalad na kamo sa Dios kag ginpakamatarong sa ngalan ni Ginoong Jesu-Cristo kag sang Espiritu sang aton Dios. 

Salmo sa Pagsabat:

Mga Salmo 149:1-2, 3-4, 5-6, 9

Dayawa ninyo ang GINOO! Magkanta sing bag-o nga ambahanon sa GINOO, dayawa ninyo sia sa pagtilipon sang iya matutom nga mga tawo! Magkasadya ka, O Israel, tungod sang imo manunoga; maghinugyaw kamo, O mga pumoluyo sang Sion, tungod sang inyo hari! Dayawa ninyo nga may pagsinaut ang iya ngalan; magtukar kamo sing mga bumbo kag mga arpa sa pagdayaw sa iya. Ang GINOO nagakalipay sa iya mga tawo; ginapadunggan niya ang mga mapainuboson sing pagdaog. Maghinugyaw ang mga tawo sang Dios sa ila pagdaog, kag mag-amba sing masinadyahon sa ila mga piesta. Magsinggit sila sing mabaskog sa ila pagdayaw sa Dios, nga may mga espada nga matalom sa ila mga kamot, sa pagsilot sang mga kapungsoran suno sa ginsugo sang Dios. Amo ini ang pagdaog sang mga tawo sang Dios! Dayawa ninyo ang GINOO!

Aleluya:

Juan 15:16

Ako ang nagpili sa inyo, sa paglakat kag sa pagpamunga sing madamo nga nagapadayon, siling sang Ginoo.

Ang Pagbasa sang Santos nga Ebanghelyo suno kay:

San Lucas 6:12-19

Sa sadto nga tion nagkadto si Jesus sa isa ka bakulod kag didto nagpangamuyo sia sa Dios sa bilog nga gab-i. Sang pagkaaga gintawag niya ang iya mga gintuton-an, kag nagpili sia sing dose nga gintawag niya nga mga apostoles. Ini sila amo ang masunod: si Simon nga ginhingalanan niya kay Pedro kag ang iya utod nga si Andres, si Santiago kag si Juan, si Felipe kag si Bartolome, si Mateo kag si Tomas, si Santiago nga anak ni Alfeo kag si Simon nga gintawag ang patriota, si Judas nga anak ni Santiago kag si Judas Iscariote nga nangintraidor. Sang nagdulhog si Jesus halin sa bakulod kaupod nila, nagtindog sia sa matapan nga duog kaupod ang iya madamo nga mga gintuton-an. Didto may mga tawo halin sa Judea, Jerusalem kag mga banwa sa baybayon sang Tiro kag Sidon. Nagkadto sila didto sa pagpamati sa kay Jesus kag sa pagpabulong sang ila mga balatian. Ang mga ginatublag sang malaut nga mga espiritu nagkadto man kag nag-alayo. Ang tanan nga mga tawo nagtinguha sa pagtandog sa iya, kay may gahom nga nagagwa sa iya kag nagaayo sa ila tanan. 

Setyembre 10 | Setyembre 12

"Ano ang Ginatugot sang Kasugoan ang Magluwas sang Kabuhi ukon ang Magpatay?"

Liturhiya sang Pulong

(Lunes, Setyembre 10, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 5:1-8

Karon, nabalahuba nga may mga pagpakighilawas dira sa inyo nga sobra pa sang ginahimo sang mga pagano. Kay ginsugiran ako nga may anak nga nagapakighilawas sa iya manding! Ngaa bala makapabugal pa kamo? Kuntani dapat kamo magkasubo, kag ang tawo nga nakahimo sini nga butang dapat pahalinon sa inyo katilingban! Kon parti sa akon, bisan wala ako dira, ang akon espiritu yara dira sa inyo. Kag sa ngalan sang aton Ginoong Jesus napamatbatan ko na ina nga tawo nga naghimo sinang malain nga butang kag ang akon pamatbat pareho lang nga daw yara ako kaupod ninyo. Samtang nagatipon kamo sing tingob, kag ako nagapakig-upod sa inyo sa espiritu, sa gahom ni Ginoong Jesus nga yari sa aton, itugyan ninyo ining tawo kay Satanas nga magalaglag sang iya lawas, agod nga ang iya espiritu maluwas sa Adlaw sang Ginoo. Indi bagay nga magpabugal kamo! Nahibaluan ninyo ang hulobaton nga nagasiling, “Ang diutay lang nga lebadora nagapahabok sang bug-os nga minasa nga arina.” Kuhaa sa inyo kaugalingon ining daan nga lebadora sang sala, agod nga manginputli kamo. Dayon manginkasubong kamo sang bag-o nga minasa nga arina nga wala sing lebadora, nga sa pagkamatuod amo gid kamo. Ang aton Pascua nahanda na, kay si Cristo, ang aton cordero nga palascuahan nahalad na. Gani, selebrahon ta ang aton piesta, indi sa tinapay nga may daan nga lebadora sang sala kag kalautan, kundi sa tinapay nga wala sing lebadora, ang tinapay sang kaputli kag kamatuoran. 

