“Ikaw ang Cristo - ang Anak sang Dios nga Buhi”

Liturhiya sang Pulong

(Biyernes, Hunyo 29, 2018)

1. Ang Pagbasa gikan sa mga:

Binuhatan sang mga Apostoles 12:1-11

Sa sini man nga tion, ang hari nga si Herodes nagsugod sa paghingabot sa pila ka mga katapo sang iglesia. Ginpapatay niya si Santiago nga utod ni Juan paagi sa espada. Sang makita niya nga nalipay ang mga Judio sang iya ginhimo, ginpadakop pa gid niya si Pedro. Ini natabo sa tion sang Piesta sang Tinapay nga wala sing Lebadora. Sang madakop nila si Pedro, ginsulod nila sia sa bilangguan kag ginpagwardyahan sang apat ka hut-ong sang mga soldado nga ang tagsa ka hut-ong may apat ka soldado. Si Herodes nagplano nga ipaatubang sia sa mga Judio sa tapos ang Piesta sang Pascua. Gani, ginhunong si Pedro sa bilangguan, pero ang mga katapo sang iglesia nagpangamuyo sa Dios sing hanuot gid para sa iya. Isa sadto ka gab-i sa wala pa ang adlaw nga ginplano ni Herodes nga ipaatubang niya si Pedro sa mga tawo, nagtulog si Pedro sa tunga sang duha ka gwardya. Nahigtan sia sang duha ka kadena kag may mga gwardya sa puwerta sang bilangguan. Sa hinali nagpakita ang isa ka anghel sang Ginoo, kag nagsanag ang bilangguan. Gin-uyog sang anghel ang abaga ni Pedro kag ginpukaw sia nga nagasiling, “Dali! Bangon ka!” Kag sa gilayon nahukas ang mga kadena nga nagagapos sang iya mga kamot. Kag ang anghel nagsiling sa iya, “Hugta ang imo paha kag higti ang imo mga sandalyas.” Gintuman ini ni Pedro. Ang anghel nagsiling sa iya, “Magpangunop ka kag magsunod sa akon.” Ginsunod sia ni Pedro pa gwa sa bilangguan. Pero wala sia makahibalo nga matuod ining ginhimo sang anghel; naghunahona sia nga ini isa lamang ka palanan-awon. Ginligaran nila ang nahauna nga balantayan sang mga gwardya kag ang ikaduha kag nakalambot sila sa salsalon nga puwerta nga nagapadulong sa siyudad. Nag-abri ang puwerta sa iya lamang kaugalingon kag naggwa sila. Nag-agi sila sa isa ka dalan kag sa gilayon ginbayaan sang anghel si Pedro. Dayon nakamarasmas si Pedro kon ano ang natabo sa iya, kag nagsiling sia, “Karon natalupangdan ko nga matuod gid nga ginpadala sang Ginoo ang iya anghel, kag iya ginluwas ako sa gahom ni Herodes kag sa tanan nga buhaton kuntani sang mga Judio sa akon.” 

Salmo sa Pagsabat:

Mga Salmo 34:2-3, 4-5, 6-7, 8-9

(S) Ang Ginoo nagkuha sang tanan ko nga mga kahadlok.

Sa gihapon magapasalamat ako sa Ginoo; indi gid ako mag-untat sa pagdayaw sa iya. Dayawon ko sia tungod sang iya mga binuhatan; kabay nga ang mga ginapigos magpamati kag magkalipay! (S)
Ibantala ta ang pagkadaku sang GINOO; dayawon ta sing tingob ang iya ngalan! Nagpangamuyo ako sa GINOO kag ginsabat niya ako; ginkuha niya ang tanan ko nga mga kahadlok. (S)
Ang mga ginapigos nagasalig sa iya kag nagakalipay sila; indi gid sila mapaslawan. Ang mga makalulooy nagapanawag sa iya,  kag nagasabat sia sa ila; ginaluwas niya sila sa tanan nila nga mga kalalat-an. (S)
Ang anghel sang GINOO nagabantay sa tanan nga nagatahod sa iya, kag iya sila ginaluwas sa katalagman. Tilawi kag tan-awon ninyo kon daw ano kaayo ang GINOO! Bulahan ang tawo nga nagadangop sa iya. (S)

2. Ang Pagbasa gikan sa Ikaduha nga Sulat ni San Pablo nga Apostol, sa kay:

Timoteo 4:6-8, 17-18

Nahanungod sa akon, ang tion nag-abot nga ako ihalad na, kag tion na ini nga magataliwan ako sa sini nga kabuhi. Nahimo ko na ang akon masarangan sa palumba, nadalagan ko na ang bug-os nga dalaganon kag natipigan ko ang pagtuo. Karon, ang padya sang pagdaog nagahulat sa akon, ang korona sang pagkamatarong nga ihatag sa akon sang Ginoo, ang matarong nga Hukom, sa sadto nga Adlaw—kag indi lamang sa akon, kundi sa tanan man nga nagahulat nga may paghigugma sang iya pagpahayag.