Salmo sa Pagsabat:

Mga Salmo 5:5-6, 7, 12

Wala ka nagatalupangod sa mga bugalon, ginadumtan mo ang malaut nga mga tawo. Ginalaglag mo ang tanan nga mga butigon, kag ginatamay mo ang malugoson kag malimbongon. Pero ako akon makaduaw sa imo balay, tungod sang imo daku nga gugma. Makasimba ako sa imo balaan nga Templo, kag nagaduko sa pagtahod sa imo. Ginabendisyonan mo, O GINOO, ang nagatuman sa imo, kay ang imo kaluoy amo ang ila taming. 

Aleluya:

Juan 10:27

Ang akon mga karnero nagapamati sa akon tingog, siling sang Ginoo; kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Lucas 6:6-11

Sang isa na man ka Adlaw nga Inugpahuway, nagsulod si Jesus sa sinagoga kag nagpanudlo. May tawo didto nga ang iya kamot nga tuo naitus. May mga manunodlo sang Kasugoan kag mga Fariseo nga nagapangita sing kabangdanan sa pagsumbong kay Jesus. Gani ginpanilagan nila sia sing maid-id kon bala magapang-ayo sia sang mga masakiton sa Adlaw nga Inugpahuway. Ugaling si Jesus nakahibalo sang ila panghunahona kag nagsiling sia sa tawo nga naitus ang iya kamot, “Tindog ka kag magkari sa atubangan.” Ang tawo nagtindog kag nagkadto sa atubangan. Dayon si Jesus nagsiling sa ila, “Mamangkot ako sa inyo: Ano ang ginatugot sang aton Kasugoan sa Adlaw nga Inugpahuway nga himuon ta? Ang magbulig bala ukon ang maghalit? Ang magluwas sang kabuhi sang isa ka tawo ukon ang magpatay?” Gintulok niya sila tanan, kag nagsiling sa tawo, “Untaya ang imo kamot.” Gin-untay niya ang iya kamot, kag nag-ayo ini. Pero naakig gid sila, kag ginhambalan nila kon ano ang ila himuon kay Jesus. 

Setyembre 9 | Setyembre 11

"Daw ano Kaayo ang Paghimo Niya sang Tanan nga mga Butang"

Liturhiya sang Pulong

(Domingo, Setyembre 9, 2018)

1. Ang Pagbasa gikan sa Libro ni:

Propeta Isaias 35:4-7

Singgana ang tagsatagsa nga nagapakaluya, “Magpakabakod kamo kag indi magkahadlok! Ang Dios magaabot sa pagluwas sa inyo, magakari sia sa pagtimalos sa inyo mga kaaway." Ang bulag makakita, ang bungol makabati ang lupog magatumbo kag magasaot, kag ang apa magasinggit sa kalipay. Ang mga tuboran sang tubig magailig sa desierto; ang mga nagakalayo nga balas manginlinaw, kag ang mamala nga duta mapuno sing mga tuboran. Sa diin ang talunon nga mga ido nagapuyo anay ang mga bagaas kag ang mga tabun-ak magatubo.

Salmo sa Pagsabat:

Mga Salmo 146:7, 8-9, 9-10

Nagahukom sia pabor sa mga ginapigos, kag nagahatag sia sing kalan-on sa mga ginagutom. Ang Ginoo nagahilway sang mga binilanggo kag nagaayo sang mga bulag. Ginabayaw niya ang mga ginapaubos, ginahigugma niya ang iya matarong nga mga tawo. Ginaapinan niya ang mga dumoluong nga nagapuyo sa duta; ginabuligan niya ang mga balo nga babayi kag mga ilo, pero ginaguba niya ang mga plano sang mga malaut. Ang GINOO magahari sa walay katubtoban! Ang imo Dios, O Sion, magagahom sa tanan nga panahon! Dayawa ninyo ang GINOO!

2. Ang Pagbasa gikan sa Sulat ni:

Santiago nga Apostol 2:1-5

Mga utod ko! Subong mga tumoluo sang aton Ginoong Jesu-Cristo, ang Ginoo sang himaya, indi ninyo pagpasulabiha ang tawo tungod sang inyo makita sa iya. Abi may duha ka tawo nga magkadto sa inyo pagtililipon: ang isa manggaranon nga nagapaningsing sing bulawan kag nagabayu sing malahalon, kag ang isa imol nga nagabayu sang gision. Kon ginapasulabi ninyo ang isa nga nakabayu sing malahalon kag nagasiling sa iya, “Lingkod ka diri sa labing maayo nga pulongkoan,” pero nagasiling kamo sa imol nga tawo, “Tindog ka lang ukon lingkod ka diri sa salog sa akon tiilan,” ti may pinilian kamo kag ang inyo mga paghukom nasandig sa malaut nga mga tinutoyo. Pamati kamo, hinigugma ko nga mga utod! Ginpili sang Dios ang mga imol sining kalibutan agod nga magmanginmanggaranon sila sa pagtuo, kag maangkon nila ang Ginharian nga iya ginsaad sa mga nagahigugma sa iya. 

Aleluya:

Mateo 4:23

Si Jesus nagwali sang Maayong Balita sang Ginharian, kag nagpang-ayo sang tanan nga sahi sang mga masakit kag balatian sang mga tawo. 

Ang Pagbasa sang Santos nga Ebanghelyo suno kay:

San Marcos 7:31-37

Dayon naghalin si Jesus sa kadutaan sang Tiro kag nagpadulong sa Linaw sang Galilea. Nag-agi sia sa Sidon kag sa mga duog nga sakop sang Decapolis. May isa ka tawo nga bungol kag halos makahambal nga gindala sang mga tawo kay Jesus, kag nagpakiluoy sila sa iya nga itungtong niya ang iya mga kamot sa bungol. Gindala sia ni Jesus sa unhan malayo sa madamo nga mga tawo, kag gingulo ni Jesus ang iya mga tudlo sa duha ka du longgan sang tawo, nagdupla si Jesus kag gintandog niya ang dila sang tawo. Dayon nagtangla si Jesus sa langit, nagpangamuyo sing madali kag nagsiling sa iya, “Effata,” nga kon sayuron, “Magbukas ka!” Sa gilayon nabuksan ang iya dulonggan kag nagtugak ang iya dila, kag naghambal sia sing maathag. Dayon nagmando si Jesus sa ila tanan nga indi magpanugid sa kay bisan sin-o sang nahanabo, pero sa sagad niya dumili sa ila tapat pa gani nga ginpanugid nila. Ang tanan nga nakabati sini natingala gid. Nagsiling sila, “Daw ano kaayo ang paghimo niya sang tanan nga mga butang. Ginahimo niya nga makabati ang mga bungol kag makahambal ang mga apa!”

Setyembre 8 | Setyembre 10

Ang Pagtawag kay Maria nga Mangin-iloy ni Jesus nga Manlulowas

Liturhiya sang Pulong

(Sabado, Setyembre 8, 2018)

Ang Pagbasa gikan sa Libro ni:

Propeta Miqueas 5:1-4

Mga pumoluyo sang Jerusalem, magdalidali kamo sa pag-aman! Ginakibon kita! Ginasalakay nila ang pangulo sang Israel! Ang GINOO nagasiling, "Betlehem Efrata, ikaw ang isa sang pinakadiotay nga mga banwa sang Juda. Pero gikan sa imo magabangon ako sing isa ka pangulo para sa Israel nga ang iya mga katigulangan kutob pa sang una nga mga panahon.” Gani ang Ginoo magatugyan sang iya mga tawo sa ila mga kaaway tubtob ang babayi nga amo ang magaanak makabata na. Dayon ang iya mga kasimanwa nga yadto sa kabihagan magabalik kag magatingob sa ila kaugalingon nga mga kasimanwa. Kon mag-abot sia, pagagamhan niya ang iya mga tawo sang gahom nga nagagikan sa Ginoo, kag sang pagkahalangdon sang GINOONG Dios mismo. Ang iya mga tawo magapuyo nga wala sing katalagman, kay ang mga tawo sa bug-os nga duta magakilala sang iya pagkagamhanan.