Ang padya sang pagdaog nagahulat sa akon. (4:8)

Pero ang Ginoo nag-upod sa akon kag iya ako ginhatagan sing kusog, sa bagay nga nabantala ko ang bug-os nga pulong sang Dios agod makabati ang tanan nga mga Gentil, kag ginluwas ako sa baba sang leon. Ang Ginoo magaluwas sa akon sa tanan nga kalautan, kag iya ako dalhon nga indi maano didto sa iya langitnon nga Ginharian. Sa iya ang himaya sa wala sing katapusan! Kabay pa.

Aleluya:

Mateo 16:18

Ikaw si Pedro kag sa sini nga bato pagatukoron ko ang akon Simbahan, kag ang gahom sang kamatayon indi makadaog sa iya. 

Ang Pagbasa sang Santos nga Ebanghelyo suno kay:

San Mateo 16:13-19

Nagkadto si Jesus sa kadutaan sang Cesarea Filipo sa diin nagpamangkot sia sa iya mga gintuton-an, “Sin-o bala ang Anak sang Tawo suno sa mga tawo?” Nagsabat sila, “May nagasiling nga si Juan Bautista. May iban nga nagasiling nga si Elias kag may iban pa gid nga nagasiling nga si Jeremias ukon iban nga mga propeta.” Si Jesus nagpamangkot sa ila, “Pero suno sa inyo, sin-o bala ako?” Si Simon Pedro nagsabat, “Ikaw ang Cristo, ang Anak sang Dios nga buhi.” Si Jesus nagsabat, “Bulahan ka, Simon, anak ni Juan! Kay ini nga kamatuoran wala ginpahayag sa imo sang tawo, kundi sang akon Amay sa langit. Kag ako nagasiling sa imo, ikaw si Pedro nga kon sayuron ‘Bato’ kag sa sini nga bato pagatukoron ko ang akon iglesia. Bisan ang gahom sang kamatayon indi makadaog sa iya. Ihatag ko sa imo ang mga yabi sang Ginharian sang langit, kag kon ano ang imo ginadumilian sa duta pagadumilian man didto sa langit, kag kon ano ang imo ginatugotan sa duta pagatugotan man didto sa langit.”

Hunyo 28 | Hunyo 30

"Ang Maalam nga Nagpatindog sang Ila Balay sa Bato"

Liturhiya sang Pulong

(Huwebes, Hunyo 28, 2018)

Ang Pagbasa gikan sa Ikaduha nga Libro sang:

Mga Hari 24:8-17

Si Joaquin nanginghari sang Juda sang nagaedad sia sing 18 ka tuig, kag naggahom sia sa Jerusalem sing tatlo ka bulan. Ang iya iloy amo si Nehusta, nga anak ni Elnatan, nga nagikan sa Jerusalem. Si Joaquin nagpakasala batok sa GINOO, nga nagasunod sang ginhimo sang iya amay. Sa panahon sang iya paggahom ang mga hangaway sang Babilonia, nga ginapangulohan sang mga opisyales ni Haring Nabucodonosor nagsalakay kag nagkibon sang Jerusalem. Sa panahon sang pagkibon, si Nabucodonosor gid nagkadto sa Jerusalem, kag si Haring Joaquin, upod sang iya iloy, sang iya mga anak nga lalaki, sang iya mga opisyales, kag sang mga opisyales sa palasyo, nag-ampo sa mga taga-Babilonia. Si Nabucodonosor, sa iya ika-8 ka tuig nga paggahom nagdala kay Joaquin subong bihag. Kag gindala niya sa Babilonia ang tanan nga malahalon nga mga pagkabutang sa Templo kag sa palasyo. Suno sa ginsiling sang GINOO, si Nabucodonosor nagpamuka sang tanan nga mga galamiton nga bulawan nga ginhimo ni Haring Salomon agod gamiton sa Templo. Si Nabucodonosor nagdala sang mga pumoluyo sang Jerusalem subong bihag, ang tanan nga mga prinsipe, kag sang tanan nga kinilala nga mga tawo, 10,000 sila tanan. Iya man gindala ang tanan nga sampaton nga mga manug-obra, lakip ang mga panday sa salsalon, kag ginbilin niya sa Juda ang imol lamang nga mga pumoluyo. Gindala ni Nabucodonosor si Joaquin sa Babilonia subong bihag, upod sa iya iloy, sa iya mga asawa, sa iya mga opisyales, kag sa kinilala nga mga pumoluyo sang Juda. Gindala ni Nabucodonosor sa Babilonia ang tanan nga mapuslanon nga mga tawo, 7,000 sila tanan, kag 1,000 ka sampaton nga mga manug-obra, lakip ang mga panday sa salsalon, tanan sila maayo sing lawas nga sarang makaentra sa pagkasoldado. Si Matanias nga tiyo ni Joaquin ginhimo ni Nabucodonosor nga manginhari sang Juda kag ginbaylohan ang iya ngalan kay Sedequias.

Salmo sa Pagsabat:

Mga Salmo 79:1-2, 3-5, 8, 9

(S) O Ginoo, luwasa kami tungod sang imo kadungganan.

O Dios, ginsalakay sang mga di-diosnon ang duta sang imo mga tawo! Gindagtaan nila ang imo balaan nga Templo kag ginbayaan nila ang Jerusalem nga nalaglag. Ginbilin nila ang mga bangkay sang imo mga tawo agod manginkalan-on sang mga kapispisan, ang mga bangkay sang imo mga alagad agod manginkalan-on sang mga sapat nga talunon. (S)
Ginpaagay nila ang dugo sang imo mga tawo kaangay sang tubig; nagbaha ang dugo sa bug-os nga Jerusalem, kag wala sing may nabilin sa paglubong sang mga bangkay. Ang mga pungsod sa palibot namon nagayaguta sa amon, nagakadlaw sila kag nagalangu-lango sa amon. Tubtob san-o pa bala ang imo pagkaakig sa amon, O GINOO? Wala bala sing katapusan? Magapadayon bala sa pagdabdab ang imo kaakig subong sang kalayo? (S)
Indi kami pagsiluti tungod sang mga sala sang amon mga katigulangan, sa baylo kaluoyi kami karon, kay nawad-an kami sang tanan nga paglaom. (S)
Buligi kami, O Dios nga amon manlulowas, tungod sa imo kaugalingon nga kadungganan. Luwasa kami kag patawara ang amon mga sala, agod ang mga tawo magadayaw sa imo. (S)

Aleluya:

Juan 14:23

Ang nagahigugma sa akon magatuman sang akon pulong, siling sang Ginoo, kag ang akon Amay magahigugma sa iya kag kami magakadto sa iya kag magakabuhi upod sa iya.

Ang Pagbasa sang Santos nga Ebanghelyo suno kay:

San Mateo 7:21-29

“Indi ang tanan nga nagatawag sa akon ‘Ginoo, Ginoo,’ makasulod sa Ginharian sang langit, kundi ang nagatuman lamang sang kabubot-on sang akon Amay nga yara sa langit. Kon mag-abot yadto nga Adlaw, madamo ang magatawag sa akon ‘Ginoo, Ginoo! Sa imo ngalan nagwali kami, sa imo ngalan nagtabog kami sang mga yawa kag naghimo sang madamo nga mga milagro!’ Dayon magasiling ako sa ila, ‘Wala ako makakilala sa inyo. Palayo kamo sa akon, kamo nga manugbuhat sang malaut!’” “Gani, ang nagapamati sang akon mga pulong kag nagatuman sini kaangay sia sang isa ka maalam nga tawo nga nagpatindog sang iya balay sa bato. Nagbunok ang ulan, nag-awas ang baha sa pangpang sang suba, kag nagwaswas ang mabaskog nga hangin sa balay. Pero wala ini matumba kay napasad ini sa bato. “Ang nagapamati sang akon mga pulong kag wala nagatuman sini, kaangay sia sa tawo nga buangboang nga nagpatindog sang iya balay sa balas. Nagbunok ang ulan, nag-awas ang baha sa pangpang sang suba, kag nagwaswas ang mabaskog nga hangin sa balay. Natumba ini kag daw ano ang pagragamak sini!” Sa tapos mahambal ni Jesus ini nga mga butang, ang mga tawo natingala gid sa iya pagpanudlo. Indi sia kaangay sang ila mga manunodlo sang Kasugoan, kay ang iya pagpanudlo may awtoridad.

Hunyo 27 | Hunyo 29

"Makilala ninyo Sila sa Ila mga Buhat"

Liturhiya sang Pulong

(Miyerkules, Hunyo 27, 2018)

Ang Pagbasa gikan sa Ikaduha nga Libro sang:

Mga Hari 22:8-13; 23:1-3

Gindala ni Safan ang sugo sang hari kay Helcias, kag si Helcias nagsiling sa iya nga nakita niya ang Libro sang Kasuguoan sa Templo. Ginhatag ni Helcias ang libro kay Safan kag ginbasa niya ini. Dayon nagbalik si Safan sa hari kag nagsugid: “Ang imo mga alagad nagkuha sang kuwarta sa Templo kag ginhatag ini sa mga tawo nga gintugyanan sa pagpakaayo sang Templo.” Kag dayon nagsiling pa gid sia, “Yari ang libro nga ginhatag sa akon ni Helcias.” Kag ginbasa niya ini sing mabaskog sa hari. Sang pagkabati sang hari sang nasulat sa libro, gingisi niya ang iya bayu sa kasubo. Ginpatawag niya si Helcias, si Safan, ang iya anak nga si Ahicam, si Acbor nga anak ni Mecaya, kag si Asaya nga nagaalagad sa hari, kag ginsugo sila: “Lakat kamo kag magpamangkot sa GINOO para sa akon kag para sa tanan nga mga tawo sang Juda nahanungod sa mga pagtudlo sini nga libro. Ang GINOO naakig sa aton, kay ang aton mga katigulangan wala magtuman sang dapat nila buhaton suno sa ginsiling sini nga libro.” Ginpatawag ni Josias ang tanan nga mga pangulo sang Juda kag Jerusalem, kag nagsulod sila sa Templo sing tingob, upod ang mga pari kag mga propeta kag ang tanan nga nabilin nga mga pumoluyo sang Jerusalem, manggaranon kag imol. Sa atubangan nila tanan,  ginbasa sang hari sing mabaskog ang bug-os nga Libro sang Kasugtanan nga nasapwan sa Templo. Nagtindog sia sa luyo sang haligi sang hari, kag naghimo sing kasugtanan sa GINOO sa pagtuman sa iya, kag sa pagbantay sang iya mga kasugoan kag mga sugo sa bug-os niya nga tagipusoon kag kalag, kag himuon niya ang ginasiling sang kasugtanan, suno sa nasulat sa libro. Ang tanan nga mga tawo nagsaad sa pagtuman sang kasugtanan.