Salmo sa Pagsabat:

Mga Salmo 13:6

Magaamba ako sa GINOO, kay sa gihapon maayo sia sa akon.

Ang Pagbasa sang Santos nga Ebanghelyo suno kay:

San Mateo 1:1-16, 18-23

Amo ini ang lista sang mga katigulangan ni Jesu-Cristo nga kaliwat ni David nga kaliwat man ni Abraham. Si Abraham amay ni Isaac; si Isaac amay ni Jacob; si Jacob amay ni Juda kag sang iya mga utod nga lalaki. Si Juda amay ni Fares kag ni Zara nga ang ila sini iloy si Tamar. Si Fares amay ni Esrom; si Esrom amay ni Aram. Si Aram amay ni Aminadab; si Aminadab amay ni Naason; si Naason amay ni Salmon; si Salmon amay ni Booz kag ang iya sini iloy si Rahab. Si Booz amay ni Obed kag ang iya sini iloy si Rut. Si Obed amay ni Jese; si Jese amay ni Haring David. Si David amay ni Salomon kag ang iya sini iloy amo ang asawa anay ni Urias; si Salomon amay ni Roboam; si Roboam amay ni Abias; si Abias amay ni Asa; si Asa amay ni Josafat; si Josafat amay ni Joram; si Joram amay ni Ozias; si Ozias amay ni Joatam; si Joatam amay ni Acas; si Acas amay ni Ezequias. Si Ezequias amay ni Manases; si Manases amay ni Amon; si Amon amay ni Josias; si Josias amay ni Jeconias kag sang iya mga utod nga lalaki, sang panahon nga ang mga taga-Israel ginbihag pa Babilonia. Sa tapos mabihag ang mga taga-Israel sa Babilonia, amo pa ini ang mga katigulangan ni Jesus: si Jeconias amay ni Salatiel; si Salatiel amay ni Zorobabel; si Zorobabel amay ni Abiud; si Abiud amay ni Eliaquim; si Eliaquim amay ni Azor; si Azor amay ni Sadoc; si Sadoc amay ni Aquim; si Aquim amay ni Eliud; si Eliud amay ni Eleazar; si Eleazar amay ni Matan; si Matan amay ni Jacob; si Jacob amay ni Jose, nga bana ni Maria nga amo ang iloy ni Jesus nga ginatawag Cristo. Amo ini ang pagkatawo ni Jesu-Cristo. Ang iya iloy nga si Maria kalasalon na kay Jose, pero sa wala pa sila makasal nasapwan ni Maria nga nagabusong na sia sa gahom sang Espiritu Santo. Si Jose nga kalasalon sa iya isa ka tawo nga nagahimo sing matarong, pero indi sia luyag nga mahuy-an si Maria sa mga tawo. Gani ginpakamaayo niya ang pagbiya sa iya sa tago lang. Samtang ginabinagbinag ni Jose ini nga butang, ang isa ka anghel sang Ginoo nagpakita sa iya sa damgo nga nagasiling, “Jose, kaliwat ni David, indi ka magkahadlok sa pagpangasawa kay Maria, kay ang Espiritu Santo amo ang naglalang sang ginabusong niya. Magaanak sia sing lalaki, kag pagahingalanan mo sia nga Jesus, kay magaluwas sia sang iya mga tawo sa ila mga sala.” Karon ini tanan nahanabo agod mapamatud-an ang ginhambal sang Ginoo paagi sa propeta, “Ang isa ka ulay magabusong kag magaanak sang isa ka bata nga lalaki, kag pagatawgon sia nga Emanuel” (nga kon sayuron, “Ang Dios kaupod naton”).