Salmo sa Pagsabat:

Mga Salmo 119:33, 34, 35, 36, 37, 40

(S) Tudloi ako, O GINOO, sang kahulogan sang imo mga kasugoan.

Tudloi ako, O GINOO, sang kahulogan sang imo mga kasugoan, kag tumanon ko sila sa tanan nga tion. (S)
Isaysay sa akon ang imo kasugoan, kag akon ini tumanon; tipigan ko ini sa bug-os ko nga tagipusoon. (S)
Tuytoyi ako sa dalanon sang imo mga sugo, kay sa ila may kalipayan ako. (S)
Hatagi ako sing handom sa pagtuman sang imo mga pagsulondan, sa baylo sang handom nga magmanggaranon. (S)
Ilikaw ang akon igtalupangod sa wala sing pulos; magmaayo ka sa akon suno sa imo ginsaad. (S)
Luyag ko magtuman sang imo mga sugo, tungod kay ikaw matarong, hatagi ako sing bag-o nga kabuhi! (S)

Aleluya:

Juan 15:4, 5

Magpabilin kamo sa akon, kag ako magapabilin sa inyo, siling sang Ginoo; ang nagapabilin sa akon, kag ako sa iya, magapamunga sing madamo.

Ang Pagbasa sang Santos nga Ebanghelyo suno kay:

San Mateo 7:15-20

“Andam kamo sa indi matuod nga mga propeta. Nagakadto sila sa inyo nga daw mga karnero, pero sa sulod subong sila sang mapintas nga mga lobo. Makilala ninyo sila sa ila mga pagginawi. Ang mga sapinit wala nagapamunga sing ubas, kag ang talungon wala nagapamunga sing mga higos. Ang maayo nga kahoy nagapamunga sing maayo; ang malain nga kahoy nagapamunga sing malain. Ang maayo nga kahoy indi makapamunga sing malain nga bunga, kag ang malain nga kahoy indi makapamunga sing maayo nga bunga. Ang tagsa ka kahoy nga wala nagapamunga sing maayo nga bunga ginatapas kag ginahaboy sa kalayo. Gani, makilala ninyo ang indi matuod nga mga propeta sa ila mga buhat.”

Hunyo 26 | Hunyo 28

"Indi Pag-ihaboy ang mga Perlas sa Atubangan sang mga Baboy"

Liturhiya sang Pulong

(Martes, Hunyo 26, 2018)

Ang Pagbasa gikan sa Ikaduha nga Libro sang:

Mga Hari 19:9-11, 14-21, 31-35, 36

Nakabati ang mga taga-Asiria nga ang mga hangaway nga Egiptohanon nga ginapangulohan ni Haring Terhaka sang Etiopia, nagapakari sa pagsalakay sa ila. Sang mabatian ini sang emperador, niya sini, nagpadala sia sang sulat kag Haring Ezequias sang Juda sa pagsiling sa iya, “Ang Dios nga imo ginasaligan nagsiling sa imo nga indi ikaw mahulog sa akon mga kamot, pero indi ina magpatalang sa imo. Nahibal-an mo kon ano ang ginahimo sang emperador sang Asiria sa pungsod nga iya luyag laglagon. Nagahunahona ka bala nga makapalagyo ikaw? Ginkuha ni Haring Ezequias ang sulat gikan sa mga nagdala kag ginbasa ini. Dayon nagkadto sia sa Templo, ginbutang niya ang sulat didto sa atubangan sang GINOO, kag nagpangamuyo, “O GINOO, ang Dios sang Israel, nga nagalingkod sa imo harianon nga trono, ikaw lamang amo ang Dios, nagagahom sa tanan nga mga ginharian sang kalibutan. Gintuga mo ang langit kag ang duta. Karon, O GINOO, tan-awa ang nagakatabo sa amon. Pamatii ang tanan nga ginsiling ni Senaquerib sa pagpakahuya sa imo, ang buhi nga Dios. O GINOO, nahibal-an namon tanan nga ang mga emperador sang Asiria naglaglag sang madamo nga mga pungsod, ginhimo ang ila mga duta nga mamingaw, kag ginsunog ang ila mga dios—nga indi matuod nga dios, mga larawan lamang nga kahoy kag bato nga ginhimo sang mga kamot sang tawo. Karon, O GINOO nga amon Dios, luwasa kami gikan sa mga Asirianhon, agod nga ang tanan nga mga kapungsoran sang kalibutan makakilala nga ikaw lamang, O GINOO, amo ang Dios.” Dayon si Isaias nagpahibalo kay Haring Ezequias nga nagasiling nga ang GINOO nakabati sang pangamuyo sang hari, kag nagsabat sini. Ang Ginoo nagsiling, “Ang siyudad sang Jerusalem nagakadlaw sa imo, Senaquerib, kag nagayaguta sa imo. May mga tawo sa Jerusalem kag sa Bukid sang Sion nga mabilin nga buhi, kay ang GINOO nagpat-od sini nga matabo.” Amo ini ang ginsiling sang GINOO nahanungod sa emperador sang Asiria: “Indi sia makasulod sa sini nga siyudad ukon makapana sing bisan isa ka baslay batok sini. Wala sing mga soldado nga may mga taming nga makapalapit sa siyudad, kag wala sing mga trinsera nga mapatindog sa palibot sini. Magabalik sia sa amo man nga dalan nga iya gin-agyan sang iya pagkari, kag indi sia makasulod sa sini nga siyudad. Ako, ang GINOO, naghambal sini. Apinan ko kag bantayan ini nga siyudad, tungod sa akon kadungganan kag tungod sang ginsaad ko kay David nga akon alagad.” Sadto nga gab-i ang anghel sang GINOO nagsulod sa kampamento sang mga Asirianhon kag nagpatay sang 185,000 ka mga soldado. Sang kaagahon sa madason nga adlaw, didto nagahamyang sila tanan nga patay! Dayon si Senaquerib nga emperador sang Asiria nalagyo kag nagbalik sa Nineve.

Salmo sa Pagsabat:

Mga Salmo 48:2-3, 3-4, 10-11

(S) Ang Dios magabantay sa Iya siyudad nga indi maano sa wala sing katapusan.

Gamhanan ang Ginoo, kag dapat gid dayawon, sa siyudad sang aton Dios, sa Iya balaan nga bukid. Ang Sion, ang bukid sang Dios, mataas kag matahom; ang siyudad sang gamhanan nga hari sini nagadala sing kalipay sa bug-os nga kalibutan! (S)
Ang Dios nagapakita nga upod sa iya wala sing katalagman sa sulod sang mga pamakod sang siyudad. Nagtipon ang mga hari kag nagkari sa pagsalakay sang bukid sang Sion. (S)
Sa sulod sang Imo Templo, O Dios, ginapanumdom namon ang Imo mapinadayunon nga gugma ginadayaw ikaw sang mga tawo bisan diin, kag ang imo pagkabantog nagalapnag sa bug-os nga duta. Matarong ang imo paghukom. (S)

Aleluya:

Juan 8:12

Ako amo ang kapawa sang kalibutan, siling sang Ginoo, ang nagasunod sa akon indi na gid maglakat sa kadudolman, kundi may kapawa sang kabuhi.

Ang Pagbasa sang Santos nga Ebanghelyo suno kay:

San Mateo 7:6, 12-14

“Indi pag-ihatag ang balaan nga mga butang sa mga ido, kay balikdon ka nila kag kadton. Indi pag-ihaboy ang mga perlas sa atubangan sang mga baboy kay pagatasakon lamang nila ini.” “Himoa sa iban ang luyag ninyo nga pagahimuon sa inyo. Amo ini ang kahulogan sang Kasugoan ni Moises kag ang pagtudlo sang mga propeta.” “Sulod kamo sa puwerta nga makitid, kay masangkad ang puwerta kag mahapos ang dalan pakadto sa kalaglagan, kag madamo ang nagaalagi sa sini. Pero makitid ang puwerta kag mabudlay ang dalan pakadto sa kabuhi, kag diutay gid lang ang nakatultol sini.”

Hunyo 25 | Hunyo 27

"Kuhaa anay ang Puling nga daw Tablon Kadaku sa Imo Mata"

Liturhiya sang Pulong

(Lunes, Hunyo 25, 2018)

Ang Pagbasa gikan sa Ikaduha nga Libro sang:

Mga Hari 17:5-8, 13-15, 18

Dayon ginsalakay ni Salmanasar ang Israel, kag ginkibon ang Samaria. Sa ikatlo nga tuig sang pagkibon, nga amo ang ika-9 nga tuig sang paggahom ni Oseas, ang Emperador sang Asiria nag-agaw sang Samaria, gindala ang mga Israelinhon sa Asiria subong bihag, kag ginpapuyo ang iban sa ila sa siyudad sang Hala, ang iban sa suba sang Habor, sakop sang Gosan kag ang iban sa mga siyudad sang Media. Ang Samaria napukan tungod kay ang mga Israelinhon nagpakasala batok sa GINOO nga ila Dios, nga nagluwas sa ila sa hari sang Egipto kag ginpagwa niya sila sa Egipto. Nagsimba sila sa iban nga mga dios, nagsunod sila sa mga pagbinatasan sang mga tawo nga ginpagwa sang GINOO samtang ang iya mga tawo nagapasulod sa duta, kag ginsunod nila ang mga pagbinatasan nga gintudlo sang mga hari sang Israel. Ang GINOO nagpadala sang iya mga mensahero kag mga propeta sa pagpaandam sa Israel kag sa Juda nga nagasiling, “Bayai ang inyo malaut nga mga pagginawi kag tumana ang akon mga sugo nga yara sa kasugoan nga ginhatag ko sa inyo mga katigulangan nga akon ginhatag sa inyo paagi sa akon mga alagad nga mga propeta.” Pero indi sila magtuman. Nagpatig-a sila kaangay sang ila mga katigulangan, nga wala magsalig sa GINOO nga ila Dios. Wala sila magtuman sa iya mga pagtudlo, wala sila magtuman sang kasugtanan nga iya ginhimo upod sa ila mga katigulangan, kag wala sila magpamati sang iya mga paandam. Nagsimba sila sa walay pulos nga mga diosdios kag sila man manginwalay pulos, kag ginsunod nila ang mga pagbinatasan sang mga pungsod sa palibot, nga wala nagatuman sang sugo sang GINOO nga indi magsunod sini. Ang GINOO naakig sa mga Israelinhon kag gintabog niya sila sa iya atubangan, kag ang nabilin amo lamang ang ginharian sang Juda.