Setyembre 7 | Setyembre 9

Ang Pag-isa sang Bag-o kag ang Daan

Liturhiya sang Pulong

(Biyernes, Setyembre 7, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 4:1-5

Dapat kamo magkabig sa amon nga mga alagad ni Cristo kag tulogyanan sang tinago nga mga kamatuoran sang Dios. Kinahanglan nga ang isa ka tulogyanan magmatutom sa iya agalon. Karon, wala sing kaso para sa akon kon hukman ninyo ako, ukon sang bisan ano nga tawuhanon nga paghukom. Wala gani ako nagahukom sang akon kaugalingon. Ang akon konsyensya matinlo, pero wala ini nagapamatuod nga ako matarong. Ang Ginoo amo ang nagahukom sa akon. Gani indi kamo maghukom sa bisan kay sin-o sa wala pa mag-abot ang nagakaigo nga tion. Hulata ninyo tubtob mag-abot ang Ginoo, kay sia magapasanag sang tinago nga mga butang sa kadudolman, kag magapahayag sang sekrito nga mga tinutoyo sang tagipusoon sang mga tawo. Dayon ang tagsa ka tawo magabaton gikan sa Dios sing pagdayaw nga bagay sa iya. 

Salmo sa Pagsabat:

Mga Salmo 37:3-4, 5-6, 27-28, 39-40

Magsalig ka sa GINOO, kag maghimo sing maayo; magkabuhi ka sa duta kag indi ka maano. Pangitaa ang imo kalipay sa GINOO, kag ihatag niya sa imo ang imo gid ginahandom. Itugyan ang imo kaugalingon sa GINOO; magsalig ka sa iya, kag sia magabulig sa imo; iya pasigahon ang imo kaayo subong kapawa, kag ang imo pagkamatarong subong sa udto nga adlaw. Likawi ang malaut kag himoa ang maayo, kag magakabuhi ka sa duta sa walay katubtoban; kay ang Ginoo nagahigugma sang matarong, kag wala sila nagabiya sa iya matutom nga mga tawo. Iya sila ginaapinan sa gihapon, pero ang mga kaliwat sang malaut pagatabugon. Ang GINOO nagaluwas sang matarong nga mga tawo, kag iya sila ginaapinan sa tion sang kagamo. Iya sila ginabuligan kag ginatabangan, ginaluwas niya sila sa mga malaut, kay nagadangop sila sa iya agod apinan.

Aleluya:

Juan 8:12

Ako amo ang kapawa sang kalibutan, siling sang Ginoo; ang nagasunod sa akon indi na gid maglakat sa kadudolman, kundi may kapawa sang kabuhi.

Ang Pagbasa sang Santos nga Ebanghelyo suno kay:

San Lucas 5:33-39

May mga tawo nga nagsiling kay Jesus, “Ang mga gintuton-an ni Juan kag ang mga gintuton-an sang mga Fariseo palapuasa kag palapangamuyo, pero ang imo mga gintuton-an nagakaon kag nagainom sing masunson.” Nagsabat si Jesus, “Mapapuasa bala ninyo ang mga inagda sa kasal samtang yara pa ang nobyo kaupod nila? Pero magaabot ang tion nga ang nobyo kuhaon sa ila, kag magapuasa sila sa sadto nga mga adlaw.” Si Jesus nagsugid sa ila sini man nga palaanggiran, “Wala sing tawo nga nagagunting sa bag-o nga bayu kag itukap ini sa daan nga bayu. Kon himuon niya ini, maguhaban niya ang bag-o nga bayu kag ang tinabas nga bag-o indi nagakabagay sa daan. Wala man sing tawo nga nagasulod sang bag-o nga bino sa daan nga mga sulodlan nga panit. Kon himuon niya ini, ang bino nga bag-o magabusdik sang mga daan nga sulodlan nga panit, ang bino mauyang, kag ang sulodlan nga panit indi mapuslan. Pero ang bag-o nga bino dapat isulod sa bag-o nga sulodlan nga panit. Kag wala man sing bisan sin-o nga maluyag sang bag-o nga bino sa tapos sia makainom sang laon nga bino. Kay siling niya, ‘Ang laon nga bino mas maayo.’ ”

Setyembre 6 | Setyembre 8

"Magapanahid Kamo sang mga Tawo para sa Ginharian sang Dios"

Liturhiya sang Pulong

(Huwebes, Setyembre 6, 2018)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 3:18-23