Salmo sa Pagsabat:

Mga Salmo 60:3, 4-5, 12

(S) Luwasa kami paagi sa imo kusog O Ginoo kag pamatii ang amon pangamuyo.

Ginpaantos mo ang imo mga tawo sa tama nga kabudlayan; ginhatagan mo kami sing bino nga naghubog sa amon. (S)
Ginpaandaman mo ang mga nagatamod sa imo, agod makalikaw sila sa kalaglagan. Luwasa kami sang imo gahom, sabta man ang amon pangamuyo, agod nga maluwas ang mga tawo nga imo ginahigugma. (S)
Buligi man kami sa pagsumpong sang kaaway kay ang bulig sang tawo wala sing pulos. Kon ang Dios magdampig sa amon magadaog kami, lutoson niya ang amon mga kaaway. (S)

Aleluya:

Hebreo 4:12

Ang pulong sang Dios buhi kag gamhanan, ini nagatungkad sang mga panghunahona kag mga handom sang tagipusoon sang mga tawo.

Ang Pagbasa sang Santos nga Ebanghelyo suno kay:

San Mateo 7:1-5

“Indi kamo maghukom sa iban, agod indi man kamo paghukman sang Dios, kay ang Dios magahukom sa inyo suno sa inyo paghukom sa iban, kag ang talaksan nga inyo ginagamit sa iban, amo man ang talaksan nga gamiton sang Dios sa inyo. Kay ngaa man bala ginamulalongan mo gid ang diutay nga puling sa mata sang imo utod, pero wala mo ginasapak ang puling nga daw tablon kadaku sa imo kaugalingon nga mata? Ano ang pagsiling mo sa imo utod, ‘Abi kuhaon ta ang diutay nga puling sa imo mata,’ kon sa imo kaugalingon nga mata may puling nga daw tablon kadaku? Salimpapaw! Kuhaa anay ang puling nga daw tablon kadaku sa imo mata, agod makakita ka sing maathag kag ugaling kuhaon mo ang diutay nga puling sa mata sang imo utod.

Hunyo 24 | Hunyo 26

"Maathag nga ang Gahom sang Ginoo yara sa Iya"

Liturhiya sang Pulong

(Domingo, Hunyo 24, 2018)

1. Ang Pagbasa gikan sa Libro ni:

Isaias 49:1-6

Pamati kamo sa akon, mga kapungsoran sa malayo, kamo nga mga tawo nga nagapuyo sa malayo nga mga duog! Sa wala pa ako matawo, ang GINOO nagpili sa akon, kag naghimo sa akon nga mangin-iya alagad. Ginhimo niya ang akon mga pulong nga matalom subong sang espada; gin-apinan niya ako sang iya kaugalingon nga kamot. Ginhimo niya ako kaangay sang baslay, matalom kag handa nga gamiton. Nagsiling sia sa akon, “Israel, ikaw ang akon alagad. Tungod sa imo, ang mga tawo magadayaw sa akon.” Nagsiling ako, “Nagpangabudlay ako, pero wala sing pulos ini. Naurot na ang akon kusog, pero wala gid ako sing nahimo.” Wala sapayan makasalig ako sa GINOO nga nagatadlong sang tanan nga mga butang; hatagan niya ako sing balos sang akon ginhimo. Sa wala pa ako matawo, ang GINOO nagpili sa akon; ginhimo niya ako nga iya alagad sa pagpabalik sang iya mga tawo, sa pagpabalik sang nag-alaplaag nga mga tawo sang Israel. Ang GINOO nagpadungog sa akon; sia ang ginahalinan sang akon kusog. Ang GINOO nagsiling sa akon, “May daku ako nga bulohaton para sa imo, alagad ko: Indi lamang nga ipabalik mo sa pagkagamhanan ang mga tawo sang Israel nga nagkalabilin nga buhi, kundi himuon ko man ikaw nga isa ka kapawa sa mga kapungsoran—agod ang bug-os nga kalibutan maluwas.”

Salmo sa Pagsabat:

Mga Salmo 139:1-3, 13-14, 14-15

(S) Ginadayaw ko ikaw kay ang tanan mo nga ginhimo makatalanhaga kag makatilingala.

O GINOO, gin-usisa mo ako, kag nakilala mo ako. Nahibaluan mo ang tanan nga ginahimo ko; gikan sa malayo nahangpan mo ang akon mga panghunahona. Makita mo ako, bisan nagaobra ukon nagapahuway ako, nahibaluan mo ang tanan ko nga mga ginahimo. (S)
Ginhimo mo ang tanan nga mga bahin sang akon lawas; gintaod mo ako sa tiyan sang akon iloy. Ginadayaw ko ikaw kay dapat ka tahuron; ang tanan mo nga ginahimo makatalanhaga kag makatilingala. (S)
Nahibal-an ko ini sa bug-os ko nga tagipusoon. Nakita mo ang pagdihon sang akon mga tul-an, nga gintaod sing mainandamon sa tiyan sang akon iloy, sang nagatubo ako didto nga indi makita. (S)

2. Ang Pagbasa gikan sa mga:

Binuhatan sang mga Apostoles 13:22-26

Sang mapahalin sia, ginhimo sang Dios si David nga hari nila. Amo ini ang ginsiling sang Dios nahanungod sa iya, ‘Si David nga anak ni Jese amo ang tawo nga akon naluyagan, kay isa sia ka tawo nga nagatuman sang tanan nga ginasugo ko sa iya.’ Si Jesus, isa sang mga kaliwat ni David, amo ang ginhimo sang Dios nga Manlulowas sang Israel suno sa iya ginsaad. Sa wala pa makasugod si Jesus sang iya bulohaton, nagwali si Juan sa tanan nga mga tawo sa Israel nga magbiya sila sa ila mga sala kag magpabautiso. Kag sang nagahingapos na si Juan sang iya bulohaton, nagsiling sia sa mga tawo, ‘Sa inyo abi, sin-o bala ako? Indi ako ang ginapaabot ninyo. Pero tandai ninyo! Nagakari sia nga ulihi lang sa akon, pero indi ako takos sa paghubad sang higot sang iya mga sandalyas.’ “Mga utod, mga kaliwat ni Abraham, kag tanan kamo nga mga Gentil nga nagasimba sa Dios: sa aton ginpadala ining balita sang kaluwasan!

Aleluya:

Lucas 1:76

Ikaw, anak ko, pagatawgon nga propeta sang Labing Makagagahom nga Dios, magauna ka sa Ginoo sa pag-aman sang iya dalanon.

Ang Pagbasa sang Santos nga Ebanghelyo suno kay:

San Lucas 1:57-66, 80

Nag-abot ang tion nga inugbata na ni Elisabet, kag nagbata sia sing lalaki. Ang iya mga kaingod kag mga paryente nakabati kon daw ano kadaku ang kaluoy sang Ginoo sa iya kag nagkinalipay sila upod sa iya. Sang walo na ka adlaw ang bata, nag-abot sila sa pagtuli sa iya. Kuntani hingalanan nila sia nga Zacarias nga amo ang ngalan sang iya amay. Pero ang iya iloy nagsiling, “Indi! Pagahingalanan sia kay Juan.” Nagsiling sila sa iya, “Pero wala ka gid sing paryente nga amo ina ang ngalan!” Dayon nagsinyas sila sa iya amay sa pagpamangkot kon sin-o ang iya luyag nga ipahingalan sa bata. Nagpangayo si Zacarias sing papel kag nagsulat, “Hingalanan sia kay Juan.” Natingala gid sila tanan. Sa gilayon makahambal na si Zacarias kag nagdayaw sia sa Dios. Ang ila mga kaingod hinadlukan gid, kag ang balita nahanungod sining mga hitabo naglapnag sa mga kabaryuhanan sa mga bakulod sang Judea. Ang mga nakabati sini nga mga hitabo nagpamalandong kag nagpamangkot, “Mangin-ano ayhan ini nga bata?” Kag maathag nga ang gahom sang Ginoo yara sa iya. Ang bata nagdaku kag nagtubo sa lawas kag espiritu. Nagpuyo sia sa desierto tubtob sa adlaw nga sia magapakita na sa mga taga-Israel.

Hunyo 23 | Hunyo 25

Ang Dios kag ang Manggad

Liturhiya sang Pulong

(Sabado, Hunyo 23, 2018)

Ang Pagbasa gikan sa Ikaduha nga Libro sang:

Mga Cronica 24:17-25

Pero sang napatay si Joiada, ang mga pangulo sang Juda naghaylo kay Haring Joas sa pagpamati sa ila. Ang mga tawo nag-untat sa pagsimba sa Templo sang GINOO, ang Dios sang ila mga katigulangan, kag nagsimba sa mga diosdios kag sa balaan nga mga palo sang diosa nga si Ashera. Ang ila mga sala nagpaakig sa Ginoo sa Juda kag sa Jerusalem. Ang GINOO nagpadala sang mga propeta sa pagpaandam sa ila sa pagbalik sa iya, pero ang mga tawo wala magsapak sa ila. Dayon ang espiritu sang Ginoo naggahom kay Zacarias, nga anak ni Joiada nga pari. Nagtindog sia sa duog nga makita sia sang mga tawo kag nagsinggit, “Ang Ginoo nga Dios nagapamangkot sa inyo ngaa ginsikway ninyo ang iya mga sugo kag nagadala kamo sang kalalat-an sa inyo kaugalingon! Ginbayaan ninyo sia, gani ginbayaan man niya kamo!” Si Haring Joas nagbuylog sa pagpatay kay Zacarias kag sa pagmando sang hari ang mga tawo nagbato kay Zacarias sa pasiyuhan sang Templo. Ang hari wala magdumdom sang mainunungon nga pag-alagad sa iya ni Joiada nga amay ni Zacarias, kundi ginpapatay niya si Zacarias. Samtang tagumatayon si Zacarias, nagsinggit sia, “Kabay ang GINOO makakita sang imo ginahimo kag magasilot sa imo!” Sang makaligad ang pila ka bulan, ang mga taga-Siria nagsalakay sang Juda kag Jerusalem, ginpamatay ang tanan nga mga pangulo, kag nagdala sing madamo nga mga pagkabutang pabalik sa Damasco, ang mga hangaway sang Siria diutay lang,  pero ginpalutos sang GINOO sa ila ang madamo nga mga hangaway sang Juda, tungod kay ang mga tawo nagbiya sa GINOO, ang Dios sang ila mga katigulangan. Sa sini nga paagi, si Haring Joas ginsilutan. Napilasan sia sing malubha, kag sang maghalin ang mga kaaway, ang duha sang iya mga opisyales naghimbon sa pagpatay sa iya sa iya katre sa pagtimalus sang pagpatay sang anak nga lalaki ni Joiada nga pari. Ginlubong sia sa Siyudad ni David, ang daan nga bahin sang Jerusalem, pero indi sa mga lulobngan sang hari.