Wala sing tawo nga magdaya sang iya kaugalingon kon ang bisan sin-o sa inyo maghunahona nga sia maalam nga tawo suno sa talaksan sining kalibutan, dapat sia magbiya sang tanan niya nga kaalam, agod nga manginmaalam sia. Kay ang ginakabig sining kalibutan nga kaalam, kabuangan ina para sa Dios. Kay ginasiling sang kasulatan, “Ginadakop sang Dios ang maalam nga mga tawo sa ila kaabtik.” Kag ang isa na man ka bahin sang kasulatan nagasiling, “Ang Ginoo nakahibalo nga ang painuino sang mga maalam walay pulos.” Gani walay bisan sin-o nga magpabugal sang sarang mahimo sang mga tawo. Kay kon hambalon gid man, ang tanan nga butang inyo. Inyo si Pablo, si Apolos, si Pedro, ining kalibutan, ang kabuhi kag ang kamatayon, ang karon kag ang palaabuton. Ini tanan inyo, kag kamo iya ni Cristo, kag si Cristo iya sang Dios.

Salmo sa Pagsabat:

Mga Salmo 24:1-2, 3-4, 5-6

Ang kalibutan kag ang tanan nga yara sa iya, iya sang GINOO, iya man ang duta kag ang tanan nga nagakabuhi sa duta. Iya ini gintukod sa madalom nga mga tubig sa idalom sang duta, ginpasad niya ang iya mga sadsaran sa kadadalman sang dagat. Sin-o bala ang makataklad sa bukid sang GINOO? Sin-o bala ang makasulod sa iya balaan nga Templo? Ang may matinlo nga binuhatan kag paghunahona, nga wala nagasimba sa mga dios-dios, kag wala nagasaad sang kabutigan. Pagabendisyunan sia sang GINOO, kag ang Dios nga iya manlulowas magapakilala nga wala sia sing sala. Amo ina ang mga tawo nga nagapalapit sa Dios, nga nagapalapit sa atubangan sang Dios ni Jacob.

Aleluya:

Mateo 4:19

Upod kamo sa akon siling sang Ginoo, kay tudloan ko kamo sa pagpanahid sang mga tawo sa Dios.

Ang Pagbasa sang Santos nga Ebanghelyo suno kay:

San Lucas 5:1-11

Isa sadto ka adlaw, si Jesus nagatindog sa ubay sang linaw sang Genezaret. Ang mga tawo nagdinaguso pakadto sa iya sa pagpamati sang pulong sang Dios. May nakita sia nga duha ka sakayan nga yara na sa higad, kag ang mga mangingisda nakapanaog na sa paghugas sang ila sahid. Ang isa ka sakayan iya ni Simon. Ginsakyan ini ni Jesus kag ginpangabay niya si Simon nga itulak sing diutay ang sakayan. Nagpungko si Jesus sa sakayan kag nagpanudlo sa mga tawo. Sa tapos sia makahambal, nagsiling sia kay Simon, “Magpalawod ka kag iladlad ang inyo sahid, agod makakuha kamo sang mga isda.” Si Simon nagsabat, “Manunodlo, nagpanahid kami sa bug-os gid nga gab-i kag wala gid kami sing may nakuha. Pero kon amo ina ang siling mo, iladlad ko ang sahid.” Ginladlad nila ang sahid kag nakakuha sila sing madamo nga isda sa bagay nga ang ila sahid daw magisi na.

Nakakuha sila sing madamo nga isda. (5:6)

Gani ginpaypay nila ang ila kaupod sa isa ka sakayan sa pagbulig sa ila. Nagpalapit ini sila kag ginpuno nila ang duha ka sakayan sang isda tubtob nga daw malunod na sila. Sang makita ni Simon Pedro ang natabo, nagluhod sia sa atubangan ni Jesus kag nagsiling, “Palayo ka sa akon, Ginoo, kay makasasala ako nga tawo.” Sia kag ang iya kaupdanan natingala gid sa kadamo sang isda nga ila nakuha. Ang mga kaupod ni Simon nga si Santiago kag si Juan, nga mga anak ni Zebedeo, natingala man. Si Jesus nagsiling kay Simon, “Indi ka mahadlok. Sugod karon magapanahid ikaw sang mga tawo.” Ginpatakas nila ang mga sakayan, ginbayaan nila ang tanan kag nag-upod kay Jesus. 

Setyembre 5 | Setyembre 7