Salmo sa Pagsabat:

Mga Salmo 89:4-5, 29-30, 31-32, 33-34

(S) Pagatumanon ko sa gihapon ang akon saad kay David.

Pagatumanon ko sa gihapon ang akon saad sa iya, kag ang kasugtanan sa iya magapadayon sa walay katapusan. Ang isa sang iya mga kaliwat manginhari sa gihapon, ang iya ginharian manginwalay katapusan subong sang langit. (S)
Pero kon ang iya mga kaliwat wala nagatuman sang akon kasugoan, kag wala nagakabuhi suno sa akon mga pagsulondan; kon wala nila ginasapak ang akon mga pagtudlo, kag wala nila ginabantayi ang akon mga sugo, ti silutan ko sila tungod sang ila mga sala. (S)
Hanuton ko sila tungod sang ila mga sayop. Pero indi ako mag-untat sa paghigugma kay David, ukon palugaw-an ko sia sang akon saad sa iya, kag indi ko pagbawion ang bisan isa ka saad nga ginhimo ko sa iya. (S)
Sa akon balaan nga ngalan nagtapat ako sa pagsaad; indi gid ako magbutig kay David! Indi gid sia mawad-an sing mga kaliwat, kag  bantayan ko ang iya ginharian tubtob nga ang adlaw nagasilak. (S)

Aleluya:

2 Corinto 8:9

Si Jesu-Cristo, nga bisan manggaranon sia, nagpakaimol sia tungod sa inyo, agod nga paagi sa iya kaimulon manginmanggaranon kamo.

Ang Pagbasa sang Santos nga Ebanghelyo suno kay:

San Mateo 6:24-34

“Wala sing tawo nga makaalagad sa duha ka agalon. Kay kontrahon niya ang isa kag higugmaon niya ang isa, ukon magadampig sia sa isa kag magatamay sa isa. Indi kamo makaalagad sing dungan sa Dios kag sa manggad. “Amo ini ang kabangdanan kon ngaa nagasiling ako sa inyo nga indi kamo magpalibog kon ano ang inyo pagakaunon kag pagaimnon agod kamo mabuhi, ukon ano ang inyo isuksok sa inyo lawas. Indi bala ang kabuhi labi pa sa kalan-on kag ang lawas labi pa sa panapton? Tan-awa bala ang mga pispis nga nagalupadlopad sa palibot. Wala sila nagasab-og sing binhi ukon nagaani, ukon nagatipon sang ila mga patubas sa mga tambubo, pero ang inyo Amay sa langit nagapakaon sa ila! Indi bala mahal pa kamo sa ila? Sin-o bala sa inyo ang makadugang sing mga tinuig sa iya kabuhi paagi sa pagpalibog tungod sini? “Ngaa bala magpalibog kamo nahanungod sang inyo mga bayu? Tan-awa bala kon daw ano ang pagtubo sang mga bulak sa latagon; wala sila nagapangabudlay ukon nagahimo sang ila mga bayu. Pero nagasiling ako sa inyo nga bisan pa si Salomon sa iya kamanggaran wala makasuksok sing bayu nga subong katahom sini nga mga bulak. Ang Dios amo ang nagapabayu sang hilamon nga nagatubo karon kag buas idap-ong lamang sa kalayo. Indi bala sia magpabayu sa inyo? Ay kadiutay sang inyo pagtuo! Gani indi kamo magpalibog nga nagasiling, ‘Diin bala kita makuha sang aton kaunon, ukon sang aton ilimnon, ukon sang aton mga bayu?’ (Amo ini nga mga butang ang ginapaligban pirme sang mga Gentil.) Ang inyo Amay sa langit nakahibalo nga kinahanglan ninyo ini nga mga butang. Sa baylo sini, unaha ninyo ang pagpangita sang Ginharian sang Dios kag ang iya katarungan kag hatagan niya kamo sini tanan nga mga butang. Gani indi kamo magpalibog nahanungod sang buas, kay ang buas may iya man nga kaugalingon nga palaligban. Wala sing kinahanglan nga dugangan pa ang palaligban nga nagaabot sa tagsa ka adlaw.”

Hunyo 22 | Hunyo 